ನಟಿ ಪ್ರಿಯಾಂಕಾ ಛೋಪ್ರಾಗೆ ಪಿತೃ ವಿಯೋಗ

ಬಾಲಿವುಡ್ ನಟಿ, ಮಾಜಿ ವಿಶ್ವ ಸುಂದರಿ ಪ್ರಿಯಾಂಕಾ ಛೋಪ್ರಾ ಅವರ ತಂದೆ ಡಾ. ಅಶೋಕ್ ಛೋಪ್ರಾ ಅವರು ಸೋಮವಾರ(ಜೂ.10) ಕೊನೆಯುಸಿರೆಳೆದಿದ್ದಾರೆ.

ಮುಂಬೈನ ಕೋಕಿಲಾಬೇನ್ ಅಂಬಾನಿ ಆಸ್ಪತ್ರೆಯಲ್ಲಿ ಬಹುಕಾಲದಿಂದ ಚಿಕಿತ್ಸೆ ಪಡೆಯುತ್ತಿದ್ದರು. 2008ರಿಂದ ಕ್ಯಾನ್ಸರ್ ಪೀಡಿತರಾಗಿದ್ದ ಅಶೋಕ್ ಅವರಿಗೆ ವಿವಿಧ ರೀತಿ ಚಿಕಿತ್ಸೆ ನೀಡಲಾಗಿತ್ತು. ಆದರೆ, ಯಾವುದೇ ರೀತಿ ಚಿಕಿತ್ಸೆ ಫಲಕಾರಿಯಾಗಲಿಲ್ಲ.

ಕಳೆದ ರಾತ್ರಿಯೇ ವೈದ್ಯರು ಪ್ರಿಯಾಂಕಾ ಛೋಪ್ರಾ ತಾಯಿ ಮಧು ಹಾಗೂ ಸೋದರನಿಗೆ ಅಶೋಕ್ ಅವರ ದೇಹಾರೋಗ್ಯ ಹದಗೆಟ್ಟಿದ್ದು 48 ಗಂಟೆಗಳಲ್ಲಿ ಉಳಿದರೆ ಹೆಚ್ಚು ಎಂದು ಹೇಳಿದ್ದರು ಎಂಬ ಸುದ್ದಿಯಿದೆ.

ಅಪ್ಪನ ಮಗಳು: ಹಿಂದಿ ಚಿತ್ರರಂಗದ ಬಹು ಜನಪ್ರಿಯ ತಾರೆಯಾಗಿರುವ ಪ್ರಿಯಾಂಕಾ ಛೋಪ್ರಾ ತನ್ನ ಮಾಡೆಲ್ ದಿನಗಳಿಂದ ಇಲ್ಲಿ ತನಕ ಎಲ್ಲಾ ಕಾರ್ಯಕ್ರಮಕ್ಕೆ ತನ್ನ ಅಪ್ಪನನ್ನು ಕರೆ ತರುತ್ತಿದ್ದರು. ವಿಶ್ವಸುಂದರಿ ಪಟ್ಟ, ಬಾಲಿವುಡ್ ನಲ್ಲಿ ಯಶಸ್ಸು ಎಲ್ಲವೂ ನನ್ನ ತಂದೆಗೆ ಅರ್ಪಿತ ಎಂದು ಹಲವು ಬಾರಿ ಘೋಷಿಸಿದ್ದರು. ಅಪ್ಪ ಎಂದರೆ ತುಂಬಾ ಇಷ್ಟಪಡುವ ಪ್ರಿಯಾಂಕಾ ಅವರು ಆಘಾತಕ್ಕೊಳಗಾಗಿದ್ದಾರೆ.