ವಿಶ್ವದ ಅತಿ ಎತ್ತರದ ಮೊಬೈಲ್ ಥಿಯೇಟರ್‌ನಲ್ಲಿ ಬೆಲ್ ಬಾಟಮ್ ಪ್ರದರ್ಶನ

ಅದ್ಭುತ ಅನುಭವ ಎಂದ ಅಕ್ಷಯ್ ಕುಮಾರ್

ಲೇಹ್‌ನಲ್ಲಿರುವ ಮೊಬೈಲ್ ಥಿಯೇಟರ್ ಫೋಟೋ ಹಂಚಿಕೊಂಡಿರುವ ಅಕ್ಷಯ್ ಕುಮಾರ್, ''ಲಡಾಖ್‌ನ ಲೇಹ್‌ನಲ್ಲಿರುವ ವಿಶ್ವದ ಅತಿ ಎತ್ತರದ ಮೊಬೈಲ್ ಥಿಯೇಟರ್‌ನಲ್ಲಿ ಬೆಲ್‌ ಬಾಟಮ್ ಪ್ರದರ್ಶನ ಕಂಡಿದ್ದು ನನ್ನ ಹೃದಯ ತುಂಬಿದೆ ಬಂದಿದೆ ಹಾಗೂ ಹೆಮ್ಮೆ ಎನಿಸಿದೆ. 11562 ಅಡಿ ಎತ್ತರದಲ್ಲಿ 28 ಡಿಗ್ರಿ ಸೆಲ್ಸಿಯಸ್‌ನಲ್ಲಿ , ಥಿಯೇಟರ್ ಕಾರ್ಯನಿರ್ವಹಿಸುವುದು. ನಿಜಕ್ಕೂ ಇದು ಎಂತಹ ಅದ್ಭುತ'' ಎಂದು ಟ್ವೀಟ್ ಮಾಡಿದ್ದಾರೆ.

ನೈಜ ಘಟನೆ ಆಧರಿಸಿದ ಸಿನಿಮಾ

ರಂಜಿತ್ ತಿವಾರಿ ನಿರ್ದೇಶಿಸಿದ್ದ ಈ ಸಿನಿಮಾ ಇಂದಿರಾ ಗಾಂಧಿ ಪ್ರಧಾನಿಯಾಗಿದ್ದ ನಡೆದ ನೈಜ ಘಟನೆಗಳನ್ನು ಆಧರಿಸಿ ತಯಾರಾಗಿದೆ. 80ರ ದಶಕದಲ್ಲಿ ನಡೆದ ವಿಮಾನ ಅಪಹರಣದ ಸುತ್ತ ಕಥೆ ಮಾಡಲಾಗಿದೆ. ಅಕ್ಷಯ್ ಕುಮಾರ್ ರಾ ಏಜೆಂಟ್ ಪಾತ್ರದಲ್ಲಿ ನಟಿಸಿದ್ದರೆ, ವಾಣಿ ಕಪೂರ್ ಅವರ ಪತ್ನಿಯಾಗಿ ಅಭಿನಯಿಸಿದ್ದಾರೆ. ಲಾರಾ ದತ್ತಾ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಪಾತ್ರ ಮಾಡಿದ್ದು, ಹುಮಾ ಖುರೇಷಿ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಬೆಲ್ ಬಾಟಮ್ ಕಲೆಕ್ಷನ್ ಎಷ್ಟು?

ಆಗಸ್ಟ್ 19ಕ್ಕೆ ತೆರೆಕಂಡ ಬೆಲ್ ಬಾಟಮ್ ಮೊದಲ ದಿನ 2.75 ಕೋಟಿ ಗಳಿಸಿತ್ತು. ಎರಡನೇ ದಿನ ಶುಕ್ರವಾರವೂ 2.75 ಕೋಟಿ ಕಲೆಕ್ಷನ್ ಮಾಡಿದೆ. ಮೂರನೇ ದಿನ ಶನಿವಾರ 3.25 ಕೋಟಿ ಗಳಿಸಿದ್ರೆ, ಭಾನುವಾರ 4.30 ಕೋಟಿ ಬಾಚಿಕೊಂಡಿತು. ಈ ಮೂಲಕ ಮೊದಲ ನಾಲ್ಕು ದಿನಗಳಲ್ಲಿ ಒಟ್ಟು 12.65 ಕೋಟಿ ಗಳಿಸಿರುವ ಮಾಹಿತಿ ಇದೆ. ಮೊದಲ ಒಂಬತ್ತು ದಿನದಲ್ಲಿ 20 ಕೋಟಿ ದಾಟಿದೆ ಎಂದು ವರದಿಯಾಗಿದೆ.

ಅಕ್ಷಯ್ ಕುಮಾರ್ ಮುಂದಿನ ಚಿತ್ರಗಳು

ಅಕ್ಷಯ್ ಕುಮಾರ್ ಹಲವು ಚಿತ್ರಗಳು ನಟಿಸುತ್ತಿದ್ದಾರೆ. ರೋಹಿತ್ ಶೆಟ್ಟಿಯ 'ಸೂರ್ಯವಂಶಿ'ಯಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರದಲ್ಲಿ ಕತ್ರಿನಾ ಕೈಫ್, ರಣವೀರ್ ಸಿಂಗ್, ಅಜಯ್ ದೇವಗನ್ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಭೂಮಿ ಪೆಡ್ನೇಕರ್ ಜೊತೆ 'ರಕ್ಷಾ ಬಂಧನ್' ಚಿತ್ರ ಮಾಡುತ್ತಿದ್ದಾರೆ. ಸಾರಾ ಅಲಿ ಖಾನ್, ಧನುಶ್ ಜೊತೆ 'ಅತ್ರಂಗಿ ರೇ' ಸಿನಿಮಾ ಮುಗಿಸಿದ್ದಾರೆ. ಇದರ ಜೊತೆ 'ರಾಮ್ ಸೇತು' ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.