ಆಲಿಯಾ ಭಟ್-ರಣಬೀರ್ ಕಪೂರ್ ಸಂಸಾರದಲ್ಲಿ ಬಿರುಕು ? 7 ಸೆಕೆಂಡ್ ವಿಡಿಯೋ ಬಗ್ಗೆ ಮೌನ ಮುರಿದ ನಟಿ

ಬಣ್ಣದ ಲೋಕ ಅಂದಮೇಲೆ ಅಲ್ಲಿ ಹತ್ತಾರು ಕಥೆಗಳು ಹುಟ್ಟಿಕೊಳ್ಳುವುದು ಸಹಜ. ಇಂದು ಹಸಿರಾಗಿರುವ ಸಂಬಂಧ ನಾಳೆ ಒಣಗಿ ಹೋಗಬಹುದು ಎಂಬ ಆತಂಕ ಸದಾ ಇದ್ದೇ ಇರುತ್ತದೆ. ಅದರಲ್ಲೂ ಬಾಲಿವುಡ್‌ನ ಸ್ಟಾರ್ ಜೋಡಿಗಳ ಬಗ್ಗೆ ಗಾಸಿಪ್ ಹರಡಲು ಒಂದು ಸಣ್ಣ ಸುಳಿವು ಸಿಕ್ಕರೆ ಸಾಕು. ಇಡೀ ಸೋಷಿಯಲ್ ಮೀಡಿಯಾ ಅಖಾಡವಾಗಿ ಬದಲಾಗುತ್ತದೆ.

ಸದ್ಯ ಬಿ-ಟೌನ್‌ನ ಅತೀ ದೊಡ್ಡ ಚರ್ಚೆಯ ವಿಷಯವೆಂದರೆ ಅದು ಈ ಜೋಡಿಯ ನಡುವಿನ ಬಾಂಧವ್ಯ. ಎಲ್ಲವೂ ಸರಿಯಾಗಿಯೇ ಇದೆ ಎಂದು ಅಂದುಕೊಳ್ಳುವಷ್ಟರಲ್ಲಿ ಏನೋ ಒಂದು ಎಡವಟ್ಟಾಗುತ್ತದೆ. ಕ್ಯಾಮರಾ ಕಣ್ಣುಗಳು ಈ ದಂಪತಿಯ ಪ್ರತಿಯೊಂದು ನಡೆಯನ್ನು ಹದ್ದಿನ ಕಣ್ಣಿನಿಂದ ನೋಡುತ್ತಿವೆ. ಅಭಿಮಾನಿಗಳಿಗೂ ಕೂಡ ತಮ್ಮ ನೆಚ್ಚಿನ ನಟ-ನಟಿಯರ ಖಾಸಗಿ ಜೀವನದಲ್ಲಿ ಏನಾಗುತ್ತಿದೆ ಎಂಬ ಕುತೂಹಲ ಇದ್ದೇ ಇರುತ್ತದೆ.

ಹಲವು ದಿನಗಳಿಂದ ಇವರಿಬ್ಬರ ನಡುವೆ ಎಲ್ಲವೂ ಸರಿಯಿಲ್ಲ ಎಂಬ ಮಾತುಗಳು ಕೇಳಿಬರುತ್ತಿವೆ. ಸಾರ್ವಜನಿಕವಾಗಿ ಇವರು ಕಾಣಿಸಿಕೊಂಡಾಗಲೆಲ್ಲಾ ಒಂದಲ್ಲ ಒಂದು ವಿಷಯ ದೊಡ್ಡದಾಗಿ ಚರ್ಚೆಯಾಗುತ್ತಿದೆ. ನೆಟ್ಟಿಗರು ಕೂಡ ಈ ಬಗ್ಗೆ ಸಾವಿರಾರು ಕಾಮೆಂಟ್‌ಗಳನ್ನು ಮಾಡುತ್ತಿದ್ದಾರೆ.ರಣಬೀರ್ ಮತ್ತು ಆಲಿಯಾ ನಡುವೆ ನಡುವೆ ನಿಜವಾಗಿಯೂ ವಿರಸ ಮೂಡಿದೆಯೇ? ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ.

ವದಂತಿಗಳಿಗೆ ಬ್ರೇಕ್ ಹಾಕಿದ 'ರಾಜಿ' ನಟಿ

ಇಷ್ಟೆಲ್ಲಾ ಸದ್ದು ಗದ್ದಲ ನಡೆಯುತ್ತಿದ್ದರೂ ಈ ಜೋಡಿ ಮಾತ್ರ ಸೌಂಡ್ ಮಾಡುತ್ತಿರಲಿಲ್ಲ. ಆದರೆ ಈಗ ಕಾಲ ಕೂಡಿ ಬಂದಿದೆ. ಸತತವಾಗಿ ಕೇಳಿಬರುತ್ತಿದ್ದ ಟೀಕೆಗಳಿಗೆ ಹಾಗೂ ಸಂಸಾರದಲ್ಲಿ ಬಿರುಕು ಮೂಡಿದೆ ಎನ್ನುವವರಿಗೆ ಆಲಿಯಾ ಭಟ್ ಖಡಕ್ ಉತ್ತರ ನೀಡಿದ್ದಾರೆ.

ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, ಜನರ ಊಹೆಗಳು ಎಷ್ಟು ಹಾಸ್ಯಾಸ್ಪದವಾಗಿರುತ್ತವೆ ಎಂಬುದನ್ನು ಬಿಚ್ಚಿಟ್ಟಿದ್ದಾರೆ. ಪತಿ ರಣಬೀರ್ ಕಪೂರ್ ಮತ್ತು ತಮ್ಮ ನಡುವಿನ ಸಂಬಂಧದ ಬಗ್ಗೆ ಕೇಳಿಬರುತ್ತಿರುವ 'ಶಬ್ದ' ಅಥವಾ ವದಂತಿಗಳ ಬಗ್ಗೆ ಆಲಿಯಾ ಬೇಸರ ವ್ಯಕ್ತಪಡಿಸಿದ್ದಾರೆ. "ನನ್ನ ಜೀವನದ ಸತ್ಯಾಸತ್ಯತೆ ನನಗೆ ಗೊತ್ತು" ಎನ್ನುವ ಮೂಲಕ ಅವರು ಗಾಳಿ ಸುದ್ದಿಗೆ ತೆರೆ ಎಳೆಯಲು ಪ್ರಯತ್ನಿಸಿದ್ದಾರೆ.

"ಕೇವಲ 7 ಸೆಕೆಂಡ್ ನೋಡಿ ತೀರ್ಪು ನೀಡಬೇಡಿ"...

ತಮ್ಮ ವೈವಾಹಿಕ ಜೀವನದ ಬಗ್ಗೆ ಹರಿದಾಡುತ್ತಿರುವ ನೆಗೆಟಿವ್ ಕಮೆಂಟ್‌ಗಳ ಬಗ್ಗೆ ಆಲಿಯಾ ಮಾರ್ಮಿಕವಾಗಿ ಮಾತನಾಡಿದ್ದಾರೆ. "ಜನರು ಕೇವಲ 7 ಸೆಕೆಂಡ್‌ನ ವಿಡಿಯೋ ತುಣುಕನ್ನು ನೋಡುತ್ತಾರೆ. ಆ ಕೇವಲ ಏಳು ಸೆಕೆಂಡ್ ನೋಡಿ ನಮ್ಮ ಇಡೀ ಜೀವನದ ಬಗ್ಗೆ ತೀರ್ಪು ನೀಡುತ್ತಾರೆ. ಅದು ಎಷ್ಟು ಸರಿ?" ಎಂದು ಅವರು ಪ್ರಶ್ನೆ ಮಾಡಿದ್ದಾರೆ.

ಒಂದು ಸಣ್ಣ ವಿಡಿಯೋ ಕ್ಲಿಪ್ ಇಟ್ಟುಕೊಂಡು ನಮ್ಮ ನಡುವೆ ಜಗಳವಾಗಿದೆ ಎಂದು ಬಿಂಬಿಸುವುದು ತಪ್ಪು ಎಂಬುದು ಆಲಿಯಾ ವಾದ. ಸಮಾಜದಲ್ಲಿ ವ್ಯಕ್ತಿಯೊಬ್ಬರ ವ್ಯಕ್ತಿತ್ವವನ್ನು ಒಂದು ಸಣ್ಣ ಘಟನೆಯಿಂದ ಅಳೆಯುವುದು ಎಷ್ಟು ಅಪಾಯಕಾರಿ ಎಂಬುದನ್ನು ಅವರು ಇಲ್ಲಿ ವಿವರಿಸಿದ್ದಾರೆ. ರಣಬೀರ್ ಅವರ ವರ್ತನೆಯ ಬಗ್ಗೆ ಟೀಕೆ ಮಾಡುವವರಿಗೆ ಆಲಿಯಾ ಕೊಟ್ಟ ಈ ಉತ್ತರ ಈಗ ವೈರಲ್ ಆಗುತ್ತಿದೆ.

ಟೀಕಾಕಾರರ ಬಾಯಿ ಮುಚ್ಚಿಸಿದ ಪತ್ನಿ

ರಣಬೀರ್ ಕಪೂರ್ ಹಲವು ಬಾರಿ ಸಾರ್ವಜನಿಕವಾಗಿ ಆಲಿಯಾ ಬಗ್ಗೆ ಆಡಿದ ಮಾತುಗಳು ಟೀಕೆಗೆ ಗುರಿಯಾಗಿದ್ದವು. ಆಲಿಯಾ ಲಿಪ್‌ಸ್ಟಿಕ್ ಹಾಕುವ ವಿಷಯ ಅಥವಾ ಅವರ ಮಾತನಾಡುವ ಶೈಲಿಯ ಬಗ್ಗೆ ರಣಬೀರ್ ಕಾಲೆಳೆಯುತ್ತಿದ್ದರು. ಇದನ್ನು ನೋಡಿದ ಜನ "ರಣಬೀರ್ ಕಪೂರ್ ಒಬ್ಬ ಕೆಟ್ಟ ಪತಿ ಎಂದು ಹಣೆಪಟ್ಟಿ ಹಚ್ಚಿದ್ದರು.

ಆದರೆ ಆಲಿಯಾ ಮಾತ್ರ ತಮ್ಮ ಪತಿಯ ಬೆನ್ನಿಗೆ ನಿಂತಿದ್ದಾರೆ. ಹೊರಗಿನ ಜಗತ್ತಿಗೆ ಕಾಣುವುದು ಕೇವಲ ಒಂದು ಭಾಗ ಮಾತ್ರ. ನಮ್ಮ ನಡುವಿನ ಪ್ರೀತಿ ಮತ್ತು ಗೌರವ ಯಾರಿಗೂ ಕಾಣುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಒಟ್ಟಿನಲ್ಲಿ ಸಂಸಾರದಲ್ಲಿ ಯಾವುದೇ ಬಿರುಕು ಇಲ್ಲ ಎಂದು ಹೇಳುವ ಮೂಲಕ ಆಲಿಯಾ ಅಭಿಮಾನಿಗಳಿಗೆ ಸಮಾಧಾನ ತಂದಿದ್ದಾರೆ.