ದಿನದಿಂದ ದಿನಕ್ಕೆ ಕುಸಿದ ಕಲೆಕ್ಷನ್; 410 ಕೋಟಿ ಬಜೆಟ್‌ನ ಬ್ರಹ್ಮಾಸ್ತ್ರ ಮೊದಲ ವಾರ ಗಳಿಸಿದ್ದೆಷ್ಟು?

ಏಳು ದಿನಕ್ಕೆ 300 ಕೋಟಿ

ಬ್ರಹ್ಮಾಸ್ತ್ರ ಸಿನಿಮಾ ಮೊದಲ ಏಳು ದಿನಗಳಲ್ಲಿ 300 ಕೋಟಿ ಕಲೆಕ್ಷನ್ ಮಾಡಿದೆ ಎಂಬ ವಿಷಯವನ್ನು ಆಯನ್ ಮುಖರ್ಜಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡುವ ಮೂಲಕ ತಿಳಿಸಿದ್ದಾರೆ. ಈ ಮೂಲಕ 410 ಕೋಟಿ ಬಜೆಟ್‌ನಲ್ಲಿ ತಯಾರಾಗಿರುವ ಬ್ರಹ್ಮಾಸ್ತ್ರ 73% ಗಳಿಸಿದ್ದು ಬಜೆಟ್‌ನ್ನು ಸರಿದೂಗಿಸುವಂತ ಕಲೆಕ್ಷನ್ ಮಾಡಲು ಇನ್ನೂ 110 ಕೋಟಿ ಗಳಿಸಬೇಕಿದೆ.

ಕಾಶ್ಮೀರ್ ಫೈಲ್ಸ್ ಹಿಂದಿಕ್ಕಲು ಇನ್ನೂ ಎಷ್ಟು ಗಳಿಸಬೇಕು?

ಇಪ್ಪತ್ತು ಕೋಟಿ ಬಜೆಟ್‌ನಲ್ಲಿ ತಯಾರಾಗಿ 340 ಬಾಚಿದ್ದ ಕಾಶ್ಮೀರ್ ಫೈಲ್ಸ್ ಸಿನಿಮಾದ ಕಲೆಕ್ಷನ್ ಅನ್ನು ಹಿಂದಿಕ್ಕಲು ಬ್ರಹ್ಮಾಸ್ತ್ರ ಇನ್ನೂ 40 ಕೋಟಿ ಕಲೆಹಾಕಬೇಕಿದೆ. ಹೀಗೆ ಕಾಶ್ಮೀರ್ ಫೈಲ್ಸ್ ಚಿತ್ರದ ಕಲೆಕ್ಷನ್ ಅನ್ನು ಬ್ರಹ್ಮಾಸ್ತ್ರ ಹಿಂದಿಕ್ಕಿದರೆ ಈ ವರ್ಷ ಅತಿಹೆಚ್ಚು ಗಳಿಸಿದ ಬಾಲಿವುಡ್ ಸಿನಿಮಾ ಎಂಬ ದಾಖಲೆಯನ್ನು ತನ್ನ ಹೆಸರಿಗೆ ಬರೆದುಕೊಳ್ಳಲಿದೆ.

ಏಳನೇ ದಿನ ಬ್ರಹ್ಮಾಸ್ತ್ರ ಗಳಿಸಿದ್ದೆಷ್ಟು?

ಇನ್ನು ಮೊದಲ ಮೂರು ದಿನ ಕೋಟಿ ಕೋಟಿ ಕೊಳ್ಳೆ ಹೊಡೆದು ಹುಬ್ಬೇರುವಂತೆ ಮಾಡಿದ್ದ ಬ್ರಹ್ಮಾಸ್ತ್ರ ಸಿನಿಮಾ ಏಳನೇ ದಿನ ಕಲೆಹಾಕಿದ್ದು 9.25 ಕೋಟಿ. ಈ ಮೂಲಕ ಚಿತ್ರದ ಕಲೆಕ್ಷನ್ ದಿನದಿಂದ ದಿನಕ್ಕೆ ಕಡಿಮೆಯಾಗುತ್ತಿರುವುದು ಖಚಿತವಾಗಿದ್ದು, ಈ ವಾರಾಂತ್ಯದ ಗಳಿಕೆ ಚಿತ್ರದ ಮುಂದಿನ ಹಣೆಬರಹವನ್ನು ನಿರ್ಧರಿಸಲಿದೆ.

ಭೂಲ್ ಭುಲಯಾ 2 ಹಿಂದಿಕ್ಕಿದ ಬ್ರಹ್ಮಾಸ್ತ್ರ

ಇನ್ನು ಬ್ರಹ್ಮಾಸ್ತ್ರ ಭೂಲ್ ಭುಲಯ 2 ಸಿನಿಮಾದ ಕಲೆಕ್ಷನ್ ಹಿಂದಿಕ್ಕುವಲ್ಲಿ ಯಶಸ್ವಿಯಾಗಿದೆ. ಭೂಲ್ ಭುಲಾಯಾ 2 ಒಟ್ಟಾರೆ 266 ಕೋಟಿ ಗಳಿಸಿ ಈ ವರ್ಷ ಅತಿಹೆಚ್ಚು ಕಲೆಕ್ಷನ್ ಮಾಡಿದ ಬಾಲಿವುಡ್ ಸಿನಿಮಾಗಳ ಪೈಕಿ ಎರಡನೇ ಸ್ಥಾನದಲ್ಲಿತ್ತು. ಸದ್ಯ ಈ ಚಿತ್ರವನ್ನು ಹಿಂದಿಕ್ಕಿರುವ ಬ್ರಹ್ಮಾಸ್ತ್ರ ಎರಡನೇ ಸ್ಥಾನಕ್ಕೇರಿದೆ.