ಸಲ್ಮಾನ್ ಖಾನ್ ಮಾಡಬೇಕಿದ್ದ 'ಘಜಿನಿ' ಆಮಿರ್ ಖಾನ್ ಪಾಲಾಗಿದ್ದು ಹೇಗೆ? ಬೋನಿ ಕಪೂರ್ ಬಿಚ್ಚಿಟ್ಟ ರೋಚಕ ಸತ್ಯ

ಬಾಲಿವುಡ್ ಅಂಗಳದಲ್ಲಿ ಕೆಲವು ಸಿನಿಮಾಗಳು ಬಿಡುಗಡೆಗೂ ಮುನ್ನವೇ ದೊಡ್ಡ ಮಟ್ಟದ ಸದ್ದು ಮಾಡುತ್ತವೆ. ನಟರು ಮತ್ತು ನಿರ್ಮಾಪಕರ ನಡುವಿನ ಸಣ್ಣ ಸಣ್ಣ ತಪ್ಪು ತಿಳುವಳಿಕೆಗಳು ಸಿನಿಮಾದ ದಿಕ್ಕನ್ನೇ ಬದಲಿಸಿ ಬಿಡುತ್ತವೆ. ಅಂತಹದ್ದೇ ಒಂದು ಘಟನೆ ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ. ಸಿನಿಮಾ ರಂಗದಲ್ಲಿ ಹಕ್ಕುಗಳ ವಿಚಾರಕ್ಕೆ ಬಂದರೆ ದೊಡ್ಡ ಮಟ್ಟದ ಪೈಪೋಟಿ ಇರುತ್ತದೆ.

ಅದರಲ್ಲೂ ದಕ್ಷಿಣ ಭಾರತದ ಹಿಟ್ ಸಿನಿಮಾಗಳನ್ನು ಹಿಂದಿಗೆ ರಿಮೇಕ್ ಮಾಡಲು ಬಾಲಿವುಡ್ ಮಂದಿ ಸದಾ ಕಾದು ಕುಳಿತಿರುತ್ತಾರೆ. ಇಂತಹ ಒಂದು ಸೂಪರ್ ಹಿಟ್ ಸಿನಿಮಾದ ಬಗ್ಗೆ ನಿರ್ಮಾಪಕ ಬೋನಿ ಕಪೂರ್ ಇತ್ತೀಚೆಗೆ ಮನಬಿಚ್ಚಿ ಮಾತನಾಡಿದ್ದಾರೆ.

ಇಂದು ಆ ಸಿನಿಮಾ ಬಾಲಿವುಡ್ ಇತಿಹಾಸದಲ್ಲಿ ಒಂದು ಮೈಲಿಗಲ್ಲು ಎನಿಸಿಕೊಂಡಿದೆ. ಆದರೆ ಆ ಚಿತ್ರದ ಹಿಂದೆ ನಡೆದ ಕಥೆಯೇ ಬೇರೆ ಇದೆ. ಈ ಸಿನಿಮಾವನ್ನು ಸಲ್ಲು ಭಾಯ್ ಅಂದ್ರೆ ಸಲ್ಮಾನ್ ಖಾನ್ ಅವರನ್ನು ಇಟ್ಟುಕೊಂಡು ಮಾಡಲು ದೊಡ್ಡ ಪ್ಲಾನ್ ನಡೆದಿತ್ತು. ಆದರೆ ಕೊನೆ ಕ್ಷಣದಲ್ಲಿ ಎಲ್ಲವೂ ಉಲ್ಟಾಪಲ್ಟಾ ಆಗಿಹೋಯಿತು.

ಮಧು ಮಂಟೆನಾ ಮತ್ತು ಬೋನಿ ಕಪೂರ್ ನಡುವೆ ನಡೆದದ್ದೇನು?

ಬೋನಿ ಕಪೂರ್ 'ಘಜಿನಿ' ಸಿನಿಮಾವನ್ನು ಸಲ್ಮಾನ್ ಖಾನ್ ಜೊತೆ ಮಾಡಲು ಆಸೆ ಪಟ್ಟಿದ್ದರು. ತಮಿಳಿನಲ್ಲಿ ಸೂರ್ಯ ನಟಿಸಿದ್ದ ಈ ಸಿನಿಮಾ ದೊಡ್ಡ ಹಿಟ್ ಆಗಿತ್ತು. ಈ ಸಿನಿಮಾದ ಹಿಂದಿ ರಿಮೇಕ್ ಹಕ್ಕುಗಳನ್ನು ಪಡೆಯಲು ಬೋನಿ ಕಪೂರ್ ಅವರು ಮಧು ಮಂಟೆನಾ ಅವರ ಬಳಿ ಮಾತುಕತೆ ನಡೆಸಿದ್ದರು. ಆದರೆ ಮಧು ಮಂಟೆನಾ ಅವರು ಬೋನಿ ಕಪೂರ್ ಅವರಿಗೆ ಸರಿಯಾದ ಉತ್ತರ ನೀಡದೆ ಸತಾಯಿಸಿದ್ದರು.

ಬೋನಿ ಕಪೂರ್ ಹೇಳುವ ಪ್ರಕಾರ ಮಧು ಮಂಟೆನಾ ಹಕ್ಕುಗಳನ್ನು ಕೊಡಿಸುತ್ತೇನೆ ಎಂದು ಹೇಳುತ್ತಲೇ ದಿನ ಮುಂದೂಡುತ್ತಿದ್ದರು. ನಾನು ಆ ಹಕ್ಕುಗಳಿಗಾಗಿ ಕಾಯುತ್ತಿದ್ದೆ, ಆದರೆ ಮಧು ನನ್ನನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಬೇರೆಯವರ ಜೊತೆ ಒಪ್ಪಂದ ಮಾಡಿಕೊಂಡರು ಎಂದು ಬೋನಿ ಕಪೂರ್ ಬೇಸರ ವ್ಯಕ್ತಪಡಿಸಿದ್ದಾರೆ.

ಸಲ್ಮಾನ್ ಖಾನ್ ಬದಲಿಗೆ ಆಮಿರ್ ಖಾನ್ ಎಂಟ್ರಿ...

ಅಲ್ಲು ಅರ್ಜುನ್ ತಂದೆ ಅಲ್ಲು ಅರವಿಂದ್ ಅವರ ಬಳಿ ಈ ಚಿತ್ರದ ಹಕ್ಕುಗಳಿದ್ದವು. ಆ ಸಮಯದಲ್ಲಿ ಆಮಿರ್ ಖಾನ್‌ಗೆ ಈ ವಿಷಯ ತಲುಪಿತು. ಆಮಿರ್ ತಡ ಮಾಡದೇ ಸಂಪರ್ಕ ಮಾಡಿದರು. ಆಮಿರ್ ಖಾನ್ ಈ ಸಿನಿಮಾಗೆ ಬಂದ ಮೇಲೆ ಚಿತ್ರದ ಸ್ವರೂಪವೇ ಬದಲಾಯಿತು. ಆಗ ಮಧು ಮಂಟೆನಾ ನನ್ನ ನಡು ನೀರಿನಲ್ಲಿ ಕೈ ಬಿಟ್ಟು ಅಲ್ಲು ಅರವಿಂದ್ ಜೊತೆ ಸೇರಿ ಹಿಂದಿಯಲ್ಲಿ ತಾವೇ ಚಿತ್ರ ನಿರ್ಮಾಣ ಮಾಡಿದರು ಎಂದು ಬೋನಿ ಕಪೂರ್ ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ. ಎ.ಆರ್. ಮುರುಗದಾಸ್ ನಿರ್ದೇಶನದಲ್ಲಿ ಬಂದ 'ಗಜಿನಿ' ಹಿಂದಿಯಲ್ಲಿ 100 ಕೋಟಿ ಕ್ಲಬ್ ಸೇರಿದ ಮೊದಲ ಸಿನಿಮಾ ಎಂಬ ದಾಖಲೆ ಬರೆಯಿತು.

ಒಂದು ವೇಳೆ ಮಧು ಮಂಟೆನಾ ಅವರು ಬೋನಿ ಕಪೂರ್ ಮಾತು ಕೇಳಿದ್ದರೆ ಸಲ್ಮಾನ್ ಖಾನ್ ನಟನೆಯ 'ಘಜಿನಿ' ತೆರೆಗೆ ಬರುತ್ತಿತ್ತು. ಅಷ್ಟಕ್ಕೂ ಸಲ್ಮಾನ್ ಖಾನ್ ಅವರಿಗೆ ಈ ಕಥೆ ತುಂಬಾ ಇಷ್ಟವಾಗಿತ್ತಂತೆ. ಆದರೆ ಅದೃಷ್ಟ ಆಮೀರ್ ಖಾನ್ ಪರವಾಗಿತ್ತು. ಇಂದು ಆಮೀರ್ ಖಾನ್ ವೃತ್ತಿಜೀವನದಲ್ಲಿ 'ಘಜಿನಿ' ಅತಿ ದೊಡ್ಡ ಹಿಟ್ ಸಿನಿಮಾಗಳಲ್ಲಿ ಒಂದಾಗಿ ನಿಂತಿದೆ.

ಬಾಲಿವುಡ್ ಮಂದಿಯ ಹಕ್ಕುಗಳ ಹೋರಾಟ...

ಸಿನಿಮಾ ಕ್ಷೇತ್ರದಲ್ಲಿ ಕೇವಲ ನಟನೆ ಮಾತ್ರವಲ್ಲ, ವ್ಯವಹಾರ ಕೂಡ ಅಷ್ಟೇ ಮುಖ್ಯವಾಗುತ್ತದೆ. ಬೋನಿ ಕಪೂರ್ ಅವರಂತಹ ಅನುಭವಿ ನಿರ್ಮಾಪಕರಿಗೂ ಕೂಡ ಹಕ್ಕುಗಳ ವಿಷಯದಲ್ಲಿ ಹಿನ್ನಡೆಯಾಯಿತು ಎಂದರೆ ಅಲ್ಲಿನ ಪೈಪೋಟಿ ಎಷ್ಟಿದೆ ಎಂದು ಊಹಿಸಬಹುದು. 'ಘಜಿನಿ' ಸಿನಿಮಾ ಕೈತಪ್ಪಿದ್ದಕ್ಕೆ ಬೋನಿ ಕಪೂರ್ ಈಗಲೂ ಕೂಡ ಆ ಕಹಿ ಘಟನೆಯನ್ನು ನೆನಪಿಸಿಕೊಳ್ಳುತ್ತಾರೆ.

ಯಾಕೆಂದರೆ ಸಲ್ಮಾನ್ ಖಾನ್ ಅಂತಹ ಮಾಸ್ ನಟ ಈ ಪಾತ್ರ ಮಾಡಿದ್ದರೆ ಸಿನಿಮಾ ಇನ್ಯಾವ ಮಟ್ಟಕ್ಕೆ ಇರುತ್ತಿತ್ತು ಎಂಬ ಚರ್ಚೆ ಈಗ ಶುರುವಾಗಿದೆ. ಆದರೆ ಆಮೀರ್ ಖಾನ್ ಶ್ರಮ ಮತ್ತು ಬಾಡಿ ಬಿಲ್ಡಿಂಗ್ ಈ ಸಿನಿಮಾವನ್ನು ಬೇರೆಯದ್ದೇ ಎತ್ತರಕ್ಕೆ ಕೊಂಡೊಯ್ದಿತ್ತು ಎಂಬುದು ಅಷ್ಟೇ ಸತ್ಯ.