ದಬಾಂಗ್-3 ಚಿತ್ರಕ್ಕೆ ಭಾರಿ ಮುಖಭಂಗ: ಸಲ್ಲು-ಸುದೀಪ್ ಜೋಡಿಗೆ ಹಿನ್ನಡೆ

100 ಕೋಟಿ ತಲುಪಲು ಹರಸಾಹಸ

ಸಹಜವಾಗಿ ಸಲ್ಮಾನ್ ಖಾನ್ ಸಿನಿಮಾಗಳು ಅಂದ್ರೆ ಮೂರು ದಿನಕ್ಕೆ ಅಥವಾ ನಾಲ್ಕು ದಿನಕ್ಕೆ ನೂರು ಕೋಟಿ ಕ್ಲಬ್ ಸೇರುತ್ತೆ ಎಂಬ ಟ್ರೆಂಡ್ ಇದೆ. ಆದರೆ ದಬಾಂಗ್ 3 ಸಿನಿಮಾ ಐದನೇ ದಿನಕ್ಕೆ ನೂರು ಕೋಟಿ ಬಾಗಿಲು ಮುಟ್ಟಿದೆ. ಮೊದಲ ಮೂರು ದಿನದಲ್ಲಿ ಒಳ್ಳೆಯ ಒಪನಿಂಗ್ ಪಡೆದುಕೊಂಡಿತ್ತಾದರೂ, ನಂತರ ದಬಾಂಗ್ ಕಲೆಕ್ಷನ್ ನಿಧಾನವಾಯಿತು.

ಮೂರನೇ ವಾರಕ್ಕೆ ಸುಸ್ತಾದ ಸಲ್ಲು ಚಿತ್ರ

ಮೊದಲ ವಾರ ಒಳ್ಳೆಯ ಗಳಿಕೆ ಕಂಡ ದಬಾಂಗ್ 3 ಸಿನಿಮಾ, ಎರಡನೇ ವಾರ ಮುಗಿಸುವಷ್ಟರಲ್ಲಿ ಮಕಾಡೆ ಮಲಗಿತು. ಐದು ದಿನಕ್ಕೆ ನೂರು ಕೋಟಿ ಗಳಿಸಿದ್ದರೂ 13 ದಿನ ಬಂದರೂ 130 ಕೋಟಿಯ ಅಸುಪಾಸು ಒದ್ದಾಡುತ್ತಿದೆ. ಅಲ್ಲಿಗೆ, ಬಾಕ್ಸ್ ಆಫೀಸ್ ನಲ್ಲಿ ದಬಾಂಗ್ ಸೋತಿದೆ ಎಂದು ಬಾಲಿವುಡ್ ವಿಶ್ಲೇಷಕರು ಹೇಳುತ್ತಿದ್ದಾರೆ.

ಹೊಸ ವರ್ಷಕ್ಕೆ ದಬಾಂಗ್ ಗಳಿಸಿದ್ದೆಷ್ಟು?

ಹೊಸ ವರ್ಷದ ದಿನವೂ ದಬಾಂಗ್ ಚಿತ್ರಕ್ಕೆ ಅಷ್ಟಾಗಿ ಸಕ್ಸಸ್ ಸಿಕ್ಕಿಲ್ಲ. ಜನವರಿ 1 ರಂದು ಸಲ್ಲು ಚಿತ್ರ ಕೇವಲ 3.50 ಕೋಟಿ ಮಾತ್ರ ಗಳಿಕೆ ಮಾಡಿದೆ. ಸದ್ಯಕ್ಕೆ ಒಟ್ಟು 13 ದಿನಗಳಲ್ಲಿ ದಬಾಂಗ್ ಸಿನಿಮಾ 132.50 ಕೋಟಿ ಕಲೆಕ್ಷನ್ ಮಾಡಿದೆಯಂತೆ.

ನಿರೀಕ್ಷೆ ಹುಸಿ ಮಾಡಿದ ಸಲ್ಲು-ಸುದೀಪ್!

ಸಲ್ಮಾನ್ ಖಾನ್ ಸಿನಿಮಾ ಮತ್ತು ಸುದೀಪ್ ಇಬ್ಬರು ಒಂದೇ ಚಿತ್ರದಲ್ಲಿ ನಟಿಸಿದ್ದು, ಚಿತ್ರಜಗತ್ತಿನಲ್ಲಿ ಸ್ವಲ್ಪ ನಿರೀಕ್ಷೆ ಜಾಸ್ತಿ ಮಾಡಿತ್ತು. ವೇಗವಾಗಿ ನೂರು ಕೋಟಿ, ಇನ್ನೂರು ಕೋಟಿ, ಮೂನ್ನೂರು ಕೋಟಿ ಕ್ಲಬ್ ಕೂಡ ಸೇರಬಹುದು ಎಂಬ ಭರವಸೆ ಇತ್ತು. ಆದರೆ, 150 ಕೋಟಿ ಗಳಿಸುವುದಕ್ಕೂ ಈಗ ಅಂಬೆಗಾಲು ಇಡುತ್ತಿರುವುದು ನಿಜಕ್ಕೂ ಬೇಸರದ ಸಂಗತಿ.