ಇರಾಕ್ ಸರ್ವಾಧಿಕಾರಿ ಸದ್ದಾಂ ಹುಸೇನ್ ಬಾಲಿವುಡ್ ತೆರೆಗೆ

ಇರಾಕಿನ ಸರ್ವಾಧಿಕಾರಿ ಸದ್ದಾಂ ಹುಸೇನ್ ಚಿತ್ರದಲ್ಲಿ ಲೋಕಬಲ್ಲ ವಿಲನ್ ಎನ್ನುವುದಕ್ಕಿಂತ ಹೀರೊ ಆಗಿ ಮಿಂಚಲಿದ್ದಾನೆ. ಅಟ್ ಲೀಸ್ಟ್, ಚಿತ್ರದ ನಾಯಕನ ಪಾತ್ರಕ್ಕೆ ಆಯ್ಕೆಯಾಗಿರುವ ಬಾಲಿವುಡ್ ನಟ, ನಿರ್ಮಾಪಕ ಅಕ್ಬರ್ ಖಾನ್, ಸದ್ದಾಂನನ್ನು ಹೀರೋ ಆಗಿಸಲು ಹೊರಟಿದ್ದಾರೆ. ನಿರ್ಮಾಪಕ ಕಮ್ ನಿರ್ದೇಶಕ ಸುರೇಶ್ ಕೊಹ್ಲಿ ಅವರು ಖಾನ್ ಹೆಸರನ್ನು ಸದ್ದಾಂ ಪಾತ್ರಕ್ಕೆ ಅಖೈರುಗೊಳಿಸಿದ್ದಾರೆ.

ಸದ್ದಾಂ ಕುರಿತಾದ ಪುಸ್ತಕವೊಂದರಲ್ಲಿ ಅವನ ವ್ಯಕ್ತಿತ್ವ ಗಮನ ಸೆಳೆಯಿತು. ಅದೊಂದು ಮಾನವಾಸಕ್ತಿ ಹುಟ್ಟಿಸುವ ಕಥೆ. ಅವನೊಬ್ಬ ಹೀರೊ, ನಿಜವಾದ ದೇಶಪ್ರೇಮಿ. ಆದರೆ ಸದ್ದಾಂ ಜಗತ್ತಿಗೆ ನಕಾರಾತ್ಮಕವಾಗಿ ಪರಿಚಿತನಾಗಿದ್ದಾನೆ ಎಂದೆಲ್ಲ ಕೊಹ್ಲಿ ಸಾಹೇಬರು ಸದ್ದಾಂನನ್ನು ಹಾಡಿಹೊಗಳಿದ್ದಾರೆ. ನೋಡಬೇಕು ಚಿತ್ರ ಇನ್ನು ಯಾವ ಸ್ವರೂಪದಲ್ಲಿರುತ್ತದೋ !? ಅಜೀಜ್ ಬರ್ನಿ ಬರೆದಿರುವ 'ಸಫರ್ ಜಿಂದಗಿ ಕಾ' ಪುಸ್ತಕವನ್ನಾಧರಿಸಿ ಈ ಸಿನಿಮಾ ನಿರ್ಮಾಣವಾಗಲಿದೆ. ಸೆಪ್ಟೆಂಬರ್ ನಲ್ಲಿ ಚಿತ್ರ ಸೆಟ್ಟೇರಲಿದೆ. ಇರಾಕ್ ನಲ್ಲಿ ಕೆಲವೊಂದು ನೈಜ ತಾಣಗಳಲ್ಲಿ ಚಿತ್ರೀಕರಣ ನಡೆಯಲಿದೆ.