'ಬಚ್ಪನ್ ಕಾ ಪ್ಯಾರ್‌' ಖ್ಯಾತಿಯ ಸಹದೇವ್‌ಗೆ ಅಪಘಾತ!

ಟ್ವೀಟ್ ಮಾಡಿ ಸಹದೇವ್ ಸ್ಥಿತಿ ಬಗ್ಗೆ ತಿಳಿಸಿದ ಬಾದ್ ಶಾ!

ಟ್ವೀಟ್ ಮಾಡುವ​ ಮೂಲಕ ಅಭಿಮಾನಿಗಳಿಗೆ ಸಹದೇವ್ ಆರೋಗ್ಯದ ಬಗ್ಗೆ ಮಾಹಿತಿ ನೀಡಿದ್ದಾರೆ ಬಾದ್​ ಶಾ. "ಸಹದೇವ್​ ಕುಟುಂಬದೊಂದಿಗೆ ನಾನು ಸಂಪರ್ಕದಲ್ಲಿದ್ದೇನೆ. ಅವರಿಗೆ ಎಲ್ಲಾ ರೀತಿಯ ನೆರವನ್ನು ನೀಡುತ್ತೇನೆ. ನಿಮ್ಮೆಲ್ಲರ ಪ್ರಾರ್ಥನೆಯೂ ಬೇಕು" ಎಂದು ಟ್ವಿಟ್ಟರ್‌ನಲ್ಲಿ ಬರೆದುಕೊಂಡಿದ್ದಾರೆ. ಬಾದ್‌ ಶಾ ಈ ರೀತಿ ಟ್ವೀಟ್‌ ಮಾಡುತ್ತಲೇ ಸಾಕಷ್ಟು ಮಂದಿ ಸಹದೇವ್ ಆದಷ್ಟು ಬೇಗ ಗುಣಮುಖರಾಗಲಿ ಎಂದು ಕಮೆಂಟ್ ಮಾಡಿದ್ದಾರೆ.

ಛತ್ತೀಸ್‌ಘಡದ ಮುಖ್ಯ ಮಂತ್ರಿಯಿಂದಲೇ ಮುತುವರ್ಜಿ!

ಇನ್ನು ಸಹದೇವ್‌ ಆಸ್ಪತ್ರೆಯಲ್ಲಿ ಇರುವ ವಿಚಾರ ತಿಳಿದು, ಛತ್ತೀಸ್‌ಘಡದ ಮುಖ್ಯಮಂತ್ರಿ ಭೂಪೇಶ್ ಬಗ್ಹೇಲ್ ಅವರು ಮುತುವರ್ಜಿ ವಹಿಸಿದ್ದಾರೆ. ಸಹದೇವ್‌ಗೆ ಉತ್ತಮ ಚಿಕಿತ್ಸೆ ನೀಡಲು ಆದೇಶ ಹೊರಡಿಸಿದ್ದಾರೆ. ಈ ಹಿಂದೆಯೂ ಈ ಬಾಲಕನ ಪ್ರತಿಭೆ ಮೆಚ್ಚಿ ಆತನಿಗೆ, ಸರ್ಕಾರದ ವತಿಯಿಂದ ಸನ್ಮಾನ ಮಾಡಲಾಗಿತ್ತು. ಈಗ ಹೆಚ್ಚಿನ ಚಿಕಿತ್ಸೆಗೂ ಸರ್ಕಾರ ಸ್ಪಂದಿಸುತ್ತಿದೆ.

'ಬಚ್​ಪನ್​ ಕಾ ಪ್ಯಾರ್' ಹಾಡಿನ ಮೂಲಕ ಗಮನ ಸೆಳೆದಿದ್ದ ಸಹದೇವ್!

2021ರ ಆರಂಭದಲ್ಲಿ 'ಬಚ್​ಪನ್​ ಕಾ ಪ್ಯಾರ್' ಎನ್ನುವ ಹಾಡು ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಅಂತೆಯೇ ಈ ಹಾಡು ಹಾಡಿದ ಸಹದೇವ್‌ ಕೂಡ ವೈರಲ್‌ ಆಗಿದ್ದ, 2019ರಲ್ಲಿ ಈ ಹಾಡನ್ನು ಶಾಲಾ ಕೊಠಡಿಯಲ್ಲಿ ಚಿತ್ರೀಕರಿಸಿರುವುದಾಗಿ ತಿಳಿದು ಬಂದಿದೆ. ಸಹದೇವ್ ಶಾಲಾ ಸಮವಸ್ತ್ರದಲ್ಲಿಯೇ ಈ ಹಾಡನ್ನು ಹಾಡಿದ್ದ. ಸಹದೇವ್‌ ಹಾಡಿದ ಪರಿ ಎಲ್ಲರ ಮನಸ್ಸು ಗೆದ್ದಿತ್ತು. ಹಾಗಾಗಿ ತನ್ನ ಪ್ರತಿಭೆಯಿಂದ ಸಹದೇವ್‌ ಬಾಲಿವುಡ್‌ ಮೆಟ್ಟಿಲು ಹತ್ತಲು ಸಾಧ್ಯವಾಗಿತ್ತು.

ಹೊಸ ಟ್ರೆಂಡ್‌ ಹುಟ್ಟು ಹಾಕಿದ್ದ ಸಹದೇವ್!

'ಬಚ್ಪನ್ ಕ ಪ್ಯಾರ್' ಹಾಡಿನಿಂದ ಸಹದೇವ್ ಇಡೀ ದೇಶದಲ್ಲಿ ಹೊಸ ಟ್ರೆಂಡ್​ ಕ್ರಿಯೇಟ್ ಮಾಡಿದ್ದ. ಛತ್ತೀಸ್​​ಘಡ ಮುಖ್ಯಮಂತ್ರಿಗಳು ಕೂಡ ಸಹದೇವ್​ನನ್ನು ಸನ್ಮಾನಿಸಿದ್ದರು. ಇದನ್ನು ಕಂಡ ಬಾಲಿವುಡ್‌ನ ಹೆಸರಾಂತ ರ್ಯಾಪರ್ ಸಿಂಗರ್​ ಬಾದ್​ ಶಾ ಸಹದೇವ್​ಗೆ ತಮ್ಮ ಹಾಡಿನಲ್ಲಿ ಆತನ 'ಬಚ್ಪನ್' ಹಾಡನ್ನು ಸೇರಿಸಿ, ಅದಕ್ಕೆ ಮತ್ತಷ್ಟು ಖ್ಯಾತಿ ಕೊಟ್ಟಿದ್ದರು. ಆ ಬಳಿಕ ಸಹದೇವ್ ಮತ್ತಷ್ಟು ಹೆಸರವಾಸಿ ಆಗಿದ್ದಾನೆ. ಬಾದ್‌ ಶಾ ಮಾಡಿದ ಹಾಡು ಕೂಡ ವೈರಲ್‌ ಆಗಿತ್ತು. ಸದ್ಯ ಆಸ್ಪತ್ರೆ ಸೇರಿರುವ ಸಹದೇವ್‌ ಆದಷ್ಟು ಬೇಗ ಗುಣಮುಖರಾಗಿ ಬರಲಿ ಎಂದು ಎಲ್ಲರೂ ಪ್ರಾರ್ಥನೆ ಮಾಡ್ತಿದ್ದಾರೆ.