ಮದುವೆಗೆ ಮುನ್ನ ಸೆಕ್ಸ್ ನನ್ನಿಷ್ಟ: ದೀಪಿಕಾ ಪಡುಕೋಣೆ

ಬಾಲಿವುಡ್ ಬಿಂಕದ ಸಿಂಗಾರಿ ಮೈಡೊಂಕಿನ ಬಂಗಾರಿ ದೀಪಿಕಾ ಪಡುಕೋಣೆ ಪ್ರಧಾನವಾಗಿ ಕಾಣಿಸಿಕೊಂಡಿರುವ 'ಮೈ ಚಾಯ್ಸ್' ವಿಡಿಯೋ ಈಗ ಹೊಸ ಸಂಚಲನಕ್ಕೆ ಕಾರಣವಾಗಿದೆ. ಮಹಿಳೆಯರ ಸ್ವಾತಂತ್ರ್ಯದ ಬಗೆಗೆ ಈ ವಿಡಿಯೋ ಧ್ವನಿಯೆತ್ತಿದೆ.

ಭಾರತೀಯ ಸಮಾಜದಲ್ಲಿ ಮಹಿಳೆಯರ ಬಗ್ಗೆ ತೋರುತ್ತಿರುವ ಅಸಡ್ಡೆ, ಮಹಿಳೆಯ ಮೇಲೆ ನಡೆಯುತ್ತಿರುವ ದೌರ್ಜನ್ಯ, ಮಹಿಳೆಯ ಸ್ವೇಚ್ಛಾಚಾರಕ್ಕೆ ಸಮಾಜ ಅಡ್ಡಗಾಲು ಹಾಕುತ್ತಿರುವುದನ್ನು ಪ್ರಶ್ನಿಸುತ್ತಾ ಬ್ಲ್ಯಾಕ್ ಅಂಡ್ ವೈಟ್ ನ ಈ ವಿಡಿಯೋ ಎಲ್ಲರ ಗಮನಸೆಳೆದಿದೆ. [ದೀಪಿಕಾಗೆ ಇನ್ನೂ ಹಳೇ ಲವ್ವರ್ ದೇ ಚಿಂತೆ..!]

ಮಹಿಳೆಯರಲ್ಲಿನ ಸ್ವತಂತ್ರ ಭಾವನೆಗಳನ್ನು ಪ್ರತಿಬಿಂಬಿಸುವ ಈ ಕಿರುಚಿತ್ರಕ್ಕೆ ಬಾಲಿವುಡ್ ನಿರ್ದೇಶಕ ಹೋಮಿ ಅದಜನಿಯಾ ಆಕ್ಷನ್ ಕಟ್ ಹೇಳಿದ್ದಾರೆ. "ನಮ್ಮ ದೇಹ, ನಮ್ಮ ಮನಸ್ಸು, ನಮ್ಮಿಷ್ಟ" ಎನ್ನುತ್ತಾ ಮಹಿಳೆಯರು ನಮಗಿಷ್ಟ ಬಂದಂಗೆ ನಾವಿರುತ್ತೇವೆ ಎಂಬ ಉದ್ಘೋಷ ಕೂಗಿದ್ದಾರೆ.

ಈ ವಿಡಿಯೋದಲ್ಲಿ ವಿವಿಧ ಕ್ಷೇತ್ರಗಳಿಗೆ ಸಂಬಂಧಿಸಿದ 99 ಮಂದಿ ಮಹಿಳಾಮಣಿಗಳು ಭಾಗಿಯಾಗಿರುವುದು ವಿಶೇಷ. ಮಹಿಳೆಯರ ಸ್ವೇಚ್ಛತೆಯ ಬಗ್ಗೆ ಸಮಾಜಕ್ಕೆ ಬಲವಾದ ಸಂದೇಶವನ್ನು ರವಾನಿಸುವಂತೆ ಈ ವಿಡಿಯೋವನ್ನು ರೂಪಿಸಲಾಗಿದೆ. ಈ ವಿಡಿಯೋವನ್ನು ದೇಶದ ಎಲ್ಲಾ ಮಹಿಳೆಯರು ಹಾಗೂ ಸ್ತ್ರೀಶಕ್ತಿಗೆ ಅರ್ಪಿಸಲಾಗಿದೆ.

ಕೈಗೆ ಬಳೆ ತೊಡಬೇಕೆ, ಹಣೆಗೆ ಕುಂಕುಮ ಇಟ್ಟುಕೊಳ್ಳಬೇಕೆ, ಬಾಯ್ ಫ್ರೆಂಡ್ ಗರ್ಲ್ ಫ್ರೆಂಡ್ ನನಗೆ ಯಾರು ಬೇಕು ಬೇಡ ಎಂಬ ಆಯ್ಕೆ ನಮ್ಮದು. ನಮ್ಮ ಆಯ್ಕೆಯಲ್ಲಿ ಪುರುಷರು ಮೂಗು ತೂರಿಸಬೇಡಿ ಎಂಬುದು ಈ 'ಮೈ ಚಾಯ್ಸ್' ವಿಡಿಯೋದ ಸಂದೇಶ.