ವಿಕ್ರಂವೇದ ಹಿಂದಿ ರೀಮೇಕ್: ಹೃತಿಕ್ ರೋಷನ್ ಮತ್ತು ಸೈಫ್ ಅಲಿ ಖಾನ್ ಪಕ್ಕಾ

2017ರ ತಮಿಳು ಸೂಪರ್ ಹಿಟ್ ಚಿತ್ರ ವಿಕ್ರಂವೇದ ರೀಮೇಕ್ ಹಕ್ಕು ಎಲ್ಲ ಭಾಷೆಯಲ್ಲೂ ಮಾರಾಟವಾಗಿದೆ. ಪುಷ್ಕರ್ ಗಾಯಿತ್ರಿ ನಿರ್ದೇಶಿಸಿದ್ದ ಈ ಚಿತ್ರವನ್ನು ಎಸ್ ಶ್ರೀಕಾಂತ್ ನಿರ್ಮಾಣ ಮಾಡಿದ್ದರು. ಆರ್ ಮಾಧವನ್ ಮತ್ತು ವಿಜಯ್ ಸೇತುಪತಿ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದರು.

ಹಿಂದಿಯಲ್ಲಿ ಈ ಪಾತ್ರಗಳನ್ನು ಯಾರು ಮಾಡಬಹುದು ಎಂಬ ಭಾರಿ ಕುತೂಹಲ ಕಾಡುತ್ತಿತ್ತು. ಬಿಟೌನ್ ಇಂಡಸ್ಟ್ರಿಯ ದಿಗ್ಗಜರ ಹೆಸರುಗಳೆಲ್ಲ ಈ ಚಿತ್ರಕ್ಕಾಗಿ ಕೇಳಿ ಬಂತು. ಅಂತಿಮವಾಗಿ ಹೃತಿಕ್ ರೋಷನ್ ಮತ್ತು ಸೈಫ್ ಅಲಿ ಖಾನ್ ಪಕ್ಕಾ ಆಗಿದ್ದಾರೆ.

ವಿಜಯ್ ಸೇತುಪತಿ ಪಾತ್ರದಲ್ಲಿ ಹೃತಿಕ್ ರೋಷನ್ ಮತ್ತು ಆರ್ ಮಾಧವನ್ ಪಾತ್ರದಲ್ಲಿ ಸೈಫ್ ಅಲಿ ಖಾನ್ ನಟಿಸುವುದು ಬಹುತೇಕ ಖಚಿತವಾಗಿದೆ. ಈ ಚಿತ್ರವನ್ನು ಸಹ ಪುಷ್ಕರ್ ಗಾಯಿತ್ರಿ ಅವರೇ ನಿರ್ದೇಶಿಸುತ್ತಿದ್ದಾರೆ.

ಸದ್ಯ ಈ ಇಬ್ಬರು ಕಲಾವಿದರು ಮಾತ್ರ ಅಧಿಕೃತವಾಗಿ ಶ್ರದ್ಧಾ ಶ್ರೀನಾಥ್, ಕತೀರ್, ವರಲಕ್ಷ್ಮಿ ಶರತ್ ಕುಮಾರ್ ಕಾಣಿಸಿಕೊಂಡಿದ್ದ ಪಾತ್ರಗಳಲ್ಲಿ ಯಾರು ನಟಿಸಬಹುದು ಎಂಬ ಚರ್ಚೆ ನಡೆಯುತ್ತಿದೆ.

ಕೇವಲ 10 ಕೋಟಿ ಬಜೆಟ್‌ನಲ್ಲಿ ಸಿದ್ಧವಾಗಿದ್ದ ಈ ಚಿತ್ರ 50ಕ್ಕೂ ಹೆಚ್ಚು ಕೋಟಿ ಗಳಿಸಿತ್ತು ಎಂದು ತಮಿಳು ಬಾಕ್ಸ್ ಆಫೀಸ್‌ನಲ್ಲಿ ವರದಿಯಾಗಿದೆ. ಇದೀಗ, ಹಿಂದಿಯಲ್ಲಿ ವೈ ನಾಟ್ ಸ್ಟುಡಿಯೋಸ್ ಮತ್ತು ನೀರಜ್ ಪಾಂಡೆ ನಿರ್ಮಾಣ ಮಾಡಲು ಮುಂದಾಗಿದ್ದಾರೆ. ಇನ್ನುಳಿದಂತೆ ಯಾವಾಗ ಸಿನಿಮಾ ಆರಂಭವಾಗಬಹುದು ಎಂದು ಅಧಿಕೃತವಾಗಿಲ್ಲ.