ಬೆಳ್ಳಿತೆರೆಗೆ ಜಾರ್ಜ್ ಬುಷ್ ಮೇಲೆ ಶೂ ಎಸೆದವನ ಕಥೆ

ಬಾಲಿವುಡ್‌ನಲ್ಲಿ ವಿಭಿನ್ನ ಪ್ರಯೋಗಗಳಿಗೆ ಹೆಸರಾದ ನಿರ್ದೇಶಕ ಮಹೇಶ್ ಭಟ್. ಈ ಬಾರಿ ಅವರು ಅಮೆರಿಕ ಮಾಜಿ ಅಧ್ಯಕ್ಷ ಜಾರ್ಜ್ ಬುಷ್‌ ಮೇಲೆ ಶೂ ಎಸೆದವನ ಕಥೆಯನ್ನು ಕೈಗೆತ್ತಿಕೊಂಡಿದ್ದಾರೆ. 'The Last Salute' ಎಂಬ ನಾಟಕ ಚಿತ್ರವಾಗುತ್ತಿದೆ. ಈ ನಾಟಕದ ಕರ್ತೃ ಇರಾಕಿನ ಪತ್ರಕರ್ತ ಮುಂತಾಧರ್ ಅಲ್ ಝೈಡಿ ಎಂಬುವವನು.

ಈತ ಬೇರಾರು ಅಲ್ಲ ಜಾರ್ಜ್ ಬುಷ್ ಮೇಲೆ ಶೂ ಎಸೆದಾತ. ಈತನೇ ಈ ನಾಟಕವನ್ನು ರಚಿಸಿದ್ದು ಇತ್ತೀಚೆಗೆ ನವದೆಹಲಿಯಲ್ಲಿ ಪ್ರದರ್ಶನಗೊಂಡಿತ್ತು. ಇದನ್ನು ವೀಕ್ಷಿಸಿದ ಮಹೇಶ್ ಭಟ್, ಚಿತ್ರ ಮಾಡುವುದಾಗಿ ತಿಳಿಸಿದ್ದಾರೆ. ನಾಟಕದ ಹೆಸರೇ ಚಿತ್ರದ ಶೀರ್ಷಿಕೆಯಾಗಲಿದೆ.

ಈ ಚಿತ್ರಕ್ಕೆ ಪೂಜಾ ಭಟ್ ಮತ್ತು ದಿನೊ ಮೋರಿಯಾ ಸಹ ನಿರ್ಮಾಪಕರು. ಚಿತ್ರ ನಿರ್ದೇಶನದ ಜವಾಬ್ದಾರಿಯನ್ನು ಮಧ್ಯ ಪ್ರಾಚ್ಯದ ನಿರ್ದೇಶಕರೊಬ್ಬರಿಗೆ ಒಪ್ಪಿಸುವ ಸಾಧ್ಯತೆ ಇದೆ. ಹಾಲಿವುಡ್ ಚಿತ್ರತಂಡದೊಂದಿಗೆ ಸಂಪೂರ್ಣ ಚಿತ್ರವನ್ನು ಲೆಬನಾನ್‌ನಲ್ಲಿ ಚಿತ್ರೀಕರಿಸಲಾಗುತ್ತಂತೆ. ಇಂಗ್ಲಿಷ್ ಮತ್ತು ಅರೇಬಿಕ್ ಭಾಷೆಗಳಲ್ಲಿ ಚಿತ್ರ ನಿರ್ಮಾಣವಾಗಲಿದೆ. (ಏಜೆನ್ಸೀಸ್)