ಗೂಗಲ್ ಕಚೇರಿಯಲ್ಲಿ ಹುಚ್ಚೆದ್ದು ಕುಣಿದ ಡಾನ್ ಶಾರೂಖ್ ಖಾನ್

ಕಳೆದ ಬುಧವಾರ ರಾತ್ರಿ ಇಲ್ಲಿನ ಗೂಗಲ್ ಕಚೇರಿಯಲ್ಲಿ ಬಾಲಿವುಡ್ ಶೈಲಿಯಲ್ಲಿ ಡ್ಯಾನ್ಸ್ ಪಾರ್ಟಿ ಆಯೋಜಿಸಲಾಗಿತ್ತು. ಆದರೆ ಇದ್ದಕ್ಕಿಂದ್ದಂತೆ 'ಡಾನ್ ಕಿ ತಲಾಶ್ ಮುಲ್ಕೋಂ ಕಿ ಪೊಲೀಸ್ ಕರ್ ರಹಿ ಹೈ' ಎಂಬ ಆತಂಕದ ಸಂದೇಶ ಮೊಳಗುತ್ತಿದ್ದಂತೆ ಕಚೇರಿಯಲ್ಲಿ ಅರೆಕ್ಷಣ ಉದ್ವೇಗ, ಆತಂಕದ ವಾತಾವರಣ ಮೂಡಿದೆ.

ಲೈಟುಗಳನ್ನು ಆಫ್ ಮಾಡಿ, ಇಂತಹ ಗಂಭೀರ ವಾಣಿ ಕೇಳಿಬರುತ್ತಿದ್ದಂತೆ ಗೂಗಲ್ ಸಿಬ್ಬಂದಿ ಬೇಸ್ತು ಬಿದ್ದಿದ್ದಾರೆ. ಪೊಲೀಸ್ ನಾಯಿಗಳು, ಪೊಲೀಸ್ ಅಧಿಕಾರಿಗಳು ವೇದಿಕೆಯ ಮೇಲೆ ದಾಳಿಯಿಟ್ಟಾಗಲಂತೂ ಸಿಬ್ಬಂದಿ ನಿಜಕ್ಕೂ ಭಯಭೀತರಾಗಿದ್ದಾರೆ.

ಆದರೆ ಅದೇ ವೇಳೆಗೆ ಅಲೆಅಲೆಯಾಗಿ ಡಾನ್2 ಹಾಡು ಕೇಳಿಬಂದಿದೆ. ಆಗಲೇ ಡಾನ್ ಮಾರುವೇಶದಲ್ಲಿ ನಟ ಶಾರೂಖ್ ಖಾನ್ ಸ್ಟೆಪ್ಸ್ ಹಾಕುತ್ತಾ ಬಂದಾಗ ಗೂಗಲ್ ಉದ್ಯೋಗಿಗಳು ಹೋ ಎಂದು ಕೂಗು ಹಾಕಿದ್ದಾರೆ.

ಮುಂದಿನ ಒಂದು ಗಂಟೆ ಕಾಲ ಗೂಗಲ್ ಉದ್ಯೋಗಿಗಳು ಮೈಮರೆತು ತಮ್ಮ ಆರಾಧ್ಯದೈವನೊಂದಿಗೆ ಕುಣಿದುಕುಪ್ಪಳಿಸಿದ್ದಾರೆ. ಶಾರೂಖ್ ಬರ್ತಾರೆ ಅಂತ ಗೊತ್ತಿತ್ತು. ಆದರೆ ಸುಳ್ಳು ಸುದ್ದಿ ಅಂದ್ಕೊಂಡು ಸುಮ್ಮನಾಗಿದ್ದೆ. ಆದರೆ ಇಲ್ಲಿ ನೋಡಿದರೆ ಸಾಕ್ಷಾತ್ ನಟನೇ ಎದುರಿಗೆ ಬಂದ್ಬಿಟ್ಟ. ಏನು ಮಾಡಲು ತೋಚಲಿಲ್ಲ. ಆತನೊಂದಿಗೆ ಸುಮ್ಮನೆ ಸಿಕ್ಕಾಪಟ್ಟೆ ಕುಣಿದೆ ಎಂದು 25 ವರ್ಷದ ಉದ್ಯೋಗಿ ನಿಧಿ ಪಾರ್ಟಿ ನಂತರ ತಮ್ಮ ಸಂಭ್ರವನ್ನು ಹಂಚಿಕೊಂಡರು.

ಗೂಗಲ್ ವರ್ಷಾಂತ್ಯ ಪಾರ್ಟಿಯೂ ನೆರವೇರಿದಂತಾಗುತ್ತದೆ ಎಂದೆಣೆಸಿ, Don 2 ತೆಲುಗು ಅವತರಣಿಕೆಗಾಗಿ ಖುದ್ದು ಮೋಜುಮಸ್ತಿ ಮಾಡಲು ಶಾರೂಖ್ ಖಾನ್ ರನ್ನು ಆಮಂತ್ರಿಸಲಾಗಿತ್ತು. ಇಂತಹ ಅದ್ಭುತ ಅವಕಾಶ ಕಲ್ಪಿಸಿದ ಗೂಗಲ್ ಸಂಸ್ಥೆಗೂ ನಟ ಶಾರೂಖ್ ಖಾನ್ ಭಾವಪೂರ್ಣ ಅಭಿವಂದನೆಗಳನ್ನು ತಿಳಿಸಿದರು.