''ನನ್ನ ತಂದೆ ಒಬ್ಬ ಸಕ್ಸಸ್ ಫುಲ್ ಫೆಲ್ಯೂರ್''- ಶಾರೂಖ್ ಖಾನ್ ಹೃದಯಸ್ಪರ್ಶಿ ಮಾತುಗಳು

ನನ್ನ ತಂದೆ ಒಬ್ಬ 'ಸಕ್ಸಸ್ ಫುಲ್ ಫೆಲ್ಯೂರ್'

ತಮ್ಮ ತಂದೆಯನ್ನು ತಮ್ಮ ಸಕ್ಸಸ್ ಫುಲ್ ಫೆಲ್ಯೂರ್ ಎಂದು ಶಾರೂಖ್ ಖಾನ್ ಹೇಳುತ್ತಾರೆ. ಕಾರಣ ಅವರ ತಂದೆ ಜೀವನದಲ್ಲಿ ಏನನ್ನು ಮಾಡಲಿಲ್ಲವಂತೆ. ಸತ್ಯವಾಗಿ ಇದ್ದದ್ದೇ ಅವರ ಯಶಸ್ಸಿಗೆ ಅಡ್ಡ ಆಯಿತಂತೆ. ಕೆಲಸ ಇಲ್ಲದೆ ಮಕ್ಕಳ ಜೊತೆಗೆ ಹೆಚ್ಚು ಸಮಯ ಕಳೆಯುತ್ತಿದ್ದರಂತೆ. ಸ್ವಾತಂತ್ರ್ಯ ಹೋರಾಟದಲ್ಲಿ ಭಾಗಿಯಾಗಿದ್ದು, ಮಾತ್ರ ತಂದೆಯ ಬಗ್ಗೆ ಶಾರೂಖ್ ಗೆ ಖುಷಿ ನೀಡುವ ವಿಷಯ.

ತಂದೆ, ತಾಯಿ ಇಬ್ಬರ ನಿಧನ

ಶಾರೂಖ್ ಆಗ 15 ವರ್ಷದ ಹುಡುಗ. ಮನೆಗೆ ಬರುವ ತಂದೆ ತನಗೆ ಕ್ಯಾನ್ಸರ್ ಇದೆ ಎಂದು ಹೇಳುತ್ತಾರೆ. ಶಾರೂಖ್ ಹಾಗೂ ಅವರ ತಾಯಿ ಇಬ್ಬರಿಗೂ ಆ ಕಾಲದಲ್ಲಿ ಕ್ಯಾನ್ಸರ್ ಖಾಯಿಲೆ ಬಗ್ಗೆ ಅಷ್ಟೊಂದು ತಿಳಿದಿರಲಿಲ್ಲ. ಅದು ವಾಸಿಯಾಗಿಬಿಡುವ ಖಾಯಿಲೆ ಎಂದು ಭಾವಿಸಿದ್ದರು. ಆದರೆ, ಕ್ಯಾನ್ಸರ್ ಆದ ಮೂರು ತಿಂಗಳಿಗೆ ತಂದೆ ತೀರಿಹೋದರು. ನಂತರ ಕೆಲವೇ ವರ್ಷಗಳಲ್ಲಿ ತಾಯಿ ಕೂಡ ಕೊನೆಯುಸಿರೆಳೆದರು.

ಸಾವಿನ ಬಗ್ಗೆ ತಮ್ಮದೇ ವ್ಯಾಖ್ಯಾನ

ತಂದೆ ನಿಧನರಾದ ನಂತರ ಸಾವಿನ ಬಗ್ಗೆ ಶಾರೂಖ್ ಖಾನ್ ತಮ್ಮದೆ ರೀತಿಯಾದ ಅರ್ಥವನ್ನು ಕಂಡುಕೊಂಡಿದ್ದರು. ಯಾರಿಗೆ ಭೂಮಿಯ ಮೇಲೆ ಕೆಲಸ ಮುಗಿಯುತ್ತದೆ, ಯಾರು ಜೀವನದಲ್ಲಿ ತೃಪ್ತಿಯಾಗಿ ಇರುತ್ತದೆ ಅವರಿಗೆ ಮಾತ್ರ ಸಾವು ಬರುತ್ತದೆ ಎಂದುಕೊಂಡಿದ್ದರು. ಹೀಗಾಗಿ ತಾಯಿ ನೆಮ್ಮದಿಯಾಗಿ ಇದ್ದರೆ, ಆಕೆಯೂ ಸಾಯುತ್ತಾಳೆ ಎಂದು ತೊಂದರೆ ನೀಡಲು ಶುರು ಮಾಡಿದರು.

ತಾಯಿಗೆ ನೆಮ್ಮದಿ ಇರಬಾರದು

ಆಗಿನ್ನು ಶಾರೂಖ್ ಗೆ ಸಾವು ಎಂದರೇನು ಎಂದು ಸರಿಯಾಗಿ ತಿಳಿಯದ ವಯಸ್ಸು. ತಮ್ಮ ತಾಯಿ ಸಾಯಬಾರದು ಎಂಬ ಕಾರಣಕ್ಕೆ ಅವರಿಗೆ ತೊಂದರೆ ಆಗುವಂತೆ ನಡೆದುಕೊಂಡರು. ಅಕ್ಕನಿಗೆ ಕಾಟ ನೀಡುತ್ತಿದ್ದರು. ಕೆಲಸ ಬಿಟ್ಟರು, ಕುಡಿಯುವುದನ್ನು ಕಲಿತರು. ಈ ರೀತಿ ತಮ್ಮ ತಾಯಿಗೆ ನೆಮ್ಮದಿ ಇಲ್ಲದಂತೆ ಮಾಡಿದರು. ಜೀವನದಲ್ಲಿ ಸಮಾಧಾನ, ನೆಮ್ಮದಿ ಇದ್ದರೆ, ಆ ವ್ಯಕ್ತಿಗಳಿಗೆ ಸಾವು ಬರುತ್ತದೆ ಎನ್ನುವುದು ಅವರ ನಂಬಿಕೆ ಆಗಿತ್ತು.

ಯಶಸ್ಸನ್ನು ಅಪ್ಪ, ಅಮ್ಮ ಇಬ್ಬರು ನೋಡಲಿಲ್ಲ

ತಾಯಿ ಸಾವಿನ ಸಮಯದಲ್ಲಿ ಶಾರೂಖ್ ಖಾನ್ ಮುಂಬೈನಲ್ಲಿ ಟಿವಿ ಸೀರಿಯಲ್ ವೊಂದರಲ್ಲಿ ನಟಿಸಲು ಶುರು ಮಾಡಿದರು. ಮುಂದೆ ''ದಿವಾನ' ಸಿನಿಮಾದ ಮೂಲಕ ಚಿತ್ರರಂಗ ಪ್ರವೇಶ ಮಾಡಿದರು. ಸಿನಿಮಾಗಳ ಮೇಲೆ ಸಿನಿಮಾ ಮಾಡಿ, ಸೋಲು, ಗೆಲುವು ಎಲ್ಲವನ್ನು ಕಂಡು, ಇಂದು ದೊಡ್ಡ ಸ್ಟಾರ್ ಆಗಿದ್ದಾರೆ. ಆದರೆ, ಈ ಯಶಸ್ಸು ನೋಡಲು ಅವರ ಅಪ್ಪ, ಅಮ್ಮ ಇಬ್ಬರು ಇಲ್ಲ.