ರಸ್ತೆಯಲ್ಲಿ ಕುಣಿದ ಈ ಯುವತಿ ಯಾರು ಗೊತ್ತೆ? ನರ್ತಿಸಿದ್ದಕ್ಕಿದೆ ವಿಶೇಷ ಕಾರಣ

ಯುವತಿಯ ಹೆಸರು ಸಲೋನಿ ಸಾಟ್‌ಪುಟೆ

ವಿಡಿಯೋದಲ್ಲಿ ಕ್ಯೂಟ್ ಆಗಿ ಡಾನ್ಸ್‌ ಮಾಡುತ್ತಿರುವ ಯುವತಿಯ ಹೆಸರು ಸಲೋನಿ ಸಾಟ್‌ಪುಟೆ. 23 ವರ್ಷದ ಈ ಯುವತಿ ವಾಸಿಸುತ್ತಿರುವುದು ಪುಣೆಯಲ್ಲಿ. ಕೊರೊನಾ ವೈರಸ್‌ ಚಿಕಿತ್ಸೆ ಬಳಿಕ ಕೇರ್‌ಸೆಂಟರ್‌ನಿಂದ ವಾಪಸ್ ಬಂದ ಅಕ್ಕನನ್ನು ತಂಗಿ ಸಲೋನಿ ಹೀಗೆ ಡಾನ್ಸ್‌ ಮೂಲಕ ಸ್ವಾಗತಿಸಿದ್ದಾರೆ.

ನೆರೆ-ಹೊರೆಯವರಿಗೆ 'ಉರಿಸಲು' ಹೀಗೆ ಮಾಡಿದರೇ?

ಆದರೆ ಹೀಗೆ ಡಾನ್ಸ್‌ ಮಾಡುವುದರ ಹಿಂದೆ ಇನ್ನೊಂದು ಉದ್ದೇಶವೂ ಇದೆ. ಸಲೋನಿ ಮನೆಯ ಮೂವರಿಗೆ ಕೊರೊನಾ ಪಾಸಿಟಿವ್ ಆಗಿತ್ತು. ಆಗ ಅವರ ಮನೆಯ ನೆರೆಹೊರೆಯವರು ಅವರನ್ನು ಬಹಿಷ್ಕಾರ ಮಾಡಿದಂತೆ ವರ್ತಿಸಿದ್ದರು. ಇದರಿಂದ ಸಿಟ್ಟಾಗಿದ್ದ ಸಲೋನಿ, ನೆರೆಹೊರೆಯವರಿಗೆ 'ಉರಿಸಲು' ಹೀಗೆ ನರ್ತಿಸಿದ್ದಾರಂತೆ.

ಕುಟುಂಬದ ಎಲ್ಲರಿಗೂ ಕೊರೊನಾ ಆಗಿತ್ತು

ಸಲೋನಿ ಅವರ ತಂದೆಯವರಿಗೆ ಮೊದಲು ಪಾಸಿಟಿವ್ ಆಯಿತು. ನಂತರ ತಾಯಿ, ಅಕ್ಕನಿಗೂ ಪಾಸಿಟಿವ್ ಆಯಿತು. ಸಲೋನಿ ಒಬ್ಬರೇ ಮನೆಯಲ್ಲಿರಬೇಕಾಯಿತಂತೆ ಆಗ ನೆರೆಹೊರೆಯವರು ಸೊಲೊನಿ ಜೊತೆಗೆ ಸರಿಯಾಗಿ ವರ್ತಿಸಲಿಲ್ಲವಂತೆ.

ಜುಲೈ 17 ರಂದು ಚಿತ್ರೀಕರಿಸಿರುವ ವಿಡಿಯೋ

ಸಲೋನಿ ಅವರ ಅಕ್ಕ ಜುಲೈ 17 ರಂದು ಕೊವಿಡ್ ಸೆಂಟರ್‌ನಿಂದ ಗುಣಮುಖರಾಗಿ ಮನೆಗೆ ಮರಳಿದರಂತೆ. ಅದೇ ದಿನ ವಿಡಿಯೋ ಚಿತ್ರೀಕರಣವಾಗಿದ್ದು, ಎರಡೇ ದಿನದಲ್ಲಿ ಭಾರಿ ವೈರಲ್ ಆಗಿಬಿಟ್ಟಿದೆ. ಇದೀಗ ಮತ್ತೊಂದು ವಿಡಿಯೋವನ್ನು ಸಲೋನಿ ಮಾಡಿದ್ದಾರೆ.

'ಮನೆಯಲ್ಲಿ ಒಬ್ಬಳೇ ಇದ್ದು ಬಹಳ ನೋವು ಅನುಭವಿಸಿದೆ'

ಮತ್ತೊಂದು ವಿಡಿಯೋ ಮಾಡಿರುವ ಸಲೋನಿ, ನಾನು ಕುಣಿಯಬೇಕಾದರೆ ಮಾಸ್ಕ್ ಹಾಕಿರಲಿಲ್ಲ ಕ್ಷಮಿಸಿ. ಆದರೆ ಸತತವಾಗಿ ನಾನು ಒಬ್ಬಳೇ ಮನೆಯಲ್ಲಿದ್ದೆ, ನನ್ನ ಕುಟುಂಬವೆಲ್ಲಾ ಕೊರೊನಾಕ್ಕೆ ತುತ್ತಾಗಿ ಆಸ್ಪತ್ರೆಯಲ್ಲಿತ್ತು, ಮನೆಯವರೆಲ್ಲಾ ಒಮ್ಮೆ ಮನೆಗೆ ಬಂದರೆ ಸಾಕೆನಿಸಿತ್ತು, ನೆರೆಹೊರೆಯವರ ವರ್ತನೆಯೂ ನನಗೆ ಬೇಸರ ತರಿಸಿತ್ತು, ಹಾಗಾಗಿ ಅಕ್ಕ ಮನೆಗೆ ಬಂದ ಖುಷಿಯಲ್ಲಿ ನಾನು ಹಾಗೆ ಮಾಡಿದೆ ಎಂದು ಹೇಳಿದ್ದಾರೆ.