ಸಲ್ಲು ಮನೆಯಲ್ಲಿ ಊಟ ಮಾಡಿ ಕೈತೊಳೆದುಕೊಂಡ ಕತ್ರಿನಾ

ಬಾಲಿವುಡ್‌ನ ಹಳೆಯ ಜೋಡಿ ಮತ್ತೆ ಒಂದಾಗಿದೆ. ಬಾಲಿವುಡ್ ತಾರೆಗಳಾದ ಸಲ್ಮಾನ್ ಖಾನ್ ಮತ್ತು ಕತ್ರಿನಾ ಕೈಫ್ ತಮ್ಮ ನಡುವಿನ ಅಂತರವನ್ನು ಇಷ್ಟು ದಿನ ಕಾದಿರಿಸಿಕೊಂದೇ ಬಂದಿದ್ದರು. ಆದರೆ ಮಂಗಳವಾರ ಇವರಿಬ್ಬರು ಒಟ್ಟಿಗೆ ಕಳೆದಿದ್ದಾರೆ. ಕೂತು ಜೊತೆಯಲ್ಲೇ ಊಟ ಮಾಡಿದ್ದಾರೆ. ಮನಸು ಬಿಚ್ಚಿ ಮಾತನಾಡಿದ್ದಾರೆ!

ಇಷ್ಟೆಲ್ಲಾ ನಡೆದಿರುವುದು ಕಬೀರ್ ಖಾನ್ ನಿರ್ದೇಶನದ ಯಶ್ ರಾಜ್ ಫಿಲಂಸ್‌ನ ಫೋಟೋ ಶೂಟ್‌ನಲ್ಲಿ. ವಿಶೇಷ ಎಂದರೆ ಈ ಫೋಟೋ ಶೂಟ್ ಸಲ್ಮಾನ್ ಅವರ ಗ್ಯಾಲಾಕ್ಸಿ ಅಪಾರ್ಟ್‌ಮೆಂಟ್‌ನ ಕಾಂಪೌಂಡ್‌ನಲ್ಲೇ ನಡೆದಿರುವುದು. ಫೋಟೋ ಶೂಟ್ ಬಳಿಕ ಬನ್ನಿ ಊಟ ಮಾಡಿಕೊಂಡು ಹೋಗಿ ಎಂದು ಕತ್ರಿನಾಳನ್ನು ಸಲ್ಲು ಆಹ್ವಾನಿಸಿದರಂತೆ. ಬಳಿಕ ಇಬ್ಬರೂ ಊಟ ಮಾಡುತ್ತಾ ಕಷ್ಟ ಸುಖ ಮಾತನಾಡಿಕೊಂಡಿದ್ದಾರೆ ಎನ್ನುತ್ತವೆ ಮೂಲಗಳು.

ಕಳೆದ ಒಂದು ವರ್ಷದಿಂದ ಈ ಜೋಡಿ ನಾನೊಂದು ತೀರ ನೀನೊಂದು ತೀರ ಎಂಬಂತಿದ್ದರು. ಈಗ ಮತ್ತೆ ಇಬ್ಬರ ನಡುವೆ ಸ್ನೇಹ ಚಿಗುರಿದೆ. ಮಾಮರವೆಲ್ಲೋ ಕೋಗಿಲೆ ಅಲ್ಲೇ ಎಂಬಂತಾಗಿದೆ. "ಇದೊಂದು ರೀತಿ ವೃತ್ತಿಗೆ ಸಂಬಂಧಿಸಿದ ಭೇಟಿ ಅಷ್ಟೇ. ಇದರಲ್ಲೇನು ವಿಶೇಷವಿಲ್ಲ." ಎಂದಿದ್ದಾರೆ ಕತ್ರಿನಾ ಕೈಫ್. ಆದರೆ ಸಲ್ಲು ಕುಟುಂಬದವರೊಂದಿಗೂ ಕತ್ರಿನಾ ಚೆನ್ನಾಗಿ ಹೊಂದಿಕೊಂಡಿದ್ದರು ಎಂಬ ಸುದ್ದಿಯೂ ಇದೆ.