ಬಂಡೀಪುರದಲ್ಲಿ ಆನೆ ಮೇಲೆ ಗುಂಡು: ಕೆರಳಿದ ಪ್ರಾಣಿ ಪ್ರೇಮಿ ರಣದೀಪ್ ಹೂಡಾ

ಹೀಗೆ ಮಾಡಲು ಹೇಗೆ ಸಾಧ್ಯ?

ಇಂತಹ ಘಟನೆ ನಡೆಯಲು ಹೇಗೆ ತಾನೆ ಸಾಧ್ಯ? ಇದನ್ನು ನಿಜಕ್ಕೂ ಯಾರೋ ತಮಾಷೆಗಾಗಿ ಮಾಡಿದ್ದಾರಾ? ಕರ್ನಾಟಕ ಅರಣ್ಯ ಇಲಾಖೆಯವರು ಇದರ ಬಗ್ಗೆ ದಯವಿಟ್ಟು ಕೂಡಲೇ ಗಮನ ಹರಿಸಿ. ತಪ್ಪಿತಸ್ಥರನ್ನು ಕೂಡಲೇ ಹಿಡಿದು ಶಿಕ್ಷಿಸಬೇಕು ಎಂದು ಘಟನೆಯ ವಿಡಿಯೋದೊಂದಿಗೆ ರಣದೀಪ್ ಹೇಳಿದ್ದರು.

ಸಿಬ್ಬಂದಿ ವಜಾ, ವಿಚಾರಣೆ

ಈ ಘಟನೆ 2020ರ ಮಾರ್ಚ್ 7ರಂದು ನಡೆದಿದೆ. ಆನೆಯ ಮೇಲೆ ಗುಂಡು ಹಾರಿಸಿದ್ದಕ್ಕಾಗಿ ತಾತ್ಕಾಲಿಕ ಸಿಬ್ಬಂದಿ ರಹೀಂನನ್ನು ವಜಾಗೊಳಿಸಲಾಗಿದೆ. ಕರ್ನಾಟಕ ಅರಣ್ಯ ಇಲಾಖೆಯ ಕಾಯಂ ಉದ್ಯೋಗಿ ಉಮೇಶ್ ಎಂಬಾತನನ್ನೂ ತನಿಖೆಗೆ ಒಳಪಡಿಸಲಾಗಿದೆ ಎಂದು ರಣದೀಪ್ ಮಾಹಿತಿ ನೀಡಿದ್ದಾರೆ.

ಮೋಜಿಗಾಗಿ ಮಾಡಿದ್ದು ಸ್ಪಷ್ಟ

ಈ ಕ್ರಮವು ಅಪ್ರಬುದ್ಧತೆಯನ್ನು ತೋರಿಸುತ್ತದೆ. ಅವರು ಆನೆಯ ಕಡೆಗೆ ಗುಂಡು ಹಾರಿಸುವ ಅಗತ್ಯವೇ ಇರಲಿಲ್ಲ. ಎರಡನೆಯದಾಗಿ, ಗುಂಡು ಹಾರಿಸಿದ ಬಳಿಕ ಅವರು ಉದ್ರೇಕದಿಂದ ಚೀರಿದ್ದು ಅವರ ಕೃತ್ಯದ ಬಗ್ಗೆ ಸ್ಪಷ್ಟ ಪುರಾವೆಯಾಗಿದೆ ಎಂದು ಕಿಡಿಕಾರಿದ್ದಾರೆ.

ಅವರಿಗೂ ಇದೇ ಶಿಕ್ಷೆ ನೀಡಿ...

ರಣದೀಪ್ ಅವರ ಟ್ವೀಟ್ ಕಂಡು ಅವರ ಅಭಿಮಾನಿಗಳು ಕೂಡ ಈ ಘಟನೆ ಬಗ್ಗೆ ಖೇದ ಮತ್ತು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇದನ್ನು ನೋಡಲೂ ನೋವಾಗುತ್ತದೆ. ಇದೇ ರೀತಿ ಅವರನ್ನೂ ಗುಂಡಿಕ್ಕಬೇಕು ಎಂದು ನಟಿ ಗೀತಾ ಬಸ್ರಾ ಕೋಪ ವ್ಯಕ್ತಪಡಿಸಿದ್ದಾರೆ. ಅವರನ್ನು ಬರಿಗೈಯಲ್ಲಿ ಅದೇ ಆನೆಯ ಮುಂದೆ ಎಸೆಯಬೇಕು. ಅವರನ್ನು ಕೆಲಸದಿಂದ ವಜಾಗೊಳಿಸುವುದು ತೀರಾ ಸಣ್ಣ ಶಿಕ್ಷೆಯಾಗುತ್ತದೆ. ದೇಶದ ಎಲ್ಲ ವನ್ಯಜೀವಿ ಸಂರಕ್ಷಣಾ ಅರಣ್ಯಗಳಲ್ಲಿನ ಸಿಬ್ಬಂದಿಗೆ ಕಠಿಣ ಸಂದೇಶ ರವಾನೆಯಾಗಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.