ರಿಷಬ್ ಶೆಟ್ಟಿಗೂ ಮುನ್ನ ಛತ್ರಪತಿ ಶಿವಾಜಿಯಾಗಿ ರಿತೀಶ್ ಅಬ್ಬರ; ಮೋಷನ್ ಪೋಸ್ಟರ್ ಔಟ್

ಚಿತ್ರರಂಗದಲ್ಲಿ ಬಯೋಪಿಕ್ ಹಾಗೂ ಐತಿಹಾಸಿಕ ಸಿನಿಮಾಗಳ ಅಲೆ ಜೋರಾಗಿದೆ. ಶಿವಾಜಿ ಮಹಾರಾಜರ ಕುರಿತು ಈಗಾಗಲೇ ಸಾಕಷ್ಟು ಸಿನಿಮಾ, ನಾಟಕ, ಧಾರಾವಾಹಿ ಬಂದಿದ್ದೆ. ಇದೀಗ ಮರಾಠಿಯಲ್ಲಿ ಅದ್ಧೂರಿ ಸಿನಿಮಾ ನಿರ್ಮಾಣವಾಗ್ತಿದೆ.

ನಟ ದೇಶಮುಖ್ ಈ ಸಿನಿಮಾದ ಮೂಲಕ ಹೊಸ ಸಾಹಸಕ್ಕೆ ಕೈ ಹಾಕಿದ್ದಾರೆ. ಈ ಸಿನಿಮಾ ಕೇವಲ ಮನರಂಜನೆ ಮಾತ್ರವಲ್ಲದೆ, ಒಂದು ಭಾವನಾತ್ಮಕ ಪಯಣವೂ ಆಗಿದೆ. ಹಾಗಾದರೆ ಈ ಚಿತ್ರದ ವಿಶೇಷತೆ ಏನು ಅನ್ನೋದನ್ನ ನೋಡೋಣ ಬನ್ನಿ. ಇತ್ತೀಚೆಗಷ್ಟೇ ನಟ ರಿತೇಶ್ ದೇಶಮುಖ್ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ. ಈ ಸಂಭ್ರಮದ ಬೆನ್ನಲ್ಲೇ ಅವರ ಕನಸಿನ ಪ್ರಾಜೆಕ್ಟ್ 'ರಾಜಾ ಶಿವಾಜಿ' ಬಗ್ಗೆ ದೊಡ್ಡ ಅಪ್ಡೇಟ್ ಹೊರಬಿದ್ದಿದೆ. ಈ ಸಿನಿಮಾಗಾಗಿ ರಿತೇಶ್ ಬಹಳ ಶ್ರಮಿಸುತ್ತಿದ್ದಾರೆ.

ಹುಟ್ಟುಹಬ್ಬದ ಅಂಗವಾಗಿ ಚಿತ್ರತಂಡವು ವಿಶೇಷ ಪೋಸ್ಟರ್ ಅಥವಾ ಮಾಹಿತಿಯನ್ನು ಹಂಚಿಕೊಂಡಿದ್ದು, ಅಭಿಮಾನಿಗಳಲ್ಲಿ ಹಬ್ಬದ ವಾತಾವರಣ ನಿರ್ಮಾಣ ಮಾಡಿದೆ. ಸಿನಿಮಾ ಪ್ರೇಕ್ಷಕರಿಗೆ ಇದಕ್ಕಿಂತ ದೊಡ್ಡ ಬರ್ತ್ಡೇ ಗಿಫ್ಟ್ ಮತ್ತೊಂದಿಲ್ಲ ಎಂದು ಫ್ಯಾನ್ಸ್ ಸೋಶಿಯಲ್ ಮೀಡಿಯಾದಲ್ಲಿ ಕಮೆಂಟ್ ಮಾಡುತ್ತಿದ್ದಾರೆ.

ಎಲ್ಲರೂ ಕಾತರದಿಂದ ಕಾಯುತ್ತಿದ್ದ ಆ ಒಂದು ಪ್ರಶ್ನೆಗೆ ಈಗ ಉತ್ತರ ಸಿಕ್ಕಿದೆ. 'ರಾಜಾ ಶಿವಾಜಿ' ಸಿನಿಮಾ ಯಾವಾಗ ರಿಲೀಸ್ ಆಗಲಿದೆ ಎಂಬ ಕುತೂಹಲಕ್ಕೆ ತೆರೆ ಬಿದ್ದಿದೆ. ಈ ಬಹುಕೋಟಿ ವೆಚ್ಚದ ಸಿನಿಮಾ 2026ರ ಮೇ 1ರಂದು ಅದ್ಧೂರಿಯಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ವಿಶೇಷವೆಂದರೆ ಮೇ 1 'ಮಹಾರಾಷ್ಟ್ರ ದಿನ' ಆಗಿರುವುದರಿಂದ ಅದೇ ದಿನ ಚಿತ್ರವನ್ನು ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದೆ. ಈ ಮೂಲಕ ಶಿವಾಜಿ ಮಹಾರಾಜರಿಗೆ ದೊಡ್ಡ ಮಟ್ಟದ ಗೌರವ ಸಲ್ಲಿಸಲು ರಿತೇಶ್ ದೇಶಮುಖ್ ತಂಡ ಸಜ್ಜಾಗಿದೆ.

ರಿತೇಶ್ ಕನಸಿನ ಪ್ರಾಜೆಕ್ಟ್

ನಟ ರಿತೇಶ್ ಮೊದಲಿನಿಂದಲೂ ಸವಾಲಿನ ಪಾತ್ರಗಳಿಗೆ ಹೆಸರುವಾಸಿ. ಈಗ ಅವರು 'ರಾಜಾ ಶಿವಾಜಿ' ಚಿತ್ರದ ಮೂಲಕ ನಟನೆ ಮತ್ತು ನಿರ್ದೇಶನ ಎರಡರಲ್ಲೂ ಸಕ್ರಿಯರಾಗಿದ್ದಾರೆ. ಇದು ಅವರ ವೃತ್ತಿಜೀವನದ ಅತ್ಯಂತ ದೊಡ್ಡ ಸಿನಿಮಾ ಎನ್ನಲಾಗುತ್ತಿದೆ. ಛತ್ರಪತಿ ಶಿವಾಜಿ ಮಹಾರಾಜರ ವೀರಗಾಥೆಯನ್ನು ಜಗತ್ತಿಗೆ ಸಾರುವ ಉದ್ದೇಶ ಇವರದ್ದು. ಈ ಸಿನಿಮಾದ ಪೋಸ್ಟರ್ ನೋಡಿದ ಅಭಿಮಾನಿಗಳು ಈಗಾಗಲೇ ಫಿದಾ ಆಗಿದ್ದಾರೆ. ಶಿವಾಜಿ ಮಹಾರಾಜರ ಪಾತ್ರದಲ್ಲಿ ರಿತೇಶ್ ಅವರ ಲುಕ್ ಅದ್ಭುತವಾಗಿ ಮೂಡಿಬಂದಿದೆ.

ಅದ್ಧೂರಿ ದೃಶ್ಯವೈಭವ

100 ದಿನಗಳ ಕಾಲ ಚಿತ್ರೀಕರಣ ನಡೆಸಿ ಮುಗಿಸಿದ್ದಾರೆ ರಿತೇಶ್. ಶಿವಾಜಿ ಮಹಾರಾಜರ ಜನ್ಮಸ್ಥಳದಲ್ಲಿ ಪೂಜೆ ಸಲ್ಲಿಸುವ ಮೂಲಕ ಚಿತ್ರಕ್ಕೆ ಚಾಲನೆ ನೀಡಲಾಗಿತ್ತು. ಇದು ಕೇವಲ ಸಿನಿಮಾ ಅಲ್ಲ, ಒಬ್ಬ ಮಹಾನ್ ಯೋಧನಿಗೆ ಸಲ್ಲಿಸುತ್ತಿರುವ ಗೌರವ ಎಂದು ರಿತೇಶ್ ಹೇಳಿಕೊಂಡಿದ್ದಾರೆ. ಚಿತ್ರದಲ್ಲಿ ತಾಂತ್ರಿಕ ತಂಡ ಕೂಡ ಅಷ್ಟೇ ಬಲಿಷ್ಠವಾಗಿದೆ. ದೃಶ್ಯಗಳು ಕಣ್ಣಿಗೆ ಹಬ್ಬದಂತೆ ಇರಲಿವೆ ಎಂದು ಚಿತ್ರತಂಡ ಭರವಸೆ ನೀಡಿದೆ. ಇತಿಹಾಸದ ಸಣ್ಣ ಸಣ್ಣ ವಿಷಯಗಳನ್ನು ಕೂಡ ಇಲ್ಲಿ ಬಹಳ ಜಾಗರೂಕತೆಯಿಂದ ಚಿತ್ರೀಕರಿಸಲಾಗುತ್ತಿದೆ.

ಗ್ರ್ಯಾಂಡ್ ರಿಲೀಸ್

'ರಾಜಾ ಶಿವಾಜಿ' ಸಿನಿಮಾವು ಮರಾಠಿ ಮತ್ತು ಹಿಂದಿ ಸೇರಿ ಹಲವು ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಇದರಿಂದ ಇಡೀ ದೇಶದ ಜನರು ಶಿವಾಜಿ ಮಹಾರಾಜರ ಸಾಹಸಗಳನ್ನು ತಿಳಿದುಕೊಳ್ಳಲು ಸಾಧ್ಯವಾಗುತ್ತದೆ. ರಾಷ್ಟ್ರ ಮಟ್ಟದಲ್ಲಿ ಈ ಸಿನಿಮಾ ದೊಡ್ಡ ಸದ್ದು ಮಾಡುವುದು ಗ್ಯಾರಂಟಿ. ರಿತೇಶ್ ದೇಶಮುಖ್ ಈ ಚಿತ್ರಕ್ಕಾಗಿ ತುಂಬಾ ಶ್ರಮ ವಹಿಸಿದ್ದಾರೆ. ಯುದ್ಧದ ದೃಶ್ಯಗಳು ಹಾಗೂ ಹಳೆಯ ಕಾಲದ ವೈಭವವನ್ನು ಮರುಸೃಷ್ಟಿಸಲು ದೊಡ್ಡ ಮಟ್ಟದ ಸೆಟ್‌ಗಳನ್ನು ಹಾಕಲಾಗಿದೆ. ಸಿನಿಮಾದ ಸಂಗೀತ ಕೂಡ ಎಲ್ಲರ ಗಮನ ಸೆಳೆಯಲಿದೆ. ಸೋಷಿಯಲ್ ಮೀಡಿಯಾದಲ್ಲಿ ಈಗಾಗಲೇ 'ರಾಜಾ ಶಿವಾಜಿ' ಹ್ಯಾಶ್‌ಟ್ಯಾಗ್ ಟ್ರೆಂಡ್ ಆಗುತ್ತಿದೆ. ರಿತೇಶ್ ಅಭಿಮಾನಿಗಳು ಚಿತ್ರದ ಬಿಡುಗಡೆಗಾಗಿ ಕಾತರದಿಂದ ಕಾಯುತ್ತಿದ್ದಾರೆ. ಐತಿಹಾಸಿಕ ಸಿನಿಮಾಗಳ ಸಾಲಿನಲ್ಲಿ ಇದು ಹೊಸ ದಾಖಲೆ ಬರೆಯುವ ಮುನ್ಸೂಚನೆ ನೀಡಿದೆ.

ಅದ್ಧೂರಿ ತಾರಾಗಣ

ಈ ಸಿನಿಮಾ ರಿತೇಶ್ ಜೀವನದ ಮಹತ್ವದ ತಿರುವು ನೀಡಲಿದೆ. ಶಿವಾಜಿ ಮಹಾರಾಜರ ಜೀವನದ ಅಪರಿಚಿತ ಸಂಗತಿಗಳನ್ನು ಕೂಡ ಈ ಸಿನಿಮಾದಲ್ಲಿ ತೋರಿಸುವ ಪ್ರಯತ್ನ ಮಾಡಲಾಗಿದೆ. ರಿತೇಶ್ ಪತ್ನಿ ಜೆನಿಲಿಯಾ ಕೂಡ ನಿರ್ಮಾಪಕರಲ್ಲಿ ಒಬ್ಬರಾಗಿದ್ದಾರೆ. ಇನ್ನುಳಿದಂತೆ ಸಂಜಯ್ ದತ್, ಮಹೇಶ್ ಮಂಜ್ರೇಕರ್, ಅಭಿಷೇಕ್ ಬಚ್ಚನ್, ಭಾಗ್ಯಶ್ರೀ ಚಿತ್ರದ ತಾರಾಗಣದಲ್ಲಿದ್ದಾರೆ. ರಿಷಬ್ ಶೆಟ್ಟಿ ಹೀರೊ ಆಗಿ ಶಿವಾಜಿ ಬಯೋಪಿಕ್ ಘೋಷಣೆಯಾಗಿದೆ. ಅದಕ್ಕೂ ಮುನ್ನ ಈ ಸಿನಿಮಾ ತೆರೆಗೆ ಬರಲಿದೆ.