ಸಿನಿಮಾ ಆಗಲಿದೆ ಕಮಿಡಿಯನ್ ಕಪಿಲ್ ಶರ್ಮಾ ಜೀವನ

ಮನ್‌ದೀಪ್ ಸಿಂಗ್ ಲಂಭಾ ನಿರ್ದೇಶನ

ಕಪಿಲ್ ಶರ್ಮಾರ ಜೀವನವನ್ನು ಸಿನಿಮಾ ಮಾಡುವ ಜವಾಬ್ದಾರಿಯನ್ನು ನಿರ್ದೇಶಕ ಮನ್‌ದೀಪ್ ಸಿಂಗ್ ಲಂಭಾ ವಹಿಸಿಕೊಂಡಿದ್ದಾರೆ. ಈ ಹಿಂದೆ ಅವರು 'ಫಕ್ರೆ' ಸಿನಿಮಾ ನಿರ್ದೇಶನ ಮಾಡಿದ್ದರು. ಆ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಕಪಿಲ್ ಶರ್ಮಾ ಜೀವನ ಕುರಿತ ಸಿನಿಮಾಕ್ಕೆ ಖ್ಯಾತ ನಿರ್ಮಾಣ ಸಂಸ್ಥೆ ಲೈಕಾ ಪ್ರೊಡಕ್ಷನ್ಸ್ ಬಂಡವಾಳ ಹೂಡಲಿದೆ. ಸಿನಿಮಾಕ್ಕೆ 'ಫನ್‌ಕಾರ್' ಎಂದು ಹೆಸರಿಡಲಾಗಿದೆ. ಫನ್‌ಕಾರ್ ಎಂದರೆ ಕಲಾವಿದ ಅಥವಾ ಮನರಂಜನೆ ನೀಡುವವ ಎಂದರ್ಥ.

ಏರಿಳಿತಗಳಿಂದ ಕೂಡಿದೆ ಕಪಿಲ್ ಶರ್ಮಾ ಜೀವನ

ಅಮೃತ್‌ಸರದಲ್ಲಿ ಪೊಲೀಸ್ ಕಾನ್‌ಸ್ಟೇಬಲ್ ಮಗನಾಗಿ ಜನಿಸಿದ ಕಪಿಲ್ ಶರ್ಮಾ ಅತ್ಯಂತ ಮಧ್ಯಮವರ್ಗದ ಕುಟುಂಬದಿಂದ ಬಂದವರು. 2007ರಲ್ಲಿ ಮೊದಲಿಗೆ 'ಗ್ರೇಟ್ ಇಂಡಿಯಲ್ ಲಾಫ್ಟರ್ ಚಾಲೆಂಜ್' ಹೆಸರಿನ ಕಾಮಿಡಿ ರಿಯಾಲಿಟಿ ಶೋನಲ್ಲಿ ಭಾಗವಹಿಸಿದ ಕಪಿಲ್, ಅಲ್ಲಿಂದ 'ಲಾಫ್ಟರ್ ನೈಟ್ಸ್', 'ಕಾಮಿಡಿ ಸರ್ಕಸ್', 'ಕಾಮಿಡಿಕಾ ಡೈಲಿ ಸೋಪ್' ಹೀಗೆ ಹಲವು ಶೋಗಳಲ್ಲಿ ಸ್ಪರ್ಧಿಯಾಗಿ ನಗಿಸಿದರು. ಬಳಿಕ 2013 ರಲ್ಲಿ ಮೊದಲ ಬಾರಿಗೆ 'ಕಾಮಿಡಿ ನೈಟ್ಸ್ ವಿತ್ ಕಪಿಲ್' ಹೆಸರಿನ ತಮ್ಮದೇ ಶೋ ಪ್ರಾರಂಭ ಮಾಡಿದರು. ಆ ಶೋ ದೊಡ್ಡ ಹಿಟ್ ಆಯಿತು. ಆದರೆ ಚಾನೆಲ್‌ ಜೊತೆಗಿನ ಮುನಿಸಿನಿಂದ ಆ ಶೋ ಬಂದ್ ಮಾಡಿದರು ಕಪಿಲ್.

ತಮ್ಮ ಪಾತ್ರದಲ್ಲಿ ತಾವೇ ನಟಿಸುತ್ತಿದ್ದಾರೆ ಕಪಿಲ್

ನಂತರ ಬೇರೆ ಚಾನೆಲ್‌ನಲ್ಲಿ 'ದಿ ಕಪಿಲ್ ಶರ್ಮಾ ಶೋ' ಪ್ರಾರಂಭ ಮಾಡಿದರು. ಆ ಶೋ ಸಹ ದೊಡ್ಡ ಹಿಟ್ ಆಯಿತು. ಕಪಿಲ್ ಶರ್ಮಾ ಯಾವುದೇ ಬಾಲಿವುಡ್‌ನ ಸ್ಟಾರ್ ನಟರಿಗೆ ಕಡಿಮೆಯಲ್ಲದ ಸೆಲೆಬ್ರಿಟಿ ಎನಿಸಿಕೊಂಡರು. ಅಲ್ಲಿಂದ ಸಿನಿಮಾಗಳು, ಅಂತರಾಷ್ಟ್ರೀಯ ಶೋಗಳು ಹೀಗೆ ಪ್ರಗತಿ ಸಾಧಿಸುತ್ತಲೇ ಸಾಗಿದರು. ಜೀವನದಲ್ಲಿ ಸಾಕಷ್ಟು ಏರಿಳಿತಗಳನ್ನು ಕಪಿಲ್ ಶರ್ಮಾ ಅನುಭವಿಸಿದ್ದಾರೆ. ಆ ಎಲ್ಲವೂ ಕಪಿಲ್ ಶರ್ಮಾ ಜೀವನ ಕುರಿತ ಸಿನಿಮಾದಲ್ಲಿ ತೆರೆಯ ಮೇಲೆ ಬರಲಿದೆ. ತಮ್ಮ ಜೀವನದ ಕತೆಯಲ್ಲಿ ಸ್ವತಃ ಕಪಿಲ್ ಶರ್ಮಾ ಅವರೇ ನಾಯಕ ನಟನಾಗಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಈ ಸಿನಿಮಾಕ್ಕಾಗಿ ಕಪಿಲ್ ಶರ್ಮಾ ತೂಕ ಇಳಿಸಿಕೊಳ್ಳುವುದರಲ್ಲಿ ನಿರತಾಗಿದ್ದಾರೆ.

ನೆಟ್‌ಫ್ಲಿಕ್ಸ್‌ನಲ್ಲಿ ಶೋ ಬರುತ್ತಿದೆ

ಕಪಿಲ್ ಶರ್ಮಾ ಇದೀಗ ತಮ್ಮ ಜೀವನ ಕತೆಯನ್ನು ತಾವೇ ಹೇಳುತ್ತಿದ್ದಾರೆ ಅದೂ ನೆಟ್‌ಫ್ಲಿಕ್ಸ್‌ನಲ್ಲಿ. ಕಪಿಲ್ ಶರ್ಮಾಗಾಗಿ ನೆಟ್‌ಫ್ಲಿಕ್ಸ್ ವಿಶೇಷ ಶೋ ಆಯೋಜಿಸಿದೆ. ಈ ಶೋನಲ್ಲಿ ಕಪಿಲ್ ಶರ್ಮಾ ತಮ್ಮ ಜೀವನದ ಕತೆಯನ್ನು ತಮ್ಮದೇ ಹಾಸ್ಯದ ಶೈಲಿಯಲ್ಲಿ ಹೇಳಿದ್ದಾರೆ. ಶೋಗೆ 'ಐ ಆಮ್ ನಾಟ್ ಡನ್ ಯೆಟ್' ಎಂದು ಹೆಸರಿಡಲಾಗಿದೆ. ನೆಟ್‌ಫ್ಲಿಕ್ಸ್‌ನಲ್ಲಿ ಈ ಶೋ ಜನವರಿ 28 ರಿಂದ ಪ್ರಸಾರವಾಗಲಿದೆ.