ಪ್ರೇಕ್ಷಕರ ಕೃಪೆ, ರಾಮ್ ಲೀಲಾ ಗಲ್ಲಾಪೆಟ್ಟಿಗೆ ಫುಲ್

ಪ್ರೇಕ್ಷಕರ ಮನಗೆದ್ದ ಚಿತ್ರ

ರೋಮಿಯೋ ಹಾಗೂ ಜೂಲಿಯಟ್ ಪಾತ್ರದಲ್ಲಿ ರಣವೀರ್ ಸಿಂಗ್ ಹಾಗೂ ದೀಪಿಕಾ ಪಡುಕೋಣೆ ದೇಸಿ ರೋಮಿಯೋ-ಜೂಲಿಯಟ್ ನಲಿದಾಟ, ಪ್ರಣಯ ಚೇಷ್ಟೆಗಳು ಈ ಚಿತ್ರಕ್ಕೆ ಕೃಷ್ಣಲೀಲೆ ಎಂದು ಹೆಸರಿಡಬೇಕಿತ್ತು ಎಂದು ಪ್ರೇಕ್ಷಕರಿಂದ ಪ್ರತಿಕ್ರಿಯೆ ಪಡೆದಿತ್ತು.ಆದರೆ, ಚಿತ್ರ ಉತ್ಪ್ರೇಕ್ಷೆಗೆ ತಕ್ಕಂತೆ ಮೂಡಿ ಬಂದಿರುವುದರಿಂದ ಪ್ರೇಕ್ಷಕರ ಮನ ಗೆದ್ದಿದೆ. ಹೀಗಾಗಿ ಆರಂಭದ ದಿನವೇ ಚಿತ್ರದ ಗಲ್ಲಾಪೆಟ್ಟಿಗೆ ತುಂಬತೊಡಗಿತು. ವಿಮರ್ಶಕರ ವಿಮರ್ಶೆ ಇಲ್ಲಿ ಓದಿ

ಮೊದಲ ದಿನದ ಗಳಿಕೆ

ರಾಮ್ ಲೀಲಾ ಚಿತ್ರದ ಮೊದಲ ದಿನ ಗಳಿಕೆಯಲ್ಲಿ ಮುಂಗಡ ಬುಕ್ಕಿಂಗ್ ಮಹತ್ವದ ಪಾತ್ರ ವಹಿಸಿದೆ. ಶೇ80 ರಷ್ಟು ಟಿಕೆಟ್ ಗಳು ಅಡ್ವಾನ್ಸ್ ಬುಕ್ಕಿಂಗ್ ಕಂಡಿದ್ದರೆ, ಮೊದಲ ದಿನ ಚಿತ್ರಮಂದಿರಗಳು ಶೇ 90 ರಷ್ಟು ತುಂಬಿತ್ತು. ಸಚಿನ್ ಅವರ ವಿದಾಯ ಟೆಸ್ಟ್ ಪಂದ್ಯದ ಹಿನ್ನೆಲೆಯಲ್ಲಿ ಮುಂಬೈನಲ್ಲಿ ಜನ ಬರುವುದು ಕಡಿಮೆ ಎನ್ನಲಾಗಿತ್ತು. ಆದರೆ, ಸಂಜೆ ವೇಳೆಗೆ ಜನ ಚಿತ್ರಮಂದಿರದತ್ತ ಧಾವಿಸಿ ಬಂದರು.

ರಣವೀರ್- ದೀಪಿಕಾ ಜೋಡಿ

ರಣವೀರ್ ಹಾಗೂ ದೀಪಿಕಾ ಜೋಡಿಯ ಮೊದಲ ಚಿತ್ರ ಇದಾಗಿದ್ದು, ಮೊದಲ ಚಿತ್ರದಲ್ಲೇ ಕಮಾಲ್ ಮಾಡಿದ್ದಾರೆ. ರಣವೀರ್ ಅವರ ಈ ವರೆಗಿನ ಅತ್ಯುತ್ತಮ ಗಳಿಕೆ ತಂದುಕೊಟ್ಟ ಚಿತ್ರ ಎನಿಸಿದೆ. ಮೊದಲ ದಿನ ಬಾಕ್ಸಾಫೀಸ್ ನಲ್ಲಿ 16 ಕೋಟಿ ರು ಗಳಿಕೆ ಕಂಡು ಬಂದಿದೆ. 2013ರ ಅತ್ಯಂತ ಹೆಚ್ಚು ಗಳಿಕೆ ಚಿತ್ರಗಳ ಪೈಕಿ 5ನೇ ಸ್ಥಾನದಲ್ಲಿರುವ ರಾಮ್ ಲೀಲಾ ಚಿತ್ರ ರಣವೀರ್ ಅವರ ಉತ್ತಮ ಗಳಿಕೆ ಚಿತ್ರವೂ ಹೌದು.

ದೀಪಿಕಾ ಲಕ್ಕಿ

ದೀಪಿಕಾ ಪಡುಕೋಣೆ ಈಗಾಗಲೇ 100 ಕೋಟಿ ರು, 200 ಕೋಟಿ ರು ಕ್ಲಬ್ ಸೇರಿರುವ ನಟಿ ಎನಿಸಿದ್ದು, ಯೇ ಜವಾನಿ ಹೈ ದಿವಾನಿ ಹಾಗೂ ಚೆನ್ನೈ ಎಕ್ಸ್ ಪ್ರೆಸ್ ಚಿತ್ರದ ಮೂಲಕ ನಿರ್ಮಾಪಕರ ಪಾಲಿಗೆ ಗಲ್ಲಾ ಪೆಟ್ಟಿಗೆ ತುಂಬಿಸುವ ಲಕ್ಷ್ಮಿ ದೇವಿ ಎನಿಸಿದ್ದಾರೆ.

ಮೊದಲ ವಾರ ಒಟ್ಟಾರೆ ಗಳಿಕೆ

ಸಂಜಯ್ ಲೀಲಾ ಬನ್ಸಾಲಿ ಚಿತ್ರ ಮೊದಲ ದಿನ 16 ಕೋಟಿ ರು ಗಳಿಸಿದ ಮೇಲೆ ಶನಿವಾರ 17.5 ಕೋಟಿ ರು ಬಾಚಿತ್ತು. ಭಾನುವಾರ 19 ಕೋಟಿ ರು ಗಳಿಸಿ ಉತ್ತಮ ನಿರೀಕ್ಷೆ ಹುಟ್ಟಿಸಿದೆ.

ಒಟ್ಟಾರೆ ಮೊದಲ ವಾರದ ಮೂರು ದಿನಗಳಲ್ಲಿ ದೇಶಿ ಬಾಕ್ದಾಫೀಸ್ ನಲ್ಲಿ 52.5 ಕೋಟಿ ರು ನಿವ್ವಳ ಗಳಿಕೆ ಮಾಡಿದೆ. ಮೊದಲ ವಾರ ಗಳಿಕೆಯಲ್ಲಿ ಇತ್ತೀಚಿನ ಚಿತ್ರಗಳ ಪೈಕಿ ನಾಲ್ಕನೇ ಸ್ಥಾನ ಪಡೆದಿದೆ. ಗ್ರಾಂಡ್ ಮಸ್ತಿ (40.18 ಕೋಟಿ ರು), ರೇಸ್ 2(51.35 ಕೋಟಿ ರು) ಗಳಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.