ಕರೀನಾ-ಸೈಫ್ ಎರಡನೇ ಮಗು ಹೆಸರು: ಮತ್ತೆ ಟ್ರೋಲ್‌ಗೆ ಗುರಿಯಾದ ದಂಪತಿ

ಜಹಾಂಗೀರ್, ಖಿಲ್ಜಿ, ಔರಂಗಜೇಬ್ ಇಟ್ಕೊಳಿ

ಕರೀನಾ ಕಪೂರ್ ಮತ್ತು ಸೈಫ್ ಅಲಿ ಖಾನ್ ಎರಡನೇ ಮಗನಿಗೆ ಜಹಾಂಗೀರ್ ಅಲಿ ಖಾನ್ ಎಂದು ಹೆಸರಿಡಲಾಗಿದೆ ಎನ್ನುವ ವಿಚಾರ ಬಯಲಾಗುತ್ತಿದಂತೆ ಕೆಲವರು ವಿರೋಧಿಸಿದ್ದಾರೆ. ಜಹಾಂಗೀರ್, ಖಿಲ್ಜಿ, ಔರಂಗಜೇಬ್ ಮಾಡ್ಕೊಳ್ಳಿ ಎಂದು ಖಂಡಿಸಿದ್ದಾರೆ. ಇನ್ನು ಕೆಲವರು ತಮ್ಮ ಮಕ್ಕಳಿಗೆ ಏನು ಹೆಸರಿಡಬೇಕು ಎನ್ನುವುದ ಅವರಿಗೆ ಬಿಟ್ಟಿದ್ದು, ಅವರಿಗೆ ಆ ಸ್ವಾತಂತ್ರ್ಯ ಇದೆ ಎಂದು ಬೆಂಬಲಕ್ಕೆ ನಿಂತಿದ್ದಾರೆ.

ತಂದೆಯ ಹೆಸರಿಡಬೇಕು ಎನ್ನುವ ಆಸೆ

ಜಹಾಂಗೀರ್ ಅಥವಾ ಮನ್ಸೂರ್ ಎಂಬ ಹೆಸರುಗಳು ಕರೀನಾ ಮತ್ತು ಸೈಫ್ ಎದುರು ಆಯ್ಕೆಯಾಗಿತ್ತು. ಅದರಲ್ಲಿ ಜಹಾಂಗೀರ್ ಎಂಬ ಹೆಸರು ಅಂತಿಮಗೊಳಿಸಿದ್ದಾರೆ ಎನ್ನಲಾಗಿದೆ. ಅಂದ್ಹಾಗೆ, ಮನ್ಸೂರ್ ಎನ್ನುವುದು ಸೈಫ್ ಅಲಿ ಖಾನ್ ತಂದೆ, ಖ್ಯಾತ ಕ್ರಿಕೆಟಿಗ ಮನ್ಸೂರ್ ಅಲಿ ಖಾನ್ ಪಟೌಡಿಯ ಹೆಸರಾಗಿತ್ತು. ಇನ್ನು ಫೆಬ್ರವರಿ 22 ರಂದು ಮುಂಬೈನ ಬ್ರಿಡ್ಜ್ ಕ್ಯಾಂಡಿ ಹಾಸ್ಪಿಟಲ್‌ನಲ್ಲಿ ಕರೀನಾ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಎರಡನೇ ಮಗುವನ್ನು ಸ್ವಾಗತಿಸಿ ಸುಮಾರು ಆರು ತಿಂಗಳು ಕಳೆದಿದೆ.

ತೈಮೂರ್ ಹೆಸರಿಟ್ಟಾಗ ಟೀಕೆ

ಈ ಹಿಂದೆ ಮೊದಲ ಮಗನಿಗೆ ತೈಮೂರ್ ಅಲಿ ಖಾನ್ ಎಂದು ಹೆಸರಿಟ್ಟಾಗ ವಿವಾದಕ್ಕೆ ಕಾರಣವಾಗಿತ್ತು. ನೆಟ್ಟಿಗರು ಕರೀನಾ ಮತ್ತು ಸೈಫ್ ದಂಪತಿಯ ವಿರುದ್ಧ ಕಿಡಿಕಾರಿದ್ದರು. ತೈಮೂರ್ ಓರ್ವ ಸರ್ವಾಧಿಕಾರಿ, ಭಾರತದ ಮೇಲೆ ದಾಳಿ ನಡೆಸಿ, ದೆಹಲಿಯಲ್ಲಿ ನೂರಾರು ಮಂದಿಯನ್ನು ಹತ್ಯೆ ಮಾಡಿದ್ದ' ಎಂದು ಇತಿಹಾಸದಲ್ಲಿ ಉಲ್ಲೇಖಿಸಲಾಗಿದೆ. ಅಂತಹ ವ್ಯಕ್ತಿಯ ಹೆಸರನ್ನು ಮಗನಿಗೆ ಇಡಲಾಗಿದೆ ಎಂದು ಆಕ್ರೋಶ ವ್ಯಕ್ತವಾಗಿತ್ತು. ಹಾಗಾಗಿ, ಈ ಹೆಸರು ಕೈಬಿಡುವಂತೆ ಒತ್ತಾಯಿಸಿದ್ದರು. ಇದಕ್ಕೆ ಹೆಚ್ಚು ತಲೆಕೆಡಿಸಿಕೊಳ್ಳಲಿಲ್ಲ ಕರೀನಾ-ಸೈಫ್ ದಂಪತಿ.

ಮತ್ತೆ ವಿವಾದ ಆಗಬಹುದು ಎಂಬ ಲೆಕ್ಕಾಚಾರ

ತೈಮೂರ್ ಹೆಸರಿಟ್ಟಾಗ ಎದುರಾದ ಟೀಕೆಯ ಪರಿಣಾಮ ಕಪೂರ್ ದಂಪತಿಗೆ ತಿಳಿದಿದೆ. ಹಾಗಾಗಿ, ಎರಡನೇ ಮಗನಿಗೆ ಹೆಸರಿಡುವ ವಿಚಾರದಲ್ಲಿ ಬಹಳ ಎಚ್ಚರಿಕೆ ಹೆಜ್ಜೆ ಇಡಲಾಗುತ್ತಿದೆ. ಸಾಕಷ್ಟು ಸಮಯ ತೆಗೆದುಕೊಳ್ಳಲಾಗುತ್ತದೆ. ಸದ್ಯಕ್ಕೆ ಜಹಾಂಗೀರ್ ಅಲಿ ಖಾನ್ ಎನ್ನುವ ಹೆಸರು ಬಹಿರಂಗವಾಗಿದೆ. ಅಧಿಕೃತವಾಗಿ ಘೋಷಣೆಯಾಗಬೇಕಿದೆ.

ಸೈಫ್ ದಂಪತಿಯ ಸಿನಿಮಾಗಳು

ಸಿನಿಮಾ ವಿಚಾರಕ್ಕೆ ಬಂದ್ರೆ ಕರೀನಾ ಕಪೂರ್ ಲಾಲ್ ಸಿಂಗ್ ಚಡ್ಡಾದಲ್ಲಿ ನಟಿಸಿದ್ದಾರೆ. ಆ ಕಡೆ ಸೈಫ್ ಅಲಿ ಖಾನ್ ಅಭಿನಯದ ಭೂತ್ ಪೊಲೀಸ್, ಬಂಟಿ ಔರ್ ಬಬ್ಲಿ 2 ಸಿನಿಮಾಗಳು ತೆರೆಗೆ ಬರಲು ಸಜ್ಜಾಗಿದೆ. ಜೊತೆಗೆ ಪ್ರಭಾಸ್ ಜೊತೆಗಿನ ಆದಿಪುರುಶ್ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.