ನೂರು ಕೋಟಿ ದಾಟಿದ ಅಗ್ನಿಪಥ್ ಚಿತ್ರದ ಗಳಿಕೆ

ಬಾಲಿವುಡ್ ಚಿತ್ರ 'ಅಗ್ನಿಪಥ್' ಬಿಡುಗಡೆಯಾದ ಎರಡನೇ ವಾರಾಂತ್ಯಕ್ಕೆ ಬಾಕ್ಸ್ ಆಫೀಸ್ ನಲ್ಲಿ ಭರ್ಜರಿ ಎನ್ನಬಹುದಾದ ರು. 100 ಕೋಟಿ ಗಳಿಸಿದೆ. 2012ರಲ್ಲಿ ರು. 100 ಕೋಟಿ ಗಡಿ ದಾಟಿದ ಮೊಟ್ಟಮೊದಲ ಚಿತ್ರವಾಗಿ ಹೊರಹೊಮ್ಮಿರುವ ಅಗ್ನಿಪಥ್ ಚಿತ್ರ, ಹೌಸ್ ಫುಲ್ ಪ್ರದರ್ಶನದ ಮೂಲಕ ಯಶಸ್ವೀ ಪ್ರಯಾಣ ಮುಂದುವರಿಸಿದೆ.

ಬಿಡುಗಡೆಯಾದ ಮೊದಲ ದಿನವೇ ರು. 23 ಕೋಟಿ ಗಳಿಸಿ ಒಳ್ಳೆಯ ಓಪನಿಂಗ್ ಮೆರೆದಿತ್ತು. ಮೊದಲ ವಾರ ರು. 91.05 ಕೋಟಿ ಗಳಿಸಿದ ಚಿತ್ರ ನಂತರ ಅದ್ಯಾಕೋ ಕುಂಟುತ್ತಾ ಸಾಗಿತ್ತು. ಗಳಿಕೆ ಮತ್ತೆ ಮೇಲೇರಿ ಎರಡನೇ ವಾರ ಮುಗಿಯುವ ಹೊತ್ತಿಗೆ ದೊಡ್ಡಮೊತ್ತ ರು. 106.3 ಕೋಟಿ ಗಳಿಸಿ ಚಿತ್ರತಂಡ ನಗೆಬೀರಲು ಕಾರಣವಾಗಿದೆ.

ಆದರೆ ಅಗ್ನಿಪಥ್ ನಂತರ ಬಿಡುಗಡೆಯಾದ 'ಗಲಿ ಗಲಿ ಚೋರ್ ಹೈ' ಚಿತ್ರದ ಮೊದಲ ಮೂರು ದಿನದ ಗಳಿಕೆ ಶೋಚನೀಯ ಸ್ಥಿತಿಯಲ್ಲಿದೆ. ಅಕ್ಷಯ್ ಖನ್ನಾ, ಶ್ರೀಯಾ ಸರನ್ ಹಾಗೂ ಮುಗ್ಧಾ ಗೋಡ್ಸೆ ಅಭಿನಯದ ಈ ಚಿತ್ರ ಓಪನಿಂಗ್ ಕಂಡುಕೊಳ್ಳಲು ವಿಫಲವಾಗಿದೆ. ಈ 'ಲೋ ಬಜೆಟ್' ಚಿತ್ರ ಮೊದಲ 3 ದಿನದಲ್ಲಿ ಕೇವಲ ರು. 3.25 ಕೋಟಿ ಗಳಿಸಿ ಪ್ರದರ್ಶನ ಕಾಣುತ್ತಿದೆ. ಮುಂದೆ ಚೇತರಿಸಿಕೊಳ್ಳಬಹುದೇ ಎಂಬ ಪ್ರಶ್ನೆ ಈಗ ಎಲ್ಲರಲ್ಲಿದೆ. (ಏಜೆನ್ಸೀಸ್)