ಮಾಧ್ಯಮಗಳ ಮೇಲೆ ಬೌನ್ಸರ್​ ಹಾರಾಟ: ತಮನ್ನಾಗೆ ಮುಜುಗರ

ಬೌನ್ಸರ್​ಗಳ ವರ್ತನೆಯಿಂದ ಮಿಲ್ಕಿ ಬ್ಯೂಟಿಗೆ ಮುಜುಗರ

'ಬಬ್ಲಿ ಬೌನ್ಸರ್'​ ಪಕ್ಕಾ ಕಾಮಿಡಿ ​ ಸಿನಿಮಾವಾದ್ರೂ ಕೂಡ ಚಿತ್ರತಂಡ ಸಮಾಜಕ್ಕೆ ಒಂದೊಳ್ಳೆ ಸಂದೇಶ ನೀಡಲು ಮುಂದಾಗಿದೆ. ಹೀಗಾಗಿ ನಿನ್ನೆ ಹೈದರಾಬಾದ್​ದಲ್ಲಿ ನಡೆದ ಬಬ್ಲಿ ಬೌನ್ಸರ್​ ಚಿತ್ರದ ಪ್ರಚಾರದ ವೇಳೆ ನಟಿ ತಮನ್ನಾ ಬೌನ್ಸರ್​ಗಳ ಜೀವನದ ಬಗ್ಗೆ ಮಾತನಾಡಿದ್ದಾರೆ. ಬೌನ್ಸರ್​ಗಳ ಕೆಲಸ ಹಾಗೂ ಅವರ ಜೀವನದ ಕಷ್ಟಗಳ ಬಗ್ಗೆ ಮಾತನಾಡಿದ್ದಾರೆ. ಆದರೆ ಇದಾದ ಕೆಲವೇ ಸಮಯದಲ್ಲಿ ಸ್ವತಃ ತಮ್ಮ ಬೌನ್ಸರ್​ಗಳ ವರ್ತನೆಯಿಂದ ತಮ್ಮನ್ನಾ ಮುಜುಗರ ಪಡುವಂತಾಗಿದೆ.

'ಬಬ್ಲಿ ಬೌನ್ಸರ್​' ಪ್ರಚಾರದ ವೇಳೆ ನಡೆದಿದ್ದೇನು..?

'ಬಬ್ಲಿ ಬೌನ್ಸರ್'​ ಪ್ರಚಾರದ ವೇಳೆ ನಟಿ ತಮನ್ನಾ ಭಾಟಿಯ ಫೋಟೊಗಳನ್ನು ತೆಗೆಯಲು ಫೋಟೊಗ್ರಾಫರ್​ಗಳು ಮುಗಿಬಿದ್ದರು. ಅಲ್ಲದೇ ಓರ್ವ ಫೋಟೊಗ್ರಾಫರ್​ ಬೈಟ್​ ತೆಗೆದುಕೊಳ್ಳಲು ಮುಂದೆ ಬಂದಿದ್ದಾರೆ. ಈ ವೇಳೆ ತಮನ್ನಾ ಬೌನ್ಸರ್​ಗಳು ಇದನ್ನು ತಡೆದಿದ್ದು, ಬೈಟ್​ ತೆಗೆದುಕೊಳ್ಳಲು ಅವಕಾಶ ನೀಡದೆ ಅನುಚಿತ ವರ್ತನೆ ತೋರಿದ್ದಾರೆ.

ಕೆಟ್ಟ ಪದ ಬಳಸಿ ಫೋಟೊಗ್ರಾಫರ್​ಗೆ ನಿಂದನೆ

ಬೈಟ್​ ತೆಗೆದುಕೊಳ್ಳಲು ಬಂದ ವ್ಯಕ್ತಿಗೆ ತಮನ್ನಾ ಬೌನ್ಸರ್​ ನಿಂದಿಸಿದ್ದು, ಕೆಟ್ಟ ಪದ ಬಳಸಿ ಬೈದಿದ್ದಾರೆ ಎನ್ನಲಾಗಿದೆ. ಇದರಿಂದ ಕೆಲ ಕಾಲ ಘಟನಾ ಸ್ಥಳದಲ್ಲಿ ಕೋಲಾಹಲ ಉಂಟಾಗಿತ್ತು. ಈ ಘಟನೆಯ ವಿಡಿಯೋ ವೈರಲ್​ ಆಗಿದ್ದು, ವಿಡಿಯೋದಲ್ಲಿ ಪಕ್ಕದಲ್ಲೇ ಇದ್ದ ಕಸದ ಬುಟ್ಟಿಯನ್ನು ಎತ್ತಕೊಂಡು ಹೊಡೆಯಲು ಮುಂದಾಗಿದ್ದು, ಫೋಟೊಗ್ರಾಫರ್​ಗಳಿಗೆ ಬೆದರಿಕೆ ಹಾಕಿದ್ದಾರೆ.

ಇದು ಅತೀರೇಖ ಎಂದ ನೆಟ್ಟಿಗರು

ನಟಿ ತಮನ್ನಾ ಭಾಟಿಯ ಬೌನ್ಸರ್​ಗಳ ಗೂಂಡಾ ವರ್ತನೆಯ ವಿಡಿಯೋ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗಿದ್ದು, ನೋಡುಗರು ಮಿಶ್ರ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ಕೆಲವರು ನಟಿಗೆ ಏನೂ ತೊಂದರೆಯಾಗದಂತೆ ನೋಡಿಕೊಳ್ಳುವುದು ಬೌನ್ಸರ್​ಗಳ ಕರ್ತವ್ಯ. ನಟಿಯನ್ನು ರಕ್ಷಿಸಲು ಆತ ಹಾಗೆ ವರ್ತಿಸಿರಬಹುದು ಎಂದಿದ್ದರೆ, ಇನ್ನೂ ಕೆಲವರು ತಮನ್ನಾ ಬೌನ್ಸರ್​ಗಳ ವರ್ತನೆ ಅತೀರೇಖ ಎಂದು ಕಮೆಂಟ್​ ಮಾಡಿದ್ದಾರೆ.