ಬಾಲಿವುಡ್ ಸೂಪರ್ ಸ್ಟಾರ್ ಜೊತೆ 'ರಾ ರಾ ಸಾಮಿ' ಎಂದು ರಶ್ಮಿಕಾ ಮಂದಣ್ಣ ಸ್ಟೆಪ್ಸ್!

ಗೋವಿಂದ ಜೊತೆ ರಾರಾ ಸಾಮಿ ಸ್ಟೆಪ್ಸ್

ಹಿಂದಿ ಕಿರುತೆರೆಯಲ್ಲಿ 'ಡ್ಯಾನ್ ಇಂಡಿಯಾ ಡ್ಯಾನ್ಸ್ ಸೂಪರ್ ಮಾಮ್ಸ್' ಸೀಸನ್ 3 ಸಕ್ಸಸ್ ಕಂಡಿದೆ. ಈ ವಾರ ಗ್ರ್ಯಾಂಡ್‌ ಫಿನಾಲೆ ನಡೆದಿದೆ. ಶೋಗೆ ಅತಿಥಿಗಳಾಗಿ ರಶ್ಮಿಕಾ ಮಂದಣ್ಣ ಹಾಗೂ ಖ್ಯಾತ ನಟ ಗೋವಿಂದ ಭಾಗಿಯಾಗಿದ್ದಾರೆ. ಇಬ್ಬರು ಸೇರಿ 'ಪುಷ್ಪ' ಚಿತ್ರದ 'ರಾ ರಾ ಸಾಮಿ' ಹಾಡಿಗೆ ಬಿಂದಾಸ್ ಆಗಿ ಕುಣಿದಿದ್ದಾರೆ. ಇದರ ಸಣ್ಣ ಪ್ರೋಮೊ ರಿಲೀಸ್ ಆಗಿ ವೈರಲ್ ಆಗಿದೆ. ಥೇಟ್ ಶ್ರೀವಲ್ಲಿ ತರ ಗೋವಿಂದ ಕೂಡ ಸ್ಟೆಪ್ಸ್ ಹಾಕಿ ಗಮನ ಸೆಳೆದಿದ್ದಾರೆ. ರಾತ್ರಿ 9 ಗಂಟೆಗೆ ಕಾರ್ಯಕ್ರಮ ಪ್ರಸಾರವಾಗಲಿದೆ.

'ರಾ ರಾ ಸಾಮಿ' ಸಾಂಗ್ ಸೂಪರ್ ಹಿಟ್

ಸುಕುಮಾರ್ ನಿರ್ದೇಶನದ 'ಪುಷ್ಪ' ಚಿತ್ರದಲ್ಲಿ ಅಲ್ಲು ಅರ್ಜುನ್ ಜೋಡಿಯಾಗಿ ರಶ್ಮಿಕಾ ಮಂದಣ್ಣ ಮಿಂಚಿದ್ದಾರೆ. ಪುಷ್ಪರಾಜ್ ಪ್ರೇಯಸಿ ಶ್ರೀವಲ್ಲಿಯಾಗಿ ಡೀಗ್ಲಾಮರಸ್ ರೋಲ್‌ನಲ್ಲಿ ಗಮನ ಸೆಳೆದಿದ್ದರು. ಲಂಗಾ ದಾವಣಿಯಲ್ಲಿ 'ರಾ ರಾ ಸಾಮಿ' ಎಂದು ಕುಣಿದು ರಂಗೇರಿಸಿದ್ದರು. ದೇವಿಶ್ರೀ ಪ್ರಸಾದ್ ಮ್ಯೂಸಿಕ್‌ನಲ್ಲಿ ಸಾಂಗ್ ಸೂಪರ್ ಹಿಟ್ ಆಗಿತ್ತು. ಸಿನಿಮಾ ಹಿಂದಿಗೂ ಡಬ್ ಆಗಿ ಬಾಕ್ಸಾಫೀಸ್ ಶೇಕ್ ಮಾಡಿತ್ತು. ಹಾಗಾಗಿ ಉತ್ತರ ಭಾರತದಲ್ಲೂ ಈ ಸಾಂಗ್‌ಗೆ ಭಾರೀ ಕ್ರೇಜ್ ಇದೆ. ರಶ್ಮಿಕಾ ಎಲ್ಲೋ ಹೋದ್ರು, ಎಲ್ಲೇ ಬಂದ್ರು ಇದೇ ಸಾಂಗ್‌ಗೆ ಡ್ಯಾನ್ಸ್ ಮಾಡ್ತಿದ್ದಾರೆ.

ಅಮಿತಾಭ್ ಮಗಳಾಗಿ ರಶ್ಮಿಕಾ ನಟನೆ

ವಿಕಾಸ್ ಬೆಹ್ಲ್ ನಿರ್ದೇಶನದ 'ಗುಡ್‌ಬೈ' ಚಿತ್ರದಲ್ಲಿ ಅಮಿತಾಭ್ ಹಾಗೂ ರಶ್ಮಿಕಾ ತಂದೆ ಮಗಳ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇದೊಂದು ಕಾಮಿಡಿ ಎಂಟರ್‌ಟೈನರ್ ಸಿನಿಮಾ ಆಗಿದ್ದು, ಕೊಂಚ ಎಮೋಷನಲ್ ಸನ್ನಿವೇಶಗಳು ಇದೆ. ಸದಾ ಜಗಳ ಮಾಡುವ ತಂದೆ-ಮಗಳು. ದಿಢೀರನೇ ತಾಯಿ ಕೊನೆಯುಸಿರೆಳೆಯುತ್ತಾರೆ. ಮುಂದೇನಾಗುತ್ತೆ? ತಂದೆ, ಮಗಳ ಗಲಾಟೆ ನಿಲ್ಲುತ್ತಾ? ಅನ್ನುವುದನ್ನು ತೆರೆಮೇಲೆ ನೋಡಬೇಕು. ಈಗಾಗಲೇ 'ಗುಡ್‌ಬೈ' ಟ್ರೈಲರ್ ಹಾಗೂ ಸಾಂಗ್ಸ್ ರಿಲೀಸ್ ಆಗಿ ಹಿಟ್ ಆಗಿದೆ.

ರಶ್ಮಿಕಾ ಮೊಣಕಾಲು ನೋವಿಗೆ ಚಿಕಿತ್ಸೆ

ರಶ್ಮಿಕಾ ಇತ್ತೀಚೆಗೆ ಮೊಣಕಾಲಿನ ನೋವಿನ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಹೀಗಾಗಿ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆದುಕೊಂಡಿದ್ದಾರೆ. ಈ ಬಗ್ಗೆ ಹೈದಾಬಾದ್‍ನ ಪ್ರಮುಖ ಆರ್ಥೋ ಸ್ಪೆಷಲಿಸ್ಟ್ ಗುರುವಾ ರೆಡ್ಡಿ ಫೇಸ್‍ಬುಕ್‍ನಲ್ಲಿ ಫೋಟೋ ಸಮೇತ ಮಾಹಿತಿ ಹಂಚಿಕೊಂಡಿದ್ದರು. ಸತತ ಚಿತ್ರೀಕರಣಲ್ಲಿರುವ ರಶ್ಮಿಕಾ ಮೊಣಕಾಲಿನ ಸಮಸ್ಯೆಗೆ ಒಳಗಾಗಿದ್ದಾರೆ. ಆರ್ಥೋ ಸ್ಪೆಷಲಿಸ್ಟ್ ಗುರುವಾ ರೆಡ್ಡಿ ನಟಿಗೆ ಚಿಕಿತ್ಸೆ ನೀಡಿದ್ದಾರೆ. 'ಸಾಮಿ..ಸಾಮಿ.. ಎಂದು ಮೊಣಕಾಲಿನ ಮೇಲೆ ಭಾರ ಹಾಕಿ ಡ್ಯಾನ್ಸ್ ಮಾಡುತ್ತಿದ್ದೀರಿ.. ಈಗ ನೋವು ಬಂದಿದೆ! ಮೊಣಕಾಲು ನೋವಿನಿಂದ ನನ್ನ ಬಳಿಗೆ ಬಂದಿದ್ದೀರಿ ಅಂತಾ ಶ್ರೀವಲ್ಲಿಗೆ ನಾನು ಹೇಳಿದೆ' ಎಂದು ತಮಾಷೆಯಾಗಿ ವೈದ್ಯರು ಪೋಸ್ಟ್ ಮಾಡಿದ್ದರು.