RRR ಭಾರತದ ಅತಿ ಕೆಟ್ಟ ಸಿನಿಮಾ, ರಾಜಮೌಳಿಗೆ ನಿರ್ದೇಶನ ಬರಲ್ಲ: KRK ವಿಮರ್ಶೆ

ಬಹಳ ಕೆಟ್ಟದಾಗಿವೆ ಸಿನಿಮಾದ ಡೈಲಾಗ್‌ಗಳು: ಕೆಆರ್‌ಕೆ

''ಸಿನಿಮಾದ ಡೈಲಾಗ್‌ಗಳಂತೂ ಬಹಳ ಕೆಟ್ಟದಾಗಿದೆ. ಬ್ರಿಟೀಷರ ಕಾಲದ ಸಿನಿಮಾ ಇದಾಗಿದೆ. ಸಿನಿಮಾದಲ್ಲಿ ಬಹಳಷ್ಟು ಜನ ಬ್ರಿಟೀಷರಿದ್ದಾರೆ ಹಾಗಾಗಿ ಬಹುತೇಕ ಸಂಭಾಷಣೆ ಇಂಗ್ಲೀಷ್‌ನಲ್ಲಿದೆ. ಸಿನಿಮಾದ ಒಟ್ಟು ಸಂಭಾಷಣೆಯ 40% ಇಂಗ್ಲೀಷ್‌ನಲ್ಲಿಯೇ ಇದೆ. ಸಿನಿಮಾ ಇಬ್ಬರು ನಾಯಕ ನಟರಿಗೆ ಹಿಂದಿ ಬರೊಲ್ಲ ಆದರೂ ಅವರೇ ಹಿಂದಿಯಲ್ಲಿ ಡಬ್ ಮಾಡಿದ್ದಾರೆ. ಹಾಗಾಗಿ ಅವರ ಡೈಲಾಗ್ ಬಹಳ ಕೆಟ್ಟದಾಗಿ ಕೇಳುತ್ತದೆ. ಇನ್ನು ಸಂಗೀತ ಸಹ ತೆಲುಗು ಸಂಗೀತ ಇದ್ದಹಾಗೆ ಇದೆ. ಇದು ಬಾಲಿವುಡ್‌ ಮಂದಿಗೆ ಬಹಳ ಕೆಟ್ಟ ಸಂಗೀತ ಎನಿಸುತ್ತದೆ. ಸಿನಿಮಾದ ಡೈರೆಕ್ಷನ್ ಅಂತೂ ಬಹಳ ಕೆಟ್ಟದಾಗಿದೆ.'' ಎಂದಿದ್ದಾರೆ ಕೆಆರ್‌ಕೆ.

ಆಕ್ಷನ್ ದೃಶ್ಯಗಳು ಹಾಸ್ಯ ದೃಶ್ಯಗಳಂತಿವೆ: KRK

''ಈ ಸಿನಿಮಾ ಒಂದು ಆಕ್ಷನ್ ಸಿನಿಮಾ. ಆದರೆ ಸಿನಿಮಾದ ಆಕ್ಷನ್ ದೃಶ್ಯಗಳನ್ನು ನೋಡಿದರೆ ನಗು ಬರುತ್ತದೆ. ತೆರೆಯ ಮೇಲೆ ಆಕ್ಷನ್ ನಡೆಯುತ್ತಿರುತ್ತದೆ, ಅದನ್ನು ನೋಡುತ್ತಿರುವ ಪ್ರೇಕ್ಷಕರು ಕುರ್ಚಿ ಮೇಲೆ ಕುಳಿತು ನಗುತ್ತಿರುತ್ತಾರೆ. ಅಂಥಹಾ ಆಕ್ಷನ್ ಈ ಸಿನಿಮಾದಲ್ಲಿದೆ. ರಾಜಮೌಳಿ ಮಾಡಿರುವುದು ನಿರ್ದೇಶಕನವೇ ಅಲ್ಲ. ಒಬ್ಬ ಸ್ಪಾಟ್‌ಬಾಯ್‌ ಮಾಡಬಹುದಾದ ಸಿನಿಮಾ ಮಾಡಿದ್ದಾರೆ. ರಾಜಮೌಳಿ ತನ್ನನ್ನು ತಾನು ಡೈರೆಕ್ಟರ್ ಎನ್ನುತ್ತಾರೆ. ಆದರೆ ಇಂಥಹಾ ಕೆಟ್ಟ ಸಿನಿಮಾ ಮಾಡಿದ್ದಾರೆ. ಹಾಗಾಗಿ ನಾನು ರಾಜಮೌಳಿಯನ್ನು ರಾಜಮೌಳಿ ಎನ್ನುವ ಬದಲಾಗಿ ರಾಜ'ಮೂಲಿ' ಎಂದು ಕರೆಯಲು ಇಷ್ಟಪಡುತ್ತೇನೆ. 600 ಕೋಟಿ ರುಪಾಯಿ ಖರ್ಚು ಮಾಡಿ ಇಷ್ಟು ಕೆಟ್ಟ ಸಿನಿಮಾ ಮಾಡಿರುವುದು ಡೈರೆಕ್ಷನ್ ಅಲ್ಲ ಬದಲಿಗೆ ಇದು ಅಪರಾಧ. ಇಂಥಹಾ ಕೆಟ್ಟ ಸಿನಿಮಾ ಮಾಡಿದ್ದಕ್ಕೆ ರಾಜಮೌಳಿಗೆ ಕನಿಷ್ಟ ಆರು ವರ್ಷ ಕಾರಾಗೃಹ ಶಿಕ್ಷೆ ಆಗಬೇಕು'' ಎಂದಿದ್ದಾರೆ ಕೆ.ಆರ್‌.ಕೆ.

ಹೀರೋಗಳು ಅತ್ಯಂತ ಕೆಟ್ಟದಾಗಿದ್ದಾರೆ: KRK

''ನಟನೆ ಬಗ್ಗೆ ಮಾತನಾಡುವುದಾದರೆ, ಅಜಯ್ ದೇವಗನ್‌ರದ್ದು ಎರಡು ಸೀನ್ ಇದೆ. ಆಲಿಯಾ ಭಟ್‌ರ ಹೆಸರಿಗಿಂತಲೂ ಅವರ ದೃಶ್ಯಗಳು ಚಿಕ್ಕದಾಗಿದೆ. ಇವರಿಬ್ಬರ ದೃಶ್ಯಗಳೇ ಬಹಳ ಚಿಕ್ಕದಾಗಿವೆ ಹಾಗಾಗಿ ನಾನು ಇವರಿಬ್ಬರ ನಟನೆ ಬಗ್ಗೆ ಮಾತನಾಡುವುದಿಲ್ಲ. ಇನ್ನು ಜೂ ಎನ್‌ಟಿಆರ್ ಹಾಗೂ ರಾಮ್ ಚರಣ್ ಸಿನಿಮಾದ ಮೂರು ಗಂಟೆ ಆಕ್ಷನ್‌ನಲ್ಲಿ ಬ್ಯುಸಿಯಾಗಿದ್ದರು ಹಾಗಾಗಿ ಅವರಿಗೆ ನಟನೆ ಮಾಡಲು ಆಗಿಯೇ ಇಲ್ಲ. ಅಷ್ಟೆ ಅಲ್ಲ ಅವರಿಬ್ಬರು ಕುಳ್ಳಗಿದ್ದಾರೆ. ನೋಡಲು ಕರಡಿ ರೀತಿ ಬಹಳ ಕೆಟ್ಟದಾಗಿದ್ದಾರೆ. ಹಿಂದಿ ಸೂಪರ್ ಸ್ಟಾರ್‌ಗಳಿಗೆ ಹೋಲಿಸಿದರೆ ನೋಡಲು ಬಹಳ ಕೆಟ್ಟದಾಗಿ ಕಾಣುತ್ತಾರೆ'' ಎಂದಿದ್ದಾರೆ ಕೆ.ಆರ್‌.ಕೆ.

ಸಿನಿಮಾದಲ್ಲಿ ಒಂದಂಶವೂ ಚೆನ್ನಾಗಿಲ್ಲ: KRK

''ಒಟ್ಟಿನಲ್ಲಿ 'RRR' ಸಿನಿಮಾ ಬಹಳ ಕೆಟ್ಟ ಸಿನಿಮಾ, ಇಡೀ ಸಿನಿಮಾದಲ್ಲಿ ನೋಡಲು ಒಂದಂಶವೂ ಚೆನ್ನಾಗಿಲ್ಲ. ನಿಮಗೆ ನಿಮ್ಮ ಮೆದುಳನ್ನು ಆಮ್ಲೇಟ್ ಮಾಡಿಕೊಳ್ಳಬೇಕು ಎಂದೆನಿಸಿದರೆ, ಬದುಕಿದ್ದಾಗಲೆ ಸತ್ತ ನಂತರದ ಅನುಭವ ಬೇಕೆಂದರೆ, 600 ಕೋಟಿ ಖರ್ಚು ಮಾಡಿ ಭಾರತದ ಅತಿ ಕೆಟ್ಟ ಸಿನಿಮಾ ಹೇಗೆ ಮಾಡಬಹುದು ಎಂಬುದು ತಿಳಿದುಕೊಳ್ಳಬೇಕೆನಿಸಿದರೆ ಮಾತ್ರ ಈ ಸಿನಿಮಾ ನೋಡಲು ಹೋಗಿ, ನಿಮ್ಮ ಸಮಯ, ಹಣ, ಶ್ರಮ ವ್ಯರ್ಥ ಮಾಡಿಕೊಂಡು ಸಿನಿಮಾ ನೋಡಿ. ನಾನು ಈ ಸಿನಿಮಾಗೆ ಸೊನ್ನೆ ಸ್ಟಾರ್ ಕೊಡುತ್ತೇನೆ. ಏಕೆಂದರೆ ಈ ಸಿನಿಮಾ 600 ಕೋಟಿ ರುಪಾಯಿಗೆ ಬೆಂಕಿ ಇಟ್ಟಿದೆ'' ಎಂದಿದ್ದಾರೆ ಕೆ.ಆರ್‌.ಖಾನ್. ಇವರ ಈ ವಿಮರ್ಶೆಗೆ ಹಲವರು ಆಕ್ರೋಶ ಹೊರಹಾಕಿದ್ದಾರೆ. ಈತನಿಗೆ ಸಿನಿಮಾ ನೋಡಲು ಬರುವುದಿಲ್ಲ ಎಂದಿದ್ದಾರೆ. ಕೆಆರ್‌ಕೆ ಇದು ಮೊದಲಲ್ಲ ಹಲವು ದಕ್ಷಿಣ ಭಾರತದ ಸಿನಿಮಾಗಳಿಗೆ ಹೀಗೆ ಬಹಳ ಕೆಟ್ಟ ವಿಮರ್ಶೆ ನೀಡಿದ್ದಾರೆ.