ಇನ್ನು ನನಗೆ ಬಿಗ್‌ಬಾಸ್ ಶೋ ಗೆದ್ದ ಬಹುಮಾನದ ಹಣ ಬಂದಿಲ್ಲ ಎಂದ ಸ್ಪರ್ಧಿ

ಬಿಗ್ ಬಾಸ್ ಸೀಸನ್ -19ರ ಕಿರೀಟ ಮುಡಿಗೇರಿಸಿಕೊಂಡ ಜನಪ್ರಿಯ ನಟ ಗೌರವ್ ಖನ್ನಾ ಈಗ ಸುದ್ದಿಯಲ್ಲಿದ್ದಾರೆ. ಕಾರ್ಯಕ್ರಮ ಮುಗಿದು ಹಲವು ದಿನಗಳಾದರೂ ಅವರಿಗೆ ಸಿಗಬೇಕಾದ ಬಹುಮಾನದ ಮೊತ್ತ ಇನ್ನೂ ಕೈಸೇರಿಲ್ಲವಂತೆ. ಈ ಬಗ್ಗೆ ಸ್ವತಃ ಗೌರವ್ ಅವರೇ ತಮ್ಮ ವ್ಲಾಗ್ ಮೂಲಕ ಅಸಮಾಧಾನ ಹೊರಹಾಕಿದ್ದಾರೆ.

ರಿಯಾಲಿಟಿ ಶೋ ಗೆದ್ದ ನಂತರ ಗೌರವ್ ಖನ್ನಾ ಅವರ ಜನಪ್ರಿಯತೆ ಗಗನಕ್ಕೇರಿದೆ. ಸದಾ ಒಂದಿಲ್ಲೊಂದು ವಿಚಾರಕ್ಕೆ ಲೈಮ್‌ಲೈಟ್‌ಲ್ಲಿರುವ ಈ ನಟ, ಇತ್ತೀಚೆಗೆ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಅಭಿಮಾನಿಗಳ ಜೊತೆ ಸಂವಾದ ನಡೆಸಿದರು. ಈ ವೇಳೆ ಬಿಗ್ ಬಾಸ್ ಗೆಲುವಿನ ನಂತರದ ಜೀವನದ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.

ವಿಶೇಷವಾಗಿ 'ಅನುಪಮಾ' ಧಾರಾವಾಹಿಯ ಅಭಿಮಾನಿಗಳು ಗೌರವ್ ಅವರನ್ನು ಮತ್ತೆ ಪರದೆಯ ಮೇಲೆ ನೋಡಲು ಕಾಯುತ್ತಿದ್ದಾರೆ. ಬಿಗ್ ಬಾಸ್ ವಿಜೇತರಾದ ಮೇಲೆ ಅವರ ಮುಂದಿನ ಪ್ಲಾನ್ ಏನು? ಅವರಿಗೆ ಸಿಕ್ಕ ಬಹುಮಾನಗಳ ಕಥೆಯೇನು? ಎಂಬುದಕ್ಕೆ ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್.

ಹಣ ಮತ್ತು ಕಾರು ಇನ್ನೂ ಬಂದಿಲ್ಲ

ಬಿಗ್ ಬಾಸ್ ಗೆದ್ದವರಿಗೆ ಬೃಹತ್ ಮೊತ್ತದ ನಗದು ಮತ್ತು ಐಷಾರಾಮಿ ಕಾರು ಸಿಗುವುದು ವಾಡಿಕೆ. ಗೌರವ್ ಖನ್ನಾ ಅವರಿಗೂ 50 ಲಕ್ಷ ರೂಪಾಯಿ ಹಣ ಮತ್ತು ಕಾರು ಸಿಗಬೇಕಿತ್ತು. ಆದರೆ, ವ್ಲಾಗ್ನಲ್ಲಿ ಅಭಿಮಾನಿಯೊಬ್ಬರು ಈ ಬಗ್ಗೆ ಕೇಳಿದಾಗ ಗೌರವ್ ಅಚ್ಚರಿಯ ಉತ್ತರ ನೀಡಿದ್ದಾರೆ.

"ನನಗೆ ಇನ್ನೂ ಆ ಬಹುಮಾನಗಳು ತಲುಪಿಲ್ಲ" ಎಂದು ಗೌರವ್ ಖನ್ನಾ ನೇರವಾಗಿ ಹೇಳಿದ್ದಾರೆ. ಸಾಮಾನ್ಯವಾಗಿ ಶೋ ಮುಗಿದ ಕೆಲವು ತಿಂಗಳ ನಂತರ ಈ ಪ್ರಕ್ರಿಯೆ ನಡೆಯುತ್ತದೆ. ಆದರೂ ಅಭಿಮಾನಿಗಳು ತಮ್ಮ ನೆಚ್ಚಿನ ನಟನಿಗೆ ಬೇಗನೆ ಬಹುಮಾನ ಸಿಗಲಿ ಎಂದು ಹಾರೈಸುತ್ತಿದ್ದಾರೆ.

'ಗೌರವ್' ಎಂಬ ಗುರುತು ದೊಡ್ಡದು

ಗೌರವ್ ಖನ್ನಾ ದಶಕಗಳಿಂದ ಹಿಂದಿ ಕಿರುತೆರೆಯಲ್ಲಿ ಸಕ್ರಿಯರಾಗಿದ್ದಾರೆ. 'ಅನುಪಮಾ' ಧಾರಾವಾಹಿಯ ಅನುಜ್ ಕಪಾಡಿಯಾ ಪಾತ್ರ ಅವರಿಗೆ ದೊಡ್ಡ ಹೆಸರು ತಂದುಕೊಟ್ಟಿತ್ತು. ಆದರೆ ಬಿಗ್ ಬಾಸ್ ಅವರ ಜೀವನವನ್ನೇ ಬದಲಿಸಿದೆ ಎಂದು ಅವರು ಹೇಳುತ್ತಾರೆ.

ಮೊದಲು ಜನರು ಅವರನ್ನು ಅಬೀರ್ ಅಥವಾ ಅನುಜ್ ಎಂದು ಕರೆಯುತ್ತಿದ್ದರು. ಆದರೆ ಈಗ ದುಬೈಗೆ ಹೋದರೂ ಜನರು 'ಜಿಕೆ' ಅಥವಾ 'ಗೌರವ್' ಎಂದು ಗುರುತಿಸುತ್ತಿದ್ದಾರಂತೆ. ಪಾತ್ರಕ್ಕಿಂತ ಹೆಚ್ಚಾಗಿ ತನ್ನ ವ್ಯಕ್ತಿತ್ವಕ್ಕೆ ಸಿಕ್ಕ ಈ ಮನ್ನಣೆ ಗೌರವ್ ಅವರಿಗೆ ತುಂಬಾನೇ ಖುಷಿ ಕೊಟ್ಟಿದೆ.

ಅನುಜ್ ಕಪಾಡಿಯಾ ವಾಪಸ್?

ಗೌರವ್ ಅಭಿಮಾನಿಗಳ ಬಹುದೊಡ್ಡ ಪ್ರಶ್ನೆ ಎಂದರೆ ಅದು 'ಅನುಪಮಾ' ಶೋಗೆ ಅವರು ಮರಳಿ ಬರುವುದು. ಇದರ ಬಗ್ಗೆ ಕೂಡ ನಟ ಕ್ಲಾರಿಟಿ ಕೊಟ್ಟಿದ್ದಾರೆ. ಇದು ಕೇವಲ ಅವರೊಬ್ಬರ ನಿರ್ಧಾರವಲ್ಲ ಎಂದು ಅವರು ತಿಳಿಸಿದ್ದಾರೆ.

ನಿರ್ಮಾಪಕ ರಾಜನ್ ಶಾಹಿ ಮತ್ತು ಚಾನೆಲ್ ಈ ಬಗ್ಗೆ ತೀರ್ಮಾನ ತೆಗೆದುಕೊಳ್ಳಬೇಕು. ಕಥೆಯಲ್ಲಿ ತನ್ನ ಪಾತ್ರಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ಇದ್ದರೆ ಮಾತ್ರ ವಾಪಸ್ ಬರುವುದಾಗಿ ಅವರು ಹೇಳಿದ್ದಾರೆ. ಸುಮ್ಮನೆ ಬಂದು ಹೋಗುವ ಪಾತ್ರದಲ್ಲಿ ನಟಿಸಲು ಅವರಿಗೆ ಆಸಕ್ತಿ ಇಲ್ಲವಂತೆ.

ಫ್ಲ್ಯಾಶ್‌ಬ್ಯಾಕ್ ದೃಶ್ಯಗಳ ಕಾರುಬಾರು...

ಸದ್ಯಕ್ಕೆ ಗೌರವ್ ಖನ್ನಾ ಅವರು ಯಾವುದೇ ಧಾರಾವಾಹಿಯನ್ನೂ ಫಾಲೋ ಮಾಡುತ್ತಿಲ್ಲ. ಆದರೆ 'ಅನುಪಮಾ' ಶೋನಲ್ಲಿ ಅವರ ಹಳೆಯ ದೃಶ್ಯಗಳನ್ನು ಪದೇ ಪದೇ ತೋರಿಸಲಾಗುತ್ತಿದೆ. ಇದನ್ನು ಕಂಡು ಅಭಿಮಾನಿಗಳು ಅವರು ಶೋಗೆ ವಾಪಸ್ ಬಂದಿದ್ದಾರೆ ಎಂದೇ ಭಾವಿಸುತ್ತಿದ್ದಾರೆ.

ಜನರು ಇನ್ನೂ ತಮ್ಮ ಪಾತ್ರವನ್ನು ಇಷ್ಟಪಡುತ್ತಿರುವುದಕ್ಕೆ ಗೌರವ್ ಧನ್ಯವಾದ ತಿಳಿಸಿದ್ದಾರೆ. "ಮುಂದೇನಾಗುತ್ತದೆಯೋ ಗೊತ್ತಿಲ್ಲ, ಆದರೆ ಯಾವುದೂ ಅಸಾಧ್ಯವಲ್ಲ" ಎನ್ನುವ ಮೂಲಕ ಅವರು ಮರಳಿ ಬರುವ ಸಣ್ಣ ಸೂಚನೆಯನ್ನೂ ನೀಡಿದ್ದಾರೆ.

ಗೌರವ್ ಖನ್ನಾ ಅವರ ಈ ವೈಯಕ್ತಿಕ ಮತ್ತು ವೃತ್ತಿಪರ ಅಪ್ಡೇಟ್‌ಗಳು ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿವೆ. ಅವರ ಮುಂದಿನ ಪ್ರಾಜೆಕ್ಟ್ ಯಾವುದು ಎಂದು ತಿಳಿಯಲು ಫ್ಯಾನ್ಸ್ ಕಾತರದಿಂದ ಕಾಯುತ್ತಿದ್ದಾರೆ.