ಬಾರಿನಲ್ಲಿ ಗ್ಲಾಸ್‌ನಿಂದ ತಲೆಗೆ ಹೊಡೆದಿದ್ದರು: ಸೈಫ್ ಅಲಿ ಖಾನ್ ಹಳೆ ನೆನಪು

ನನ್ನ ಪ್ರೇಯಸಿ ಜೊತೆ ಡಾನ್ಸ್ ಮಾಡು ಎಂದು ದುಂಬಾಲು

ಟಾಕ್‌ ಶೋ ಗಾಗಿ ಚಿತ್ರೀಕರಣದಲ್ಲಿ ನಿರತರಾಗಿದ್ದಾಗ ವ್ಯಕ್ತಿಯೊಬ್ಬ ಸೈಫ್ ಬಳಿ ಬಂದು, 'ನನ್ನ ಪ್ರೇಯಸಿ ಜೊತೆ ಡಾನ್ಸ್ ಮಾಡು' ಎಂದು ತಾಕೀತು ಮಾಡಿದನಂತೆ. ಆದರೆ ಇದನ್ನು ಸೌಮ್ಯದಿಂದಲೇ ನಿರಾಕರಿಸಿದರಂತೆ. ಇಂಥಹಾ ಘಟನೆಗಳನ್ನು ಹಲವು ಎದುರಿಸಿದ್ದೇನೆ. ಹಾಗಾಗಿ ಆ ಕ್ಷಣದಲ್ಲಿ ನನಗೆ ಹೆಚ್ಚಿಗೇನು ಅನಿಸಲಿಲ್ಲ ಎಂದು ಅಂದಿನ ದಿನವನ್ನು ನೆನಪಿಸಿಕೊಂಡಿದ್ದಾರೆ ಸೈಫ್.

ವಿಸ್ಕಿ ಗ್ಲಾಸ್‌ನಿಂದ ಸೈಫ್ ತಲೆಗೆ ಹೊಡೆದ ವ್ಯಕ್ತಿ

ನಂತರ ಅದೇ ವ್ಯಕ್ತಿ, 'ನಿನ್ನ ಮುಖ ಬಹಳ ಸುಂದರವಾಗಿದೆ. ಕೋಟಿ ಬೆಲೆ ಬಾಳುವ ಮುಖ ನಿನ್ನದು' ಎಂದನಂತೆ. ಸೈಫ್ ನಗುತ್ತಾ ಥ್ಯಾಂಕ್ಸ್ ಎಂದರಂತೆ, ಇದಕ್ಕೆ ಆ ವ್ಯಕ್ತಿ, 'ಆದರೆ ಈ ನಿನ್ನ ಮುಖವನ್ನು ಚಚ್ಚಿ ಹಾಕುತ್ತೇನೆ' ಎನ್ನುತ್ತಲೇ ಕೈಯಲ್ಲಿದ್ದ ವಿಸ್ಕಿ ಗ್ಲಾಸನ್ನು ಸೈಫ್ ತಲೆಗೆ ಒಡೆದನಂತೆ.

ತಲೆ, ಮುಖದ ಮೇಲೆ ಗಾಯಗಳಾದವಂತೆ

ಅಚಾನಕ್ ದಾಳಿಯಿಂದ ಅವಾಕ್ಕಾದ ಸೈಫ್, ಕೂಡಲೇ ಸಾವರಿಸಿಕೊಂಡು ಆತನ ಮೇಲೆ ಜಗಳಕ್ಕೆ ಹೋದರಂತೆ. ನಂತರ ಅಲ್ಲಿದ್ದವರು ಜಗಳ ಬಿಡಿಸಿದರಂತೆ. ಸೈಫ್ ತಲೆಯಿಂದ ಸಾಕಷ್ಟು ರಕ್ತ ಸುರಿಯುತ್ತಿತ್ತಂತೆ. ಅದನ್ನು ಒರಿಸಿಕೊಳ್ಳಲು ಬಾತ್‌ರೂಂ ಗೆ ಹೋದರಂತೆ ಸೈಫ್.

ಬಾತ್‌ರೂಂ ನಲ್ಲೂ ಹಲ್ಲೆಗೆ ಯತ್ನಿಸಿದನಂತೆ

ಅಲ್ಲಿಗೂ ಬಂದ ಆ ವ್ಯಕ್ತಿಯನ್ನುದ್ದೇಶಿಸಿ, 'ನೋಡು ಎಂಥಹಾ ಕೆಲಸ ಮಾಡಿದ್ದೀಯ? ಎಂದು ಬೈದರಂತೆ ಸೈಫ್. ಆ ವ್ಯಕ್ತಿ ಅಲ್ಲಿಯೂ ಸೈಫ್ ಮೇಲೆ ಜಗಳಕ್ಕೆ ಮುಂದಾಗಿದ್ದಾನೆ. ನೆಲ ಒರೆಸುವ ಕಡ್ಡಿಯಿಂದ ಸೈಫ್ ಮೇಲೆ ಹಲ್ಲೆಗೆ ಯತ್ನಿಸಿದನಂತೆ. ಹೇಗೋ ಪಾರಾಗಿ ಹೊರಬಿದ್ದರಂತೆ ಸೈಫ್. ಆ ವ್ಯಕ್ತಿ ಹುಚ್ಚನಾಗಿಬಿಟ್ಟಿದ್ದ ಅಂದು ನನ್ನನ್ನು ಕೊಂದೇ ಬಿಡುತ್ತಿದ್ದನೋ ಏನೋ ಎಂದಿದ್ದಾರೆ ಸೈಫ್.