ಕಾಲ್ಕಿತ್ತ ಅಮೀರ್ ಖಾನ್! 'ಕೆಜಿಎಫ್‌ 2'ಗೆ ಎದುರಾಳಿಯೇ ಇಲ್ಲ?

ಬೈಸಾಕಿ ಹಬ್ಬಕ್ಕೆ ಬಿಡುಗಡೆ ಮಾಡಲು ಯೋಜನೆ

ಏಪ್ರಿಲ್ 14 ರಂದು ಪಂಜಾಬಿಗಳ ಪವಿತ್ರ ಹಬ್ಬ ಬೈಸಾಕಿ ಇದ್ದು 'ಲಾಲ್ ಸಿಂಗ್ ಚಡ್ಡಾ' ಸಿನಿಮಾದಲ್ಲಿ ಅಮೀರ್ ಖಾನ್ ಮೊದಲ ಬಾರಿಗೆ ಸಿಖ್ ವ್ಯಕ್ತಿಯ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಕಾರಣ ಅದೇ ದಿನ ಸಿನಿಮಾವನ್ನು ಬಿಡುಗಡೆ ಮಾಡಲು ಅಮೀರ್ ಖಾನ್ ಇಚ್ಛಿಸಿದ್ದರು. 'ಕೆಜಿಎಫ್ 2' ಸಿನಿಮಾದ ಬಿಡುಗಡೆ ದಿನಾಂಕದಂದೇ ತಮ್ಮ ಸಿನಿಮಾ ಬಿಡುಗಡೆ ಮಾಡುತ್ತಿರುವುದಕ್ಕೆ ಯಶ್ ಹಾಗೂ ನಿರ್ಮಾಪಕರ ಬಳಿ ಕ್ಷಮೆ ಕೇಳಿದ್ದಾಗಿ ಅಮೀರ್ ಖಾನ್ ಹೇಳಿದ್ದರು.

ಬಾಹುಬಲಿ ಸಿರೀಸ್ ಹಾಗೂ 3 ಈಡಿಯಟ್ಸ್‌ಗಿಂತೂ 'ಪುಷ್ಪ' ಗ್ರೇಟ್ ಎಂದ ಬಾಲಿವುಡ್ ನಟ ಆಮಿರ್ ಖಾನ್

ಬಿಡುಗಡೆ ದಿನಾಂಕ ಮುಂದೂಡಿಕೆ

ಆದರೆ ಈಗ ತಮ್ಮ ಬಿಡುಗಡೆ ದಿನಾಂಕವನ್ನು ಆಗಸ್ಟ್ 11 ಕ್ಕೆ ಮುಂದೂಡಿಕೊಂಡಿದ್ದಾರೆ ಅಮೀರ್ ಖಾನ್. ಸಿನಿಮಾವು ನಿರೀಕ್ಷಿತ ಸಮಯದಲ್ಲಿ ಪೂರ್ಣ ಆಗದ ಕಾರಣ ಈ ನಿರ್ಣಯವನ್ನು ಅಮೀರ್ ಖಾನ್ ಹಾಗೂ ಚಿತ್ರತಂಡ ತೆಗೆದುಕೊಂಡಿದೆ. ಆಗಸ್ಟ್ 11 ರಂದು ಪ್ರಭಾಸ್ ನಟನೆಯ 'ಆದಿಪುರುಷ್' ಸಿನಿಮಾ ಬಿಡುಗಡೆ ಆಗಬೇಕಿತ್ತು. ಆದರೆ ಅಮೀರ್ ಖಾನ್ ಸಿನಿಮಾ ಬಿಡುಗಡೆ ಆಗುತ್ತಿರುವ ಕಾರಣ ಅವರು ತಮ್ಮ ಸಿನಿಮಾ ಬಿಡುಗಡೆ ಮುಂದಕ್ಕೆ ಹಾಕಿಕೊಂಡಿದ್ದಾರೆ.

'ಕೆಜಿಎಫ್ 2' ಗೆ ಎದುರಾಳಿಯೇ ಇಲ್ಲವೆ?

'ಲಾಲ್ ಸಿಂಗ್ ಛಡ್ಡಾ' ಸಿನಿಮಾ ಮುಂದೂಡಲ್ಪಟ್ಟಿದೆ ಎಂದ ಮಾತ್ರಕ್ಕೆ 'ಕೆಜಿಎಫ್ 2' ಸಿನಿಮಾಕ್ಕೆ ಎದುರಾಳಿಯೇ ಇಲ್ಲ ಎಂದೇನೂ ಇಲ್ಲ. ಏಪ್ರಿಲ್ 14 ರಂದು ನಟ ಶಾಹಿದ್ ಕಪೂರ್ ನಟನೆಯ ಹಿಂದಿ ಸಿನಿಮಾ 'ಜೆರ್ಸಿ' ಬಿಡುಗಡೆ ಆಗಲಿದೆ. ತೆಲುಗಿನಲ್ಲಿ ನಾನಿ ನಟಿಸಿದ್ದ ರಾಷ್ಟ್ರಪ್ರಶಸ್ತಿ ವಿಜೇತ 'ಜೆರ್ಸಿ' ಸಿನಿಮಾದ ರೀಮೇಕ್ ಈ ಸಿನಿಮಾ. ಆದರೆ ಈ ಸಿನಿಮಾವು 'ಕೆಜಿಎಫ್ 2' ಗೆ ಪ್ರಬಲ ಪೈಪೋಟಿ ಕೊಡಲಾರದು ಎಂದೇ ಹೇಳಲಾಗುತ್ತಿದೆ. ಮತ್ತೊಂದು ಸಂಗತಿಯೆಂದರೆ ಶಾಹಿದ್ ಕಪೂರ್‌ರ 'ಜೆರ್ಸಿ' ಸಿನಿಮಾದ ಬಿಡುಗಡೆಯೂ ಮುಂದಕ್ಕೆ ಹೋಗುವ ಸಾಧ್ಯತೆ ಇದೆ.

ಹಾಲಿವುಡ್‌ ನಟನಿಗಾಗಿ ವಿಶೇಷ ಶೋ ಆಯೋಜಿಸಲಿರುವ ಅಮೀರ್ ಖಾನ್: ಕಾರಣ?

ಫಾರೆಸ್ಟ್ ಗಂಫ್ ಸಿನಿಮಾ ರೀಮೇಕ್

'ಲಾಲ್ ಸಿಂಗ್ ಛಡ್ಡಾ' ಸಿನಿಮಾ ಇಂಗ್ಲೀಷ್‌ನ 'ಫಾರೆಸ್ಟ್ ಗಂಪ್' ಪುಸ್ತಕ ಆಧರಿಸಿ ನಿರ್ಮಿಸಿರುವ ಸಿನಿಮಾ ಆಗಿದೆ. ಇದೇ ಪುಸ್ತಕ ಆಧರಿಸಿ ಇಂಗ್ಲೀಷ್‌ನಲ್ಲಿ 1994ರಲ್ಲಿಯೇ ಇದೇ ಹೆಸರಿನ ಸಿನಿಮಾ ನಿರ್ಮಾಣ ಮಾಡಲಾಗಿದೆ. ಟಾಮ್ ಹ್ಯಾಂಕ್ಸ್ ನಟನೆಯ ಈ ಸಿನಿಮಾ ವಿಶ್ವದ ಅತ್ಯುತ್ತಮ ಸಿನಿಮಾಗಳಲ್ಲಿ ಒಂದು ಎಂಬ ಖ್ಯಾತಿಗೆ ಪಾತ್ರವಾಗಿದೆ. ಹಲವು ಆಸ್ಕರ್‌ ಪ್ರಶಸ್ತಿಗಳನ್ನು ಸಹ ಆ ವರ್ಷ ಪಡೆದುಕೊಂಡಿತ್ತು. ಇಂಗ್ಲೀಷ್‌ನಲ್ಲಿ ಟಾಮ್ ಹ್ಯಾಂಕ್ಸ್ ಮಾಡಿದ್ದ ಪಾತ್ರವನ್ನು ಇದೀಗ ಅಮೀರ್ ಖಾನ್ ನಿರ್ವಹಿಸುತ್ತಿದ್ದು ಈ ಸಿನಿಮಾದಲ್ಲಿ ಕರೀನಾ ಕಪೂರ್ ನಾಯಕಿಯಾಗಿ ನಟಿಸಿದ್ದಾರೆ. ತೆಲುಗಿನ ನಾಗ ಚೈತನ್ಯ ಸಹ ಈ ಸಿನಿಮಾದಲ್ಲಿದ್ದಾರೆ.