ಮಿತಿಮೀರಿದ ವರ್ತನೆ: ಬಿಗ್ ಬಾಸ್ ಮನೆಯಿಂದ ಹೊರಬಿದ್ದ ಸ್ಪರ್ಧಿ

ಬಿಗ್ ಬಾಸ್ ಮನೆಯಲ್ಲಿ ಗಲಾಟೆ, ಬೈಯುವುದು, ಕಿತ್ತಾಡುವುದು ಸಾಮಾನ್ಯ. ಹಿಂದಿ ಬಿಗ್ ಬಾಸ್ ಕಾರ್ಯಕ್ರಮದಲ್ಲಿ ಇದೆಲ್ಲವೂ ಸ್ವಲ್ಪ ಜೋರಾಗಿಯೇ ಇರುತ್ತೆ. ಕೈ ಕೈ ಮಿಲಾಯಿಸುವ ಹಂತಕ್ಕೂ ಈ ಶೋನಲ್ಲಿ ಘಟನೆಗಳು ಆಗಿವೆ.

ಇದೀಗ, ಇಂತಹದ್ದೆ ಮಿತಿಮೀರಿದ ವರ್ತನೆ ತೋರಿದ ಸಿದ್ಧಾರ್ಥ್ ಶುಕ್ಲಾ ಅವರನ್ನು ಬಿಗ್ ಬಾಸ್ ಆಯೋಜಕರು ಹೊರಗೆ ಕಳುಹಿಸಿದ್ದಾರೆ ಎನ್ನಲಾಗಿದೆ. ಈ ಕುರಿತು ಪ್ರೋಮೋವೊಂದು ಬಿಡುಗಡೆಯಾಗಿದ್ದು, ವೀಕ್ಷಕರಲ್ಲಿ ಕುತೂಹಲ ಮೂಡಿದೆ.

ಟಾಸ್ಕ್ ಮಾಡುವ ವೇಳೆ ಇತರೆ ಸ್ಪರ್ಧಿಗಳ ಜೊತೆ ವರ್ತಿಸಿದ ರೀತಿ ಸರಿಯಿಲ್ಲ, ಇದರಿಂದ ಮನೆಯವರಿಗೆ ನೋವು ಉಂಟಾಗಿದೆ ಎಂಬ ಕಾರಣ ನೀಡಿ ಬಿಗ್ ಬಾಸ್ ಸಿದ್ಧಾರ್ಥ್ ಶುಕ್ಲಾ ಅವರನ್ನ ಈ ಕೂಡಲೇ ಮನೆಯಿಂದ ಹೊರಹೋಗಿ ಎಂದು ಪ್ರಕಟಿಸಿದೆ.

ಈ ಘಟನೆ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲ. ಪ್ರೋಮೋ ಅಷ್ಟೆ ಪ್ರಸಾರವಾಗಿದ್ದು, ಇದರಿಂದ ಸಿದ್ಧಾರ್ಥ್ ಶುಕ್ಲಾ ಅಭಿಮಾನಿಗಳು ಶಾಕ್ ಗೆ ಒಳಗಾಗಿದ್ದಾರೆ.

ಇದು ಬಿಗ್ ಬಾಸ್ ಮಾಡಿರುವ ಪ್ಲಾನ್ ಇರಬಹುದು. ಸಿದ್ಧಾರ್ಥ್ ಶುಕ್ಲಾ ಅವರನ್ನ ಸೀಕ್ರೆಟ್ ರೂಂಮಿಗೆ ಕಳುಹಿಸಿರಬಹುದು ಎಂದು ಕೂಡ ಊಹಿಸುತ್ತಿದ್ದಾರೆ. ಈ ಆವೃತ್ತಿಯಲ್ಲಿ ಸಿದ್ಧಾರ್ಥ್ ಶುಕ್ಲಾ ಅವರು ತಮ್ಮ ಸ್ವಭಾವದಿಂದ ಹೆಚ್ಚು ಸುದ್ದಿಯಾಗಿದ್ದು, ಬಿಗ್ ಬಾಸ್ ಮನೆಯಲ್ಲಿರುವ ಸ್ಪರ್ಧಿಗಳಿಗೆ ಸಿಕ್ಕಾಪಟ್ಟೆ ಕಿರಿಕಿರಿ ಉಂಟು ಮಾಡಿದ್ದಾರೆ.