ಹೃದಯಾಘಾತದಿಂದ ಮೃತಪಟ್ಟ ಬಾಲಿವುಡ್ ನಟ ನರೇಂದ್ರ ಝಾ

2018... ಬಾಲಿವುಡ್ ಪಾಲಿಗೆ ಕರಾಳ ವರ್ಷ ಅಂತ ಕರೆದರೂ ತಪ್ಪಾಗಲ್ಲ. ಯಾಕಂದ್ರೆ, ಭಾರತೀಯ ಚಿತ್ರರಂಗದ ಮೊದಲ ಲೇಡಿ ಸೂಪರ್ ಸ್ಟಾರ್ ಶ್ರೀದೇವಿ ಹಾಗೂ ಶಮ್ಮಿ ಆಂಟಿ ಕೊನೆಯುಸಿರೆಳೆದಿದ್ದು ಇದೇ ವರ್ಷ.

ಎರಡು ಅನರ್ಘ್ಯ ರತ್ನಗಳನ್ನು ಕಳೆದುಕೊಂಡ ಬಾಲಿವುಡ್ ಗೆ ಈಗ ಮತ್ತೊಂದು ಆಘಾತ ಎದುರಾಗಿದೆ. ಖ್ಯಾತ ನಟ ನರೇಂದ್ರ ಝಾ ಇಹಲೋಕ ತ್ಯಜಿಸಿದ್ದಾರೆ. 55 ವರ್ಷದ ನರೇಂದ್ರ ಝಾ ಇಂದು ಬೆಳಗ್ಗೆ ಸುಮಾರು 5 ಗಂಟೆ ಸುಮಾರಿಗೆ ಹೃದಯಾಘಾತದಿಂದ ನಿಧನರಾದರು.

ವಾಡಾದಲ್ಲಿ ಇರುವ ತಮ್ಮ ಫಾರ್ಮ್ ಹೌಸ್ ನಲ್ಲಿ ನರೇಂದ್ರ ಝಾ ಮೃತಪಟ್ಟಿದ್ದಾರೆ. ಹೃದಯ ಸಂಬಂಧಿ ಖಾಯಿಲೆಯಿಂದ ಬಳಲುತ್ತಿದ್ದ ನರೇಂದ್ರ ಝಾ ಅವರಿಗೆ ಅದಾಗಲೇ ಎರಡು ಬಾರಿ ಹೃದಯಾಘಾತವಾಗಿತ್ತು. ಸೂಕ್ತ ಚಿಕಿತ್ಸೆ ಪಡೆದು ಎರಡು ಬಾರಿ ಪ್ರಾಣಾಪಾಯದಿಂದ ಪಾರಾಗಿದ್ದ ನರೇಂದ್ರ ಝಾ ಇಂದು ವಿಧಿವಶರಾದರು.

ಹೃತಿಕ್ ರೋಷನ್ ಅಭಿನಯದ 'ಕಾಬಿಲ್', 'ರಯೀಸ್', 'ಮೊಹೆಂಜೋ ದಾರೋ' ಸೇರಿದಂತೆ ಹಲವಾರು ಸಿನಿಮಾಗಳಲ್ಲಿ ಭಿನ್ನ-ವಿಭಿನ್ನ ಪಾತ್ರಗಳನ್ನು ನರೇಂದ್ರ ಝಾ ಪೋಷಿಸಿದ್ದರು.

ನರೇಂದ್ರ ಝಾ ನಿಧನಕ್ಕೆ ಬಾಲಿವುಡ್ ಖ್ಯಾತನಾಮರು ಕಂಬನಿ ಮಿಡಿದಿದ್ದಾರೆ.