46ನೇ ವಯಸ್ಸಿನಲ್ಲಿ "ಅಮ್ಮ ಆಗ್ತಿದ್ದೀನಿ" ಎಂದು ವಿಡಿಯೋ ಬಿಟ್ಟ 'ಸೂರ್ಯವಂಶ' ನಟಿ: ಆದ್ರೆ ಕೊನೆಯಲ್ಲೊಂದು ಟ್ವಿಸ್ಟ್

ಕನ್ನಡದ ಎವರ್‌ಗ್ರೀನ್ ಸಿನಿಮಾ 'ಸೂರ್ಯವಂಶ' ನೋಡಿದವರಿಗೆ ಈ ನಟಿ ಯಾರು ಅನ್ನೋದನ್ನು ಹೇಳಬೇಕಿಲ್ಲ. ಸಾಹಸ ಸಿಂಹ ವಿಷ್ಣುವರ್ಧನ್ ಜೊತೆ ನಾಯಕಿಯಾಗಿ ನಟಿಸಿದ್ದ ಮುಂಬೈ ನಟಿ ಇಂದಿಗೂ ಚಿರಪರಿಚಿತ. ಹಾಗಂತ ಕನ್ನಡ ಅಷ್ಟೇ ಅಲ್ಲ, ಹಿಂದಿ ಚಿತ್ರರಂಗದಲ್ಲೂ ಈಕೆ ಜನಪ್ರಿಯರ ನಟಿ.

ಕನ್ನಡದಲ್ಲೂ ಐದು ಸಿನಿಮಾಗಳಲ್ಲಿ ನಟಿಸಿದ್ದಾರೆ. 'ಸೂರ್ಯವಂಶ','ಹೂ ಅಂತಿಯಾ ಹೂಂ ಅಂತಿಯಾ', 'ಓ ನನ್ನ ನಲ್ಲೆ', 'ಲೂಟಿ' ಹಾಗೂ ನಾಲ್ಕು ವರ್ಷಗಳ ಹಿಂದಷ್ಟೇ ತೆರೆಕಂಡಿರೋ 'ಕವಚ' ಸಿನಿಮಾದಲ್ಲಿ ನಟಿಸಿದ್ದರು.

ನಿನ್ನೆಯಷ್ಟೇ (ಜೂನ್ 23) ಇಶಾ ಕೊಪ್ಪಿಕರ್ ವಿಡಿಯೋ ಒಂದನ್ನು ಶೇರ್ ಮಾಡಿದ್ದರು. ಅಲ್ಲದೆ ಖುಷಿ ವಿಷಯವೊಂದಿದೆ. ಅದನ್ನು ನಿಮ್ಮೊಂದಿಗೆ ಮುಚ್ಚಿಟ್ಟಿದ್ದೆ ಎಂದು ತನ್ನ ಮಗುವಿನ ಅಲ್ಟ್ರಾಸಾನೋಗ್ರಾಫಿಕ್ ಫೋಟೊವನ್ನು ತೋರಿಸಿದ್ದರು. ಈ ವಿಡಿಯೋವನ್ನು ನೋಡಿದವರಿಗೆ ಸೂರ್ಯವಂಶದ ನಟಿ 46ನೇ ವಯಸ್ಸಿಗೆ ಎರಡನೇ ಮಗುವಿಗೆ ತಾಯಿಯಾಗುತ್ತಿದ್ದಾರೆ ಅಂದು ವಿಶ್ ಮಾಡಿದ್ದಾರೆ. ಆದರೆ, ವಿಡಿಯೋದ ಕೊನೆಯಲ್ಲಿ ಚಿಕ್ಕದೊಂದು ಟ್ವಿಸ್ಟ್ ಕೊಟ್ಟಿದ್ದಾರೆ.

ಎರಡನೇ ಬಾರಿ ತಾಯಿ ಆಗ್ತಿದ್ದಾರಾ?

ಇಶಾ ಕೊಪ್ಪಿಕರ್‌ಗೆ ಈಗ 46 ವರ್ಷ ವಯಸ್ಸು. ಈ ವಯಸ್ಸಲ್ಲಿ ತಾಯಿ ಆಗೋದು ತೀರಾ ಅಪರೂಪ. ಹೀಗಾಗಿ 'ಸೂರ್ಯವಂಶ' ನಟಿ ಕೊಟ್ಟ ಗುಡ್ ನ್ಯೂಸ್‌ಗೆ ಅವರ ಅಭಿಮಾನಿಗಳು ಕೂಡ ಖುಷಿಯನ್ನು ವ್ಯಕ್ತಪಡಿಸಿದ್ದರು. ಇಶಾ ಕೊಪ್ಪಿಕರ್ ತನ್ನ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡ ವಿಡಿಯೋದಲ್ಲಿ ಅಲ್ಟ್ರಾಸಾನೋಗ್ರಾಫಿಕ್ ಫೋಟೊವನ್ನು ತೋರಿಸಿದ್ದರು. ಇಲ್ಲೇ ನೆಟ್ಟಿಗರು ಯಾಮಾರಿದ್ದರು.

ಈ ವಿಡಿಯೋದಲ್ಲಿ ಕೊನೆಯಲ್ಲಿ ಅದು ಇಶಾ ಕೊಪ್ಪಿಕರ್ ಅಲ್ಲ. ಅವರ ಮನೆಯ ಸಾಕು ನಾಯಿ ಅನ್ನೋದು ಬಹಿರಂಗವಾಗಿದೆ. ಇಶಾ ಕೊಪ್ಪಿಕರ್ ಈಗ ತನ್ನ ಮುದ್ದಿನ ನಾಯಿ ತಾಯಿಯಾಗಿದ್ದಾಳೆ ಎಂದು ಪರಿಚಯಿಸಿದ ರೀತಿ ಹೃದಯಸ್ಪರ್ಶಿಯಾಗಿತ್ತು. ಶ್ವಾನ ಪ್ರಿಯರು ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

ಇಶಾ ಕೊಪ್ಪಿಕರ್ ಒಬ್ಬಳೇ ಮಗಳು

ಇಶಾ ಕೊಪ್ಪಿಕರ್ 29 ನವೆಂಬರ್ 2009 ರಂದು ಟಿಮ್ಮಿ ನಾರಂಗ್ ಎಂಬುವವರನ್ನು ವಿವಾಹವಾಗಿದ್ದು, 2014ರಲ್ಲಿ ಅವರು ಪುತ್ರಿ ರಿಯಾನಾಗೆ ಜನ್ಮ ನೀಡಿದ್ದರು. ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದರೂ, ತನ್ನ ಮಗಳೊಂದಿಗೆ ಹೆಚ್ಚು ಕಾಲ ಕಳೆಯುತ್ತಾಳೆ. ಪುತ್ರಿಯೊಂದಿಗೆ ಉತ್ತಮ ಬಾಂಧವ್ಯವನ್ನು ಹೊಂದಿದ್ದಾರೆ.

ತಮ್ಮ ಹಲವು ಸಂದರ್ಶನಗಳಲ್ಲಿ ತಾಯ್ತುನದ ಬಗ್ಗೆ ಮುಕ್ತವಾಗಿ ಮಾತಾಡಿದ್ದಾರೆ. ಮಗಳೊಂದಿಗೆ ಹೇಗೆ ನಡೆದುಕೊಳ್ಳುತ್ತಾರೆ? ವೃತ್ತಿ ಹಾಗೂ ವೈಯಕ್ತಿಕ ಬದುಕನ್ನು ಹೇಗೆ ನಿಭಾಯಿಸುತ್ತಾರೆ. ಅವಿಭಕ್ತ ಕುಟುಂಬದಲ್ಲಿದ್ದರೂ, ಸಂಸಾರ ನಡೆಸುವುದು ಹೇಗೆ ಎಂದು ವಿವರಿಸಿದ್ದರು.

ಸಿನಿಮಾಗಳಲ್ಲೂ ಬ್ಯುಸಿ

ಇಶಾ ಕೊಪ್ಪಿಕರ್ ಹಿಂದಿ ಜೊತೆ ಕನ್ನಡ, ತಮಿಳು, ತೆಲುಗು ಹಾಗೂ ಮರಾಠಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಅದರಲ್ಲೂ ಬಾಲಿವುಡ್‌ನ 'ಕಂಪನಿ', 'ಕಾಂಠೆ', 'ಡಾನ್' ಅಂತಹ ಯಶಸ್ವಿ ಸಿನಿಮಾಗಳ ನಟಿಯೀಕೆ. ಅಲ್ಲದೆ ಇಶಾ ಕೊಪ್ಪಿಕರ್ ನಟನೆ ಜೊತೆ ಜೊತೆಗೆ 'ಹಾಸ್ಪಿಟಾಲಿಟಿ ಕಂಪನಿ'ಯನ್ನೂ ನಡೆಸುತ್ತಿದ್ದಾರೆ.

'ಸೂರ್ಯವಂಶ'ದ ನಾಯಕಿ ಇತ್ತೀಚೆಗೆ ಹೆಚ್ಚು ಸಿನಿಮಾಗಳಲ್ಲಿ ನಟಿಸುತ್ತಿಲ್ಲ. ನಾಲ್ಕು ವರ್ಷಗಳ ಹಿಂದೆ ಶಿವಣ್ಣ ನಟಿಸಿದ 'ಕವಚ' ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಕನ್ನಡದಲ್ಲಿ ನಟಿಸಿದ್ದು ಅದೇ ಕೊನೆ. ಅದು ಬಿಟ್ಟರೆ ಹಿಂದಿಯಲ್ಲೂ ಕಳೆದ ನಾಲ್ಕು ವರ್ಷಗಳಲ್ಲಿ ಎರಡು ಸಿನಿಮಾಗಳಲ್ಲಿ ನಟಿಸಿದ್ದಾರಷ್ಟೆ. ಸದ್ಯ ತಮಿಳಿನಲ್ಲಿ ಶಿವಕಾರ್ತಿಕೇಯನ್ ನಟಿಸಿದ 'ಅಯಲಾನ್' ಸಿನಿಮಾದಲ್ಲಿ ನಟಿಸಿದ್ದಾರೆ. ಆ ಸಿನಿಮಾ ಇನ್ನೂ ಬಿಡುಗಡೆಯಾಗಬೇಕಿದೆ.