ಅಮೀರ್ ಖಾನ್ ತ್ರಿ ಈಡಿಯಟ್ಸ್ ಚೀನಾ ಭಾಷೆಗೆ ಡಬ್

ಭಾರತದ ಶಿಕ್ಷಣ ಪದ್ಧತಿಯನ್ನು ಕಥಾವಸ್ತುವಾಗಿಸಿಕೊಂಡು ಜಯಭೇರಿ ಬಾರಿಸಿದ ಬಾಲಿವುಡ್ ಚಿತ್ರ 'ತ್ರಿ ಈಡಿಯಟ್ಸ್'. ಅಮೀರ್ ಖಾನ್ ಮುಖ್ಯಭೂಮಿಕೆಯಲ್ಲಿದ್ದ ಈ ಚಿತ್ರ ಈಗ ಚೀನಾ ಭಾಷೆಗೆ ಡಬ್ ಆಗಿ ಬಿಡುಗಡೆಯಾಗಿದೆ. ಈ ಮೂಲಕ ಭಾರತದ ಚಿತ್ರೋದ್ಯಮಕ್ಕೆ ಹೊಸ ಮಾರುಕಟ್ಟೆ ಸಿಕ್ಕಂತಾಗಿದೆ.

ಕರೀನಾ ಕಪೂರ್ ಪಾತ್ರಕ್ಕೆ ಚೀನಾದ ನಟಿ ತಾಂಗ್ ವಾಯ್ ಧ್ವನಿ ನೀಡಿದ್ದಾರೆ ಎಂದು ಚೀನಾ ಫಿಲ್ಮ್ ಗ್ರೂಫ್ ಕಾರ್ಪೋರೇಷನ್ ಹೇಳಿದೆ. ಚೀನಾದಲ್ಲಿ ವರ್ಷಕ್ಕೆ ಕೆಲವೇ ಕೆಲವು ಭಾರತೀಯ ಚಿತ್ರಗಳು ಮಾತ್ರ ತೆರೆಕಾಣುತ್ತವೆ. ಆದರೆ 'ತ್ರಿ ಈಡಿಯಟ್ಸ್' ಬಿಡುಗಡೆಯ ಜೊತೆ ಚೀನಾ ಭಾಷೆಗೆ ಡಬ್ ಆಗಿರುವುದು ವಿಶೇಷ.

ಶಾರುಖ್ ಖಾನ್ ಅಭಿನಯದ ಮೈ ನೇಮ್ ಈಸ್ ಖಾನ್ ಚಿತ್ರಕ್ಕಿಂತಲೂ ತ್ರಿ ಈಡಿಯಟ್ಸ್ ಚಿತ್ರ ವಿದೇಶಗಳಲ್ಲಿ ಹೆಚ್ಚಾಗಿ ಹಣ ಬಾಚಿತ್ತು. ಥೈವಾನ್ ಹಾಗೂ ಹಾಂಕಾಂಗ್‌ನಲ್ಲೂ ತ್ರಿ ಈಡಿಯಟ್ಸ್ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. (ಪಿಟಿಐ)