ಬಿಬಿಸಿ ವಾಹಿನಿಯಲ್ಲಿ ಬಾಲಿವುಡ್ ನ ಕರಾಳ ಮುಖ ಬಿಚ್ಚಿಡಲಿದ್ದಾರೆ ನಟಿಯರು.!

ರಾಧಿಕಾ ಆಪ್ಟೆ ಹೇಳಿರುವುದೇನು.?

''ಕೆಲವರನ್ನ ದೇವರಂತೆ ಆರಾಧಿಸುತ್ತಾರೆ. ಅವರು ಎಷ್ಟು ಪ್ರಭಾವಿ ಅಂದ್ರೆ, ನನ್ನ ಮಾತುಗಳು ಯಾರ ಮೇಲೂ ಪರಿಣಾಮ ಬೀರುವುದಿಲ್ಲ. ಒಂದು ವೇಳೆ ನಾನು ಅವರ ವಿರುದ್ಧ ಮಾತನಾಡಿದರೆ, ನನ್ನ ವೃತ್ತಿ ಜೀವನ ಹಳ್ಳ ಹಿಡಿಯುತ್ತೆ'' ಎಂದು ಬಿಬಿಸಿ ವಾಹಿನಿಗೆ ರಾಧಿಕಾ ಆಪ್ಟೆ ಹೇಳಿದ್ದಾರೆ.

ಉಷಾ ಜಾದವ್ ಏನಂದಿದ್ದಾರೆ.?

''ಸಿನಿಮಾಗಳಲ್ಲಿ ಅವಕಾಶ ಸಿಗಬೇಕು ಅಂದ್ರೆ, ಚಿತ್ರರಂಗದ ಪ್ರಭಾವಿ ವ್ಯಕ್ತಿಗಳ ಲೈಂಗಿಕ ತೃಷೆ ತೀರಿಸಬೇಕು. ನಿರ್ಮಾಪಕ ಅಥವಾ ನಿರ್ದೇಶಕ, ಕೆಲವೊಮ್ಮೆ ಇಬ್ಬರ ಜೊತೆಗೂ ಹಾಸಿಗೆ ಹಂಚಿಕೊಳ್ಳಲು ಹೇಳುತ್ತಾರೆ'' ಎಂದು ಬಿಬಿಸಿ ವಾಹಿನಿಗೆ ಹೇಳಿದ್ದಾರೆ ಮರಾಠಿ ನಟಿ ಉಷಾ ಜಾದವ್.

ಯುವ ನಟಿಯ ಮಾತು

ದೊಡ್ಡ ನಟಿ ಆಗಬೇಕು ಎಂದು ಬೆಟ್ಟದಷ್ಟು ಕನಸು ಹೊತ್ತು ಪುಟ್ಟ ಹಳ್ಳಿಯಿಂದ ಮುಂಬೈಗೆ ಬಂದಿರುವ 25 ವರ್ಷದ ಯುವ ನಟಿಯನ್ನೂ ಬಿಬಿಸಿ ವಾಹಿನಿ ಸಂದರ್ಶನ ಮಾಡಿದೆ. ''ಸಿನಿಮಾಗಳಲ್ಲಿ ಚಾನ್ಸ್ ಕೊಡಿಸುತ್ತೇನೆ ಎಂದು ಕಾಸ್ಟಿಂಗ್ ಏಜೆಂಟ್ ಸೇರಿದಂತೆ ಹಲವರು ನನ್ನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ'' ಎಂದು ಆ ಯುವತಿ ಬಿಬಿಸಿ ವಾಹಿನಿಯ ಸಂದರ್ಶನದಲ್ಲಿ ಬಾಯ್ಬಿಟ್ಟಿದ್ದಾರೆ.

ಅಸಭ್ಯವಾಗಿ ವರ್ತಿಸಿದರೂ ಸುಮ್ಮನಿರಬೇಕು

''ನನ್ನ ಜೊತೆ ಕಾಸ್ಟಿಂಗ್ ಏಜೆಂಟ್ ಅಸಭ್ಯವಾಗಿ ವರ್ತಿಸುತ್ತಿದ್ದರು. ನಾನು ಧಿಕ್ಕರಿಸಿದಾಗ, ಚಿತ್ರರಂಗದಲ್ಲಿ ಕೆಲಸ ಮಾಡಲು ನನಗೆ ಯೋಗ್ಯತೆ ಇಲ್ಲ ಎಂದಿದ್ದರು'' ಎಂದು 25 ವರ್ಷದ ಯುವ ನಟಿ ಹೇಳಿದ್ದಾರೆ. 'ಬಾಲಿವುಡ್ ಡಾರ್ಕ್ ಸೀಕ್ರೆಟ್' ಎಂಬ ಶೀರ್ಷಿಕೆ ಅಡಿ ಇದೇ ಶನಿವಾರ ಹಾಗೂ ಭಾನುವಾರ ಬಿಬಿಸಿ ವಾಹಿನಿಯಲ್ಲಿ ಡಾಕ್ಯುಮೆಂಟರಿ ಪ್ರಸಾರ ಆಗಲಿದೆ.