ಆರನೇ ಪರೀಕ್ಷೆಯಲ್ಲಿ ಕೊರೊನಾ ನೆಗೆಟಿವ್ ಆದ ಗಾಯಕಿ ಕನಿಕಾ ಕಪೂರ್

ಗಣ್ಯರ ಜೊತೆ ಪಾರ್ಟಿ ಮಾಡಿದ್ದ ಕನಿಕಾ ಕಪೂರ್‌

ಕನ್ನಿಕಾ ಕಪೂರ್ ವಿದೇಶದಿಂದ ಬಂದಿದ್ದರೂ ಸಹ ಕ್ವಾರೆಂಟೈನ್‌ಗೆ ಒಳಗಾಗದೆ, ಅಧಿಕಾರಿಗಳಿಗೆ ಮಾಹಿತಿಯನ್ನೂ ನೀಡದೆ, ಗಣ್ಯರ ಜೊತೆ ಪಾರ್ಟಿ ಮಾಡಿದ್ದರು. ಅವರೊಂದಿಗೆ ರಾಜಸ್ಥಾನ ಮಾಜಿ ಸಿಎಂ ವಸುಂಧರಾ ರಾಜೆ ಮತ್ತು ಅವರ ಮಗ ಸಂಸದ ದುಷ್ಯಂತ್ ಸಿಂಗ್ ಸಹ ಪಾರ್ಟಿಯಲ್ಲಿ ಭಾಗವಹಿಸಿದ್ದರು.

ಇನ್ನೊಂದು ಪರೀಕ್ಷೆ ನೆಗೆಟಿವ್ ಬರಬೇಕಿದೆ

ಕನಿಕಾ ಕಪೂರ್‌ ಕೊರೊನಾ ನೆಗೆಟಿವ್ ಎಂದು ಈಗಲೇ ಮನೆಗೆ ಹೋಗುವಂತಿಲ್ಲ, ಅವರಿಗೆ ಇನ್ನೂ ಒಂದು ವರದಿ ನೆಗೆಟಿವ್ ಬಂದ ಬಳಿಕವಷ್ಟೆ ಕನ್ನಿಕಾ ಕೊರೊನಾದಿಂದ ಮುಕ್ತರಾಗಿದ್ದಾರೆ ಎನ್ನಬಹುದು. ಇನ್ನೊಂದು ಪರೀಕ್ಷೆ ನೆಗೆಟಿವ್ ಬಂದ ನಂತರವೂ ಅವರು ಮನೆಯಲ್ಲಿ 14 ದಿನ ಕ್ವಾರೆಂಟೈನ್‌ನಲ್ಲಿ ಇರಬೇಕಾಗುತ್ತದೆ.

ಪ್ರವಾಸ ಮಾಹಿತಿಯನ್ನು ಮುಚ್ಚಿಟ್ಟಿದ್ದ ಕನಿಕಾ

ಕನಿಕಾ ಕಪೂರ್ ತಮ್ಮ ಪ್ರವಾಸ ಮಾಹಿತಿಯನ್ನು ಮುಚ್ಚಿಟ್ಟಿದ್ದಕ್ಕೆ ನೆಟ್ಟಿಗರಿಂದ ಬೈಗುಳ ಕೇಳಬೇಕಾಯಿತು. ಅಲ್ಲದೆ ಪಿಐಜಿ ಆಸ್ಪತ್ರೆಯವರು ಸಹ ಕನ್ನಿಕಾ ವರ್ತನೆ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿ, ಆಕೆ ಸೆಲೆಬ್ರಿಟಿಯಂತೆ ವರ್ತಿಸುವುದನ್ನು ಬಿಡಬೇಕು ಎಂದು ತಪರಾಕಿ ಹಾಕಿದ್ದರು.

ಪಾರ್ಲಿಮೆಂಟನ್ನೇ ಅಲ್ಲಾಡಿಸಿದ್ದ ಕನಿಕಾ ಕಪೂರ್

ಕನಿಕಾ ಕಪೂರ್ ಪ್ರಕರಣ ಪಾರ್ಲಿಮೆಂಟ್ ಅನ್ನೇ ಅಲ್ಲಾಡಿಸಿತ್ತು. ಕನ್ನಿಕಾ ಕಪೂರ್ ಜೊತೆ ನೇರ ಸಂಪರ್ಕದಲ್ಲಿದ್ದ ವಸುಂಧರಾ ರಾಜೆ, ದುಷ್ಯಂತ್ ಸಿಂಗ್, ಪಾರ್ಟಿಯ ಮಾರನೇ ದಿನವೇ ಪಾರ್ಲಿಮೆಂಟ್‌ಗೆ ಹೋಗಿದ್ದರು. ದುಷ್ಯಂತ್ ಸಿಂಗ್ ಅವರು ರಾಷ್ಟ್ರಪತಿಗಳನ್ನೂ ಭೇಟಿ ಆಗಿದ್ದರು. ರಾಷ್ಟ್ರಪತಿಗಳು ಪರೀಕ್ಷೆಗೆ ಒಳಪಟ್ಟರು, ವರದಿ ನೆಗೆಟಿವ್ ಬಂತು. ಸ್ಮೃತಿ ಇರಾನಿ ಸೇರಿದಂತೆ ಮಂತ್ರಿಗಳು, ಸಂಸದರು ಭೀತಿಯಿಂದ ಪರೀಕ್ಷೆಗೆ ಒಳಗಾದರು.