ಆದಿಪುರುಷ್ ಹವಾ: ಬೆಂಗಳೂರಿನಲ್ಲಿ ಕ್ರಾಂತಿ, ವಾರಿಸು, ಪಠಾಣ್ ದಾಖಲೆ ಉಡೀಸ್!

ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಎಲ್ಲೆ ನೋಡಿದರೂ ಒಂದೇ ಚಿತ್ರದ ಜಪ. ಯಾವ ಸಿನಿಮಾ ವೆಬ್ ತಾಣ, ಫೇಸ್‌ಬುಕ್, ಟ್ವಿಟರ್ ನೋಡಿದ್ರೂ ಬರೀ ಆದಿಪುರುಷ್ ಕುರಿತ ಸುದ್ದಿಗಳೇ ಕಂಡು ಬರುತ್ತಿವೆ. ಸಿನಿ ರಸಿಕರೂ ಸಹ ಆದಿಪುರುಷ್ ಚಿತ್ರದ ಬಗ್ಗೆಯೇ ಚರ್ಚೆಗಳನ್ನು ನಡೆಸುತ್ತಿದ್ದಾರೆ.

ಮೂಲತಃ ಹಿಂದಿ ಚಿತ್ರವಾಗಿರುವ ಆದಿಪುರುಷ್ ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿಯೂ ತೆರೆಗೆ ಬರಲಿದ್ದು, ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಗೊಳ್ಳುತ್ತಿದೆ. ಈ ಹಿಂದೆ ತಾನ್ಹಾಜಿ ರೀತಿಯ ಬಿಗ್ಗೆಸ್ಟ್ ಬ್ಲಾಕ್‌ಬಸ್ಟರ್ ಚಿತ್ರವನ್ನು ನಿರ್ದೇಶಿಸಿದ್ದ ಓಂ ರಾವತ್ ನಿರ್ದೇಶನ ಈ ಚಿತ್ರಕ್ಕಿದ್ದು, ಸಾಹೋ ಹಾಗೂ ರಾಧೆ ಶ್ಯಾಮ್ ಚಿತ್ರಗಳ ಮೂಲಕ ಸೋಲನ್ನು ಕಂಡಿರುವ ಪ್ರಭಾಸ್ ಈ ಚಿತ್ರದ ಮೂಲಕ ಕಮ್‌ಬ್ಯಾಕ್ ಮಾಡುವ ನಿರೀಕ್ಷೆ ಹೆಚ್ಚಿದೆ.

ಇನ್ನು ಮೊದಲಿಗೆ ಕಳಪೆ ವಿಎಫ್ಎಕ್ಸ್ ಕಾರಣಕ್ಕೆ ಹೀನಾಯವಾಗಿ ಟ್ರೋಲ್ ಆಗಿದ್ದ ಆದಿಪುರುಷ್ ಹಾಡುಗಳು ಹಾಗೂ ಟ್ರೈಲರ್ ಬಿಡುಗಡೆಯಾದ ಬಳಿಕ ಸಿನಿ ರಸಿಕರಿಂದ ಮೆಚ್ಚುಗೆ ಗಿಟ್ಟಿಸಿಕೊಂಡು ನಿರೀಕ್ಷೆ ಹುಟ್ಟುಹಾಕಲು ಆರಂಭಿಸಿತು. ಚಿತ್ರ ನಾಳೆ ( ಜೂನ್ 16 ) ವಿಶ್ವದಾದ್ಯಂತ ಎಲ್ಲಾ ಐದು ಭಾಷೆಗಳಲ್ಲಿಯೂ ತೆರೆಗೆ ಬರುತ್ತಿದ್ದು, ಟಿಕೆಟ್ ಬುಕಿಂಗ್ ಕಳೆದ ಭಾನುವಾರದಿಂದಲೇ ಆರಂಭಗೊಂಡಿತ್ತು.

ಬುಕ್ ಮೈ ಶೋ ಅಪ್ಲಿಕೇಶನ್‌ನಲ್ಲಿ ಈಗಾಗಲೇ ಚಿತ್ರದ ಇಂಟರೆಸ್ಟ್ ಇಂದು ಮಿಲಿಯನ್ ದಾಟಿದ್ದು, ಎಲ್ಲೆಡೆ ಭರ್ಜರಿ ಬುಕಿಂಗ್ ನಡೆಯುತ್ತಿದೆ. ಇನ್ನು ಎಲ್ಲಾ ಭಾಷೆಗಳ ಚಿತ್ರಗಳನ್ನು ವೀಕ್ಷಿಸುವ ಸಿನಿ ರಸಿಕರು ಇರುವ ಬೆಂಗಳೂರಿನಲ್ಲಿಯೂ ಆದಿಪುರುಷ್ ಅಬ್ಬರ ಜೋರಾಗಿದೆ.

ಕನ್ನಡ ಮಾತ್ರವಲ್ಲದೇ ತೆಲುಗು ಹಾಗೂ ಹಿಂದಿ ಅವತರಣಿಕೆಗಳ ಹೆಚ್ಚೆಚ್ಚು ಶೋಗಳನ್ನು ಬೆಂಗಳೂರಿನಲ್ಲಿ ಆಯೋಜಿಸಲಾಗಿದೆ. ಮೊದಲಿಗೆ ಕನ್ನಡಕ್ಕಿಂತ ಮುನ್ನ ತೆಲುಗು ಹಾಗೂ ಹಿಂದಿ ಭಾಷೆಯ ಬುಕಿಂಗ್ ತೆರೆಯಲಾಗಿತ್ತು. ಬಳಿಕ ಈಗ ಕನ್ನಡ ಅವತರಣಿಕೆಯ ಬುಕಿಂಗ್ ಸಹ ಆರಂಭಗೊಂಡಿದ್ದು, ಈ ಮೂಲಕ ಬೆಂಗಳೂರಿನಲ್ಲಿ ಆದಿಪುರುಷ್ ದಾಖಲೆ ಬರೆದಿದೆ.

ಈ ವರ್ಷ ಬಿಡುಗಡೆಗೊಂಡ ಚಿತ್ರಗಳ ಪೈಕಿ ಬೆಂಗಳೂರಿನಲ್ಲಿ ಬಿಡುಗಡೆ ದಿನ ಅತಿಹೆಚ್ಚು ಪ್ರದರ್ಶನಗಳನ್ನು ಪಡೆದುಕೊಂಡ ಚಿತ್ರ ಎಂಬ ದಾಖಲೆಯನ್ನು ಆದಿಪುರುಷ್ ಬರೆದಿದೆ. ಈ ಮೂಲಕ ಆದಿಪುರುಷ್ ಪಠಾಣ್ ದಾಖಲೆಯನ್ನು ಮುರಿದುಹಾಕಿದೆ. ಚಿತ್ರ ನಾಳೆ ಬಿಡುಗಡೆಯಾಗಲಿದ್ದು, ಇಂದು ( ಜೂನ್ 15 ) ಬೆಳಗ್ಗೆಗೆ 893 ಶೋಗಳು ಬಿಡುಗಡೆಗೆ ದಿನದಂದು ಆಯೊಜನೆಗೊಂಡಿವೆ. ಈ ಸಂಖ್ಯೆ ನಾಳೆ ಮತ್ತಷ್ಟು ಹೆಚ್ಚಾಗಲಿದ್ದು, ಈ ವರ್ಷ ಬೆಂಗಳೂರಿನಲ್ಲಿ ಬಿಡುಗಡೆ ದಿನ ಅತಿಹೆಚ್ಚು ಪ್ರದರ್ಶನಗಳನ್ನು ಪಡೆದುಕೊಂಡಿರುವ ಚಿತ್ರಗಳ ಪಟ್ಟಿ ಈ ಕೆಳಕಂಡಂತಿದೆ..

1. ಆದಿಪುರುಷ್ - 893* ಪ್ರದರ್ಶನಗಳು ( ಇನ್ನೂ ಹೆಚ್ಚಿನ ಪ್ರದರ್ಶನಗಳು ಸೇರ್ಪಡೆಗೊಳ್ಳಲಿವೆ )

2. ಪಠಾಣ್ - 821 ಪ್ರದರ್ಶನಗಳು

3. ವಾರಿಸು - 757 ಪ್ರದರ್ಶನಗಳು

4. ಪೊನ್ನಿಯಿನ್ ಸೆಲ್ವನ್ 2 - 690 ಪ್ರದರ್ಶನಗಳು

5. ಕ್ರಾಂತಿ - 680 ಪ್ರದರ್ಶನಗಳು

6. ಕಬ್ಜ - 597 ಪ್ರದರ್ಶನಗಳು

7. ತುನಿವು - 568 ಪ್ರದರ್ಶನಗಳು

8. ಸ್ಪೈಡರ್ ಮ್ಯಾನ್ - 516 ಪ್ರದರ್ಶನಗಳು

9. ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್ - 507 ಪ್ರದರ್ಶನಗಳು

10. ತೂ ಜೂತಿ ಮೈನ್ ಮಕ್ಕರ್ - 496 ಪ್ರದರ್ಶನಗಳು