ಬಾಕ್ಸ್ ಆಫೀಸ್‌ನಲ್ಲಿ ಕಮಾಲ್ ಮಾಡದ ಭೋಲಾ ಶಂಕರ್ ಹಿಂದಿಯಲ್ಲಿ ಬಿಡುಗಡೆ: ಯಾವಾಗ ತಿಳಿಯಿರಿ

ರಜನಿಕಾಂತ್ ಅವರ ಜೈಲರ್ ಸಿನಿಮಾ ಬಿಡುಗಡೆಯಾಗಿ ಒಂದು ದಿನದ ನಂತರ ತೆಲುಗು ನಟ ಚಿರಂಜೀವಿ ಅವರ ಭೋಲಾ ಶಂಕರ್ ಬಿಡುಗಡೆಯಾಗಿತ್ತು. ಆದರೆ, ಈ ಚಿತ್ರ ಸಾಮಾನ್ಯ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದಿಲ್ಲ. ಜೊತೆಗೆ ಬಾಕ್ಸ್ ಆಫೀಸ್‌ನಲ್ಲಿಯೂ ಯಾವುದೇ ಕಮಾಲ್ ಮಾಡಿಲ್ಲ. ಈಗ ಭೋಲಾ ಶಂಕರ್ ಹಿಂದಿಗೆ ಡಬ್ ಆಗುತ್ತಿದೆ.

ನಟ ಚಿರಂಜೀವಿ ಜೊತೆಗೆ ತಮನ್ನಾ ಭಾಟಿಯಾ, ಕೀರ್ತಿ ಸುರೇಶ್ ಮತ್ತು ಸುಶಾಂತ್ ನಟಿಸಿರುವ ಈ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ಯಾವುದೇ ಗುರುತು ಹಾಕುವಲ್ಲಿಯೂ ವಿಫಲವಾಗಿದೆ. ಆದರೆ, ಈ ತಿಂಗಳು ಹಿಂದಿಯಲ್ಲಿ ಚಿತ್ರ ಬಿಡುಗಡೆಯಾಗಲಿದೆ ಎಂದು ಇತ್ತೀಚಿನ ವರದಿಗಳು ಸೂಚಿಸುತ್ತವೆ.

ಚಿರಂಜೀವಿ ಅಭಿನಯದ ಚಿತ್ರ ಈ ತಿಂಗಳು ಹಿಂದಿಯಲ್ಲಿ ಬಿಡುಗಡೆಯಾಗಲಿದೆ. ಅದರ ಕಳಪೆ ಪ್ರದರ್ಶನದಿಂದ ಡಬ್ಬಿಂಗ್ ಮೇಲೆ ಹೆಚ್ಚು ಪರಿಣಾಮ ಬೀರುವುದಿಲ್ಲ ಎಂದು ಹೇಳಿರುವ ಆರ್‌ಕೆಡಿ ಸ್ಟುಡಿಯೋಸ್ ಅಧಿಕೃತವಾಗಿ ಡಬ್ಬಿಂಗ್ ಆವೃತ್ತಿಯನ್ನು ಆಗಸ್ಟ್ ಅಂತ್ಯದಲ್ಲಿ ಬಿಡುಗಡೆ ಮಾಡಲಾಗುವುದು ಎಂದು ಘೋಷಿಸಿದೆ.

ಇದೇ ತಿಂಗಳು ಹಿಂದಿಯಲ್ಲಿ ಭೋಲಾ ಶಂಕರ್ ಬಿಡುಗಡೆ

ಚಿರಂಜೀವಿ ಅವರ ಹಿಂದಿ ಡಬ್ಬಿಂಗ್ ಸಿನಿಮಾಗಳು ಟಿವಿಗಳಲ್ಲಿ ಹೆಚ್ಚು ವೀಕ್ಷಿಸಲಾಗುತ್ತದೆ. ಇದೇ ಕಾರಣಕ್ಕೆ ಸಿನಿಮಾ ತಂಡ ಕೂಡ ಈ ನಿರ್ಧಾರ ತೆಗೆದುಕೊಂಡಿರಬಹುದು. ದಕ್ಷಿಣ ಭಾರತದಲ್ಲಿ ಜೈಲರ್ ಹವಾ ಸ್ವಲ್ಪವೂ ಕೂಡ ಕಡಿಮೆಯಾಗದ ಕಾರಣ ಹೊಸ ಪ್ರದೇಶದಲ್ಲಿ ಭೋಲಾ ಶಂಕರ್ ಅನ್ನು ಬಿಡುಗಡೆ ಮಾಡಲು ಆಯ್ಕೆ ಮಾಡಿದ್ದಾರೆ.

ಚಿತ್ರದ ಹಿಂದಿ ಡಬ್ಬಿಂಗ್ ಆವೃತ್ತಿಯ ಬಿಡುಗಡೆಯ ಘೋಷಣೆಯ ಜೊತೆಗೆ, ಮತ್ತೊಂದು ಕುತೂಹಲಕಾರಿ ಸಂಗತಿಯೂ ಹೊರಬಂದಿದೆ. ಹಿಂದಿ ಆವೃತ್ತಿಯಲ್ಲಿ ಚಿರಂಜೀವಿ ಅವರ ಧ್ವನಿಯನ್ನು ಜಾಕಿ ಶ್ರಾಫ್ ಅವರು ಡಬ್ ಮಾಡುತ್ತಾರೆ ಎಂದು ಖಚಿತಪಡಿಸಲಾಗಿದೆ. ಜಾಕಿ ಶ್ರಾಫ್ ಈಗಾಗಲೇ ಜೈಲರ್‌ನ ಯಶಸ್ಸಿನಲ್ಲಿ ತೇಲುತ್ತಿದ್ದಾರೆ.

ಭೋಲಾ ಶಂಕರ್‌ನಲ್ಲಿನ ಚಿರಂಜೀವಿ ಅವರ ಧ್ವನಿಗೆ ಜಾಕಿ ಶ್ರಾಫ್ ಅವರ ಧ್ವನಿ ಎಷ್ಟರ ಮಟ್ಟಿಗೆ ಹೊಂದಲಿದೆ ಎಂಬುದನ್ನು ನೋಡಬೇಕಾಗಿದೆ. ಚಿರಂಜೀವಿ ಮತ್ತು ಜಾಕಿ ಶ್ರಾಫ್ ಅವರ ಅಭಿಮಾನಿಗಳು ಈ ಕ್ಷಣಕ್ಕಾಗಿ ಕಾಯುತ್ತಿದ್ದಾರೆ. ಆರ್‌ಕೆಡಿ ಸ್ಟುಡಿಯೋಸ್ ತಮ್ಮ ಇನ್‌ಸ್ಟಾಗ್ರಾಮ್ ಹ್ಯಾಂಡಲ್‌ನಲ್ಲಿ ಚಿತ್ರವು ಶೀಘ್ರದಲ್ಲೇ ಹಿಂದಿಯಲ್ಲಿ ಬಿಡುಗಡೆಯಾಗಲಿದೆ ಎಂದು ಪೋಸ್ಟ್ ಮಾಡಿದೆ.

"ಭೋಲಾ ಶಂಕರ್‌ನಲ್ಲಿ ಮೆಗಾಸ್ಟಾರ್ ಚಿರಂಜೀವಿ ಅವರ ಸ್ವ್ಯಾಗ್ ನೋಡಲು ಮರೆಯದಿರಿ. 25 ಆಗಸ್ಟ್ 2023 ರಂದು ಹಿಂದಿಯಲ್ಲಿ ವಿಶ್ವದಾದ್ಯಂತ ಬಿಡುಗಡೆಯಾಗುತ್ತಿದೆ! ಚಿರಂಜೀವಿ ಅವರ ಹಿಂದಿ ಡಬ್ಬಿಂಗ್ ಅನ್ನು ಇನ್ ಅಂಡ್ ಓನ್ಲಿ ಮಿಸ್ಟರ್ ಜಾಕಿ ಶ್ರಾಫ್ ಮಾಡಿದ್ದಾರೆ!" ಎಂದು ಪೋಸ್ಟ್‌ಗೆ ಶೀರ್ಷಿಕೆ ನೀಡಲಾಗಿದೆ.

ಭೋಲಾ ಶಂಕರ್ ಸಿನಿಮಾವನ್ನು ಮೆಹರ್ ರಮೇಶ್ ನಿರ್ದೇಶಿಸಿದ್ದಾರೆ. ಈ ಚಿತ್ರವನ್ನು ಎಕೆ ಎಂಟರ್‌ಟೈನ್‌ಮೆಂಟ್ಸ್ ನಿರ್ಮಾಣ ಮಾಡಿದೆ. ಸಂಗೀತವನ್ನು ಮಹತಿ ಸ್ವರ ಸಾಗರ್ ಸಂಯೋಜಿಸಿದ್ದಾರೆ. ಈ ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಅತ್ಯಂತ ಕಡಿಮೆ ಓಪನಿಂಗ್‌ಗಳನ್ನು ದಾಖಲಿಸಿದ ಚಿರಂಜೀವಿ ಅವರ ಸಿನಿಮಾವಾಗಿದೆ.

ತೆಲುಗಿನ ಭೋಲಾ ಶಂಕರ್ ಅಜಿತ್ ಕುಮಾರ್ ಅಭಿನಯದ ತಮಿಳಿನ ವೇದಾಳಂ ಚಿತ್ರದ ತೆಲುಗು ರಿಮೇಕ್ ಆಗಿದೆ. 2015 ರಲ್ಲಿ ಬಿಡುಗಡೆಯಾದ ವೇದಾಳಂ ಚಿತ್ರದಲ್ಲಿ ಲಕ್ಷ್ಮಿ ಮೆನನ್ ನಿರ್ವಹಿಸಿದ ಪಾತ್ರವನ್ನು ತೆಲುಗಿನಲ್ಲಿ ಕೀರ್ತಿ ಸುರೇಶ್ ನಿರ್ವಹಿಸಿದ್ದರೆ, ಮೂಲದಲ್ಲಿ ಶ್ರುತಿ ಹಾಸನ್ ಪಾತ್ರವನ್ನು ತಮನ್ನಾ ಭಾಟಿಯಾ ನಿರ್ವಹಿಸಿದ್ದಾರೆ. ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಕಮಾಲ್ ಮಾಡಿತ್ತು. ಈ ಚಲನಚಿತ್ರವನ್ನು 2018 ರಲ್ಲಿ ಸುಲ್ತಾನ್: ದಿ ಸೇವಿಯರ್ ಎಂದು ಬೆಂಗಾಲಿ ಭಾಷೆಗೆ ರೀಮೇಕ್ ಮಾಡಲಾಗಿತ್ತು.