ಆದಿಪುರುಷ್ ಕಲೆಕ್ಷನ್ ಸುಳ್ಳು; ಚಿತ್ರತಂಡ ಹೇಳಿದ್ದಕ್ಕೂ, ನಿಜವಾದ ಕಲೆಕ್ಷನ್‌ಗೂ ಭಾರೀ ವ್ಯತ್ಯಾಸ!

ಆದಿಪುರುಷ್.. ಪ್ರಸ್ತುತ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿರುವ ಈ ಚಿತ್ರ ಹೊಗಳಿಕೆಗಳಿಗಿಂತ ಹೆಚ್ಚಾಗಿ ಟೀಕೆ ಹಾಗೂ ಟ್ರೋಲ್‌ಗಳಿಂದಲೇ ಹೆಚ್ಚು ಸದ್ದನ್ನು ಮಾಡಿತು. ಹೌದು, ಭಾರತದ ಬಹುತೇಕ ಎಲ್ಲಾ ಟ್ರೋಲಿಗರು ಆದಿಪುರುಷ್ ಚಿತ್ರವನ್ನು ಟ್ರೋಲ್ ಮಾಡಿದ್ದಾರೆ. ರಾಮಾಯಣ ಕಥೆ ಆಧಾರಿತ ಸಿನಿಮಾವೆಂದು ಬಂದಿದ್ದ ಆದಿಪುರುಷ್ ಚಿತ್ರವನ್ನು ಜನರು ಒಪ್ಪಿಕೊಳ್ಳಲೇ ಇಲ್ಲ.

ಚಿತ್ರದ ಕುರಿತಾದ ವಿಮರ್ಶೆಗಳನ್ನು ಓದಲು ಶುರು ಮಾಡಿದರೆ ಹತ್ತರ ಮಧ್ಯದಲ್ಲಿ ಒಂದು ಕಾಮೆಂಟ್ ಮಾತ್ರ ಚಿತ್ರ ಚೆನ್ನಾಗಿದೆ ಎಂದು ಕಂಡುಬರುವಷ್ಟು ಹೀನಾಯ ವಿಮರ್ಶೆಗಳನ್ನು ಆದಿಪುರುಷ್ ಪಡೆದುಕೊಂಡಿತು. ಇನ್ನು ಬಿಡುಗಡೆಗೂ ಮುಂಚೆಯಿಂದಲೂ ತೀವ್ರ ನೆಗೆಟಿವ್ ವಿಮರ್ಶೆಗಳನ್ನು ಟೀಸರ್ ಮೂಲಕ ಪಡೆದುಕೊಂಡಿದ್ದ ಆದಿಪುರುಷ್ ಚಿತ್ರದಲ್ಲಿ ರಾಮನ ಪಾತ್ರದಲ್ಲಿ ಪ್ರಭಾಸ್ ನಟಿಸಿದ್ದರೆ, ಕೃತಿ ಸೆನನ್ ಸೀತೆಯ ಪಾತ್ರದಲ್ಲಿ ಅಭಿನಯಿಸಿದ್ದಾರೆ ಹಾಗೂ ರಾವಣನ ಪಾತ್ರದಲ್ಲಿ ಸೈಫ್ ಅಲಿ ಖಾನ್ ಕಾಣಿಸಿಕೊಂಡಿದ್ದಾರೆ.

ಇನ್ನು ಜೂನ್ 16ರಂದು ತೆರೆಗೆ ಬಂದ ಆದಿಪುರುಷ್ ಚಿತ್ರ ನೋಡಿ ಹೊರಬಂದ ಸಿನಿ ರಸಿಕರು ಇದು ರಾಮಾಯಣ ಅಲ್ಲ, ಮಾಡರ್ನ್ ಅಪ್‌ಡೇಟೆಡ್ ರಾಮಾಯಣ ಎಂದು ಅಸಮಾಧಾನ ಹೊರಹಾಕಿದ್ದರು. ಚಿತ್ರದ ಮೊದಲ ಪ್ರದರ್ಶನ ಮುಗಿಯುತ್ತಿದ್ದಂತೆಯೇ ಚಿತ್ರದ ವಿರುದ್ಧ ದೊಡ್ಡ ಮಟ್ಟದಲ್ಲಿ ನೆಗೆಟಿವ್ ವಿಮರ್ಶೆಗಳು ಕೇಳಿಬಂದವು.

ಚಿತ್ರದಲ್ಲಿ ಎಲ್ಲಾ ಪಾತ್ರಗಳ ವಸ್ತ್ರದ ವಿಧಾನ ರಾಮಾಯಣಕ್ಕೆ ಹೋಲಿಕೆಯಾಗ್ತಿಲ್ಲ, ಪಾತ್ರಗಳ ಲುಕ್ ಅನ್ನೂ ಸಹ ದೊಡ್ಡ ಮಟ್ಟದಲ್ಲಿ ಬದಲಿಸಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು. ಅಲ್ಲದೇ ಹನುಮಂತನ ಪಾತ್ರದಲ್ಲೂ ಸಹ ಬದಲಾವಣೆ ಇದೆ ಎಂದು ಆರೋಪಿಸಿದ್ದ ಸಿನಿ ರಸಿಕರು ಹನುಮಂತ ಹೇಳುವ ಬಹುತೇಕ ಡೈಲಾಗ್‌ಗಳು ಈಗಿನ ಕಾಲದಲ್ಲಿ ಮಾತನಾಡುವ ಹಾಗೆ ಇದೆ, ಈ ಸಂಭಾಷಣೆಗಳನ್ನು ಕೇಳಿದಾಗ ಇದೊಂದು ಪೌರಾಣಿಕ ಚಿತ್ರ ಎನಿಸುವುದೇ ಇಲ್ಲ ಎಂದು ಕಿಡಿಕಾರಿದ್ದರು.

ಹೀಗೆ ಕಂಟೆಂಟ್ ವಿಷಯವಾಗಿ ಹೀನಾಯವಾಗಿ ಟ್ರೋಲ್ ಆದ ಆದಿಪುರುಷ್ ಕಲೆಕ್ಷನ್‌ನಲ್ಲಿಯೂ ಸಹ ಅಷ್ಟೇನೂ ಸದ್ದು ಮಾಡುವಲ್ಲಿ ಯಶಸ್ವಿಯಾಗಲಿಲ್ಲ. ಚಿತ್ರತಂಡ ಹತ್ತು ದಿನಗಳವರೆಗೆ ಚಿತ್ರ ಎಷ್ಟು ಗಳಿಕೆ ಮಾಡಿದೆ ಎಂಬುದನ್ನು ಚಿತ್ರತಂಡ ಅಧಿಕೃತವಾಗಿ ಪ್ರಕಟಿಸಿದೆ. ಅಲ್ಲದೇ ದಿನನಿತ್ಯ ಎಷ್ಟೆಷ್ಟು ಗಳಿಕೆಯನ್ನು ಸಿನಿಮಾ ಮಾಡಿದೆ ಎಂಬುದನ್ನೂ ಸಹ ಚಿತ್ರತಂಡ ವಿಶೇಷ ಪೋಸ್ಟರ್ ಬಿಡುಗಡೆ ಮಾಡುವ ಮೂಲಕ ಹಂಚಿಕೊಳ್ಳುತ್ತಾ ಬಂದಿದೆ.

ಆದರೆ ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ಮಾತ್ರ ಈ ಕಲೆಕ್ಷನ್ ವರದಿಯನ್ನು ಸುಳ್ಳು ಎಂದು ತಿಳಿಸಿದ್ದು, ಆದಿಪುರುಷ್ ಚಿತ್ರತಂಡ ತಪ್ಪಾದ ವರದಿಯನ್ನು ನೀಡಿದೆ ಎಂದು ಆರೋಪಿಸಿದ್ದಾರೆ. ಹಾಗಿದ್ದರೆ ಆದಿಪುರುಷ್ ಚಿತ್ರತಂಡ ನೀಡಿರುವ ಕಲೆಕ್ಷನ್ ವರದಿ ಏನು ಹಾಗೂ ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ನೀಡಿರುವ ಬಾಕ್ಸ್ ಆಫೀಸ್ ಕಲೆಕ್ಷನ್ ವರದಿ ಏನು ಎಂಬ ಮಾಹಿತಿ ಈ ಕೆಳಕಂಡಂತಿದೆ..

ಆದಿಪುರುಷ್ ಚಿತ್ರತಂಡ ಚಿತ್ರ ಹತ್ತು ದಿನಗಳಲ್ಲಿ ವಿಶ್ವದಾದ್ಯಂತ 450 ಕೋಟಿ ಗಳಿಕೆ ಮಾಡಿದೆ ಎಂದು ಪೋಸ್ಟರ್ ಬಿಡುಗಡೆ ಮಾಡಿ ತಿಳಿಸಿದ್ದರೆ, ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ಚಿತ್ರ ಮೊದಲ ಹತ್ತು ದಿನಗಳಲ್ಲಿ ವಿಶ್ವದಾದ್ಯಂತ ಗಳಿಸಿದ್ದು ಕೇವಲ 350 ಕೋಟಿ ರೂಪಾಯಿ ಗ್ರಾಸ್ ಕಲೆಕ್ಷನ್ ಅನ್ನು ಮಾತ್ರ ಎಂದು ತಿಳಿಸಿದ್ದಾರೆ. ಕೇವಲ ಒಂದೋ ಎರಡೋ ವೆಬ್ ತಾಣಗಳು ಮಾತ್ರವಲ್ಲದೇ ಹತ್ತಾರು ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ಇದೇ ರೀತಿಯ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ತೆಲುಗು ಚಿತ್ರರಂಗದ ಖ್ಯಾತ ಬಾಕ್ಸ್ ಆಫೀಸ್ ವರದಿಗಳ ವೆಬ್ ತಾಣ ಟ್ರ್ಯಾಕ್ ಟಾಲಿವುಡ್ ಈ ಕುರಿತು ವಿಶೇಷ ಸುದ್ದಿಯೊಂದನ್ನೇ ಪ್ರಕಟಿಸಿದ್ದು ಚಿತ್ರ ಪ್ರಕಟಿಸಿರುವ ಕಲೆಕ್ಷನ್ ವರದಿಗೂ ಹಾಗೂ ಚಿತ್ರ ಮಾಡಿರುವ ಅಧಿಕೃತ ಕಲೆಕ್ಷನ್‌ಗೂ 100 ಕೋಟಿ ವ್ಯತ್ಯಾಸವಿದೆ ಎಂದು ಬರೆದುಕೊಂಡಿದೆ. ಈ ಮೂಲಕ ಆದಿಪುರುಷ್ ಚಿತ್ರತಂಡದ ವಿರುದ್ಧ ಮತ್ತೊಂದು ಕಪ್ಪುಚುಕ್ಕೆ ಹುಟ್ಟುಕೊಂಡಂತಾಗಿದೆ.