ಎಂಗೇಜ್‌ಮೆಂಟ್ ದಿನವೇ ಗಂಭೀರ ಅಪಘಾತದಲ್ಲಿ ಖಳನಟ ದುರ್ಮರಣ

ಸಾವು ಯಾವಾಗ? ಹೇಗೆ? ಬರಬಹುದು ಎಂದು ಊಹಿಸುವುದು ಕಷ್ಟ. ಚಿತ್ರರಂಗದಲ್ಲಿ ಮತ್ತೆ ದುರಂತ ಸಂಭವಿಸಿದೆ. ಭೀಕರ ರಸ್ತೆ ಅಪಘಾತದಲ್ಲಿ ನಟ ಸೂರಜ್ ಮೆಹರ್ (40) ಕೊನೆಯುಸಿರೆಳೆದಿದ್ದಾರೆ. ನಿನ್ನೆ(ಏಪ್ರಿಲ್ 10) ಮಧ್ಯರಾತ್ರಿ ನಡೆದ ಭೀಕರ ಅಪಘಾತದಲ್ಲಿ ಕಾರು, ಟ್ರಕ್‌ಗೆ ಡಿಕ್ಕಿ ಹೊಡೆದ ಪರಿಣಾಮ ನಟ ಸೂರಜ್ ಮೆಹರ್ ಸಾವನ್ನಪ್ಪಿದ್ದಾರೆ.

'ಆಖ್ರಿ ಫೈಸ್ಲಾ' ಸಿನಿಮಾ ಚಿತ್ರೀಕರಣ ಮುಗಿಸಿ ನಟ ಸೂರಜ್ ಮೆಹರ್ ಮನೆಗೆ ಹಿಂತಿರುಗುತ್ತಿದ್ದ ಸಮಯದಲ್ಲಿ ಈ ಅಪಘಾತ ಸಂಭವಿಸಿರುವುದಾಗಿ ವರದಿಯಾಗಿದೆ. ಇಂದು(ಏಪ್ರಿಲ್ 11) ಮದುವೆ ನಿಶ್ಚಿತಾರ್ಥ ಸಮಾರಂಭ ನಿಗದಿಯಾಗಿತ್ತು. ಒಡಿಶಾದಲ್ಲಿ ತಮ್ಮ ಮುದವೆಯ ವಿಚಾರವನ್ನು ಬಹಿರಂಗ ಪಡಿಸುವ ಲೆಕ್ಕಾಚಾರದಲ್ಲಿದ್ದರು. ಅಷ್ಟರಲ್ಲಿ ವಿಧಿಯಾಟದಿಂದ ಅವರ ಪ್ರಾಣಪಕ್ಷಿ ಹಾರಿಹೋಗಿದೆ.

ಸೂರಜ್ ಮೆಹರ್ ಪ್ರಯಾಣಿಸುತ್ತಿದ್ದ ಸ್ಕಾರ್ಪಿಯೋ ಬಹಳ ವೇಗವಾಗಿ ಬಂದು ಟ್ರಕ್‌ಗೆ ಗುದ್ದಿದೆ ಎಂದು ಹೇಳಲಾಗುತ್ತಿದೆ. ದುರ್ಘಟನೆಯಲ್ಲಿ ನಟ ಸೂರಜ್ ಮೆಹರ್ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಕೆಲವರ ಪ್ರಕಾರ ಅವರನ್ನು ಆಸ್ಪತ್ರೆಗೆ ಸೇರಿಸುವ ವೇಳೆ ಕೊನೆಯುಸಿರೆಳೆದಿರುವುದಾಗಿ ಹೇಳಲಾಗುತ್ತಿದೆ. ವಾಹನದಲ್ಲಿದ್ದ ಚಾಲಕ, ಮತ್ತೊಬ್ಬ ವ್ಯಕ್ತಿ ತೀವ್ರವಾಗಿ ಗಾಯಗೊಂಡಿರುವುದಾಗಿ ವರದಿಯಾಗಿದೆ. ಇಬ್ಬರನ್ನು ಚಿಕಿತ್ಸೆಗಾಗಿ ಬಿಲಾಸ್‌ಪುರಕ್ಕೆ ಕಳುಹಿಸಲಾಗಿದೆ. ಸೂರಜ್ ಸಾವಿನಿಂದ ಇಂಡಸ್ಟ್ರಿಯಲ್ಲಿ, ಆತನ ಗ್ರಾಮದಲ್ಲಿ ದುಃಖ ಮಡುಗಟ್ಟಿದೆ.

ಸೂರಜ್ ಮೆಹರ್ ಛತ್ತೀಸ್‌ಗಢದಲ್ಲಿ ಖಳನಟನಾಗಿ ಗುರುತಿಸಿಕೊಂಡಿದ್ದರು. ಕೆಲ ಛತ್ತೀಸ್‌ಗಢಿ ಭಾಷೆಯ ಸಿನಿಮಾಗಳಲ್ಲಿ ನೆಗೆಟಿವ್ ಪಾತ್ರಗಳಲ್ಲಿ ನಟಿಸಿದ್ದರು. ಖಡಕ್ ಲುಕ್‌ನಿಂದಲೇ ಸೂರಜ್ ಗಮನ ಸೆಳೆಯುತ್ತಿದ್ದರು. ವಿಲನ್ ಪಾತ್ರಗಳಿಗೆ ಹೇಳಿ ಮಾಡಿಸಿದ ನಟ ಎನಿಸಿಕೊಂಡಿದ್ದರು.

ಸೂರಜ್ ಮೆಹರ್ ಬಿಲಾಸ್‌ಪುರದ ಸರಿಯಾ ಗ್ರಾಮದ ನಿವಾಸಿ ಆಗಿದ್ದರು. ಬುಧವಾರ ಒಡಿಶಾದ ಬಾತ್ಲಿಯಲ್ಲಿ ಎಂಗೇಜ್‌ಮೆಂಟ್ ನಡೆಯಬೇಕಿತ್ತು.