3 ಮೊಟ್ಟೆಗೆ 1672 ರೂ! ಹೋಟೆಲ್ ಕೊಟ್ಟ ಬಿಲ್ ನೋಡಿ ಸಂಗೀತ ನಿರ್ದೇಶಕ ಶಾಕ್.!

ಬೇಸರ ಹೊರ ಹಾಕಿರುವ ಶೇಖರ್ ರವ್ಜಿಯಾನಿ

ನಿನ್ನೆ (ನವೆಂಬರ್ 14) ಸಂಜೆ ಅಹಮದಾಬಾದ್ ನ ಉಸ್ಮಾನ್ ಪುರದಲ್ಲಿರುವ ಸ್ಟಾರ್ ಹೋಟೆಲ್ ಒಂದಕ್ಕೆ ಸಂಗೀತ ನಿರ್ದೇಶಕ ಶೇಖರ್ ರವ್ಜಿಯಾನಿ ಹೋಗಿದ್ದರು. ಅಲ್ಲಿ ಮೂರು ಬಾಯಿಲ್ಡ್ ಎಗ್ ನ ಬೆಲೆ 1350 ರೂಪಾಯಿ. ಜಿ.ಎಸ್.ಟಿ ಮತ್ತು ಸರ್ವೀಸ್ ಚಾರ್ಜ್ ಸೇರಿ ಬಿಲ್ ಮೊತ್ತ 1672 ರೂಪಾಯಿ ಆಗಿದೆ. ಇಷ್ಟೊಂದು ದುಬಾರಿ ಬೆಲೆಯ ಮೊಟ್ಟೆ ತಿಂದು ಶೇಖರ್ ರವ್ಜಿಯಾನಿ ಟ್ವಿಟ್ಟರ್ ನಲ್ಲಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಟ್ವಿಟ್ಟರ್ ನಲ್ಲಿ ಮಿಶ್ರ ಪ್ರತಿಕ್ರಿಯೆ

ಸ್ಟಾರ್ ಹೋಟೆಲ್ ನಲ್ಲಿ ಬಾಯಿಲ್ಡ್ ಎಗ್ ತಿನ್ನುವ ಜರೂರತ್ತು ಏನಿತ್ತು.? ಬೀದಿ ಬದಿಯಲ್ಲಿ 15 ರೂಪಾಯಿ ಕೊಟ್ಟಿದ್ದರೆ, ಬಾಯಿಲ್ಡ್ ಎಗ್ ಜೊತೆಗೆ ಈರುಳ್ಳಿ, ಮೆಣಸು, ದನಿಯಾ, ಪುದೀನಾ ಚಟ್ನಿ ಕೂಡ ಕೊಟ್ಟಿರೋರು ಅಂತ ಒಬ್ಬರು ಕಾಮೆಂಟ್ ಮಾಡಿದರೆ, ಮೆನ್ಯೂ ಕಾರ್ಡ್ ನೋಡಿ ಆರ್ಡರ್ ಮಾಡಬೇಕಿತ್ತು ಅಂತ ಮತ್ತೊಬ್ಬರು ಪ್ರತಿಕ್ರಿಯೆ ನೀಡಿದ್ದಾರೆ.

ಟ್ವಿಟ್ಟರ್ ನಲ್ಲಿ ಅತ್ತರೆ ಪ್ರಯೋಜನ ಇಲ್ಲ.!

ಆರ್ಡರ್ ಮಾಡುವ ಮುನ್ನ ಬೆಲೆ ನೋಡಬೇಕಿತ್ತು. ದುಬಾರಿ ಬೆಲೆ ಕೊಟ್ಟ ಮೇಲೆ ಟ್ವಿಟ್ಟರ್ ನಲ್ಲಿ ಅತ್ತರೆ ಪ್ರಯೋಜನ ಇಲ್ಲ. ಸ್ಟಾರ್ ಹೋಟೆಲ್ ಅಂದ್ಮೇಲೆ ಬೆಲೆ ಜಾಸ್ತಿ ಇದ್ದೇ ಇರುತ್ತೆ. ಹೀಗಿರುವಾಗ, ಸ್ಟಾರ್ ಹೋಟೆಲ್ ಗೆ ಹೋಗುವುದು ಯಾಕೆ.? ಮಾಮೂಲಿ ಹೋಟೆಲ್ ನಲ್ಲಿ ತಿನ್ನಿ ಅಂತ ನೆಟ್ಟಿಗರು ಪ್ರತಿಕ್ರಿಯೆ ಕೊಡುತ್ತಿದ್ದಾರೆ.

ರಾಹುಲ್ ಬೋಸ್ ಕಾಲೆಳೆದಿದ್ದ ಜನ.!

ಸ್ಟಾರ್ ಹೋಟೆಲ್ ನಲ್ಲಿ ಎರಡು ಬಾಳೆಹಣ್ಣು ತಿಂದು 442 ರೂಪಾಯಿ ಕೊಟ್ಟಿದ್ದ ಬಾಲಿವುಡ್ ನಟ ರಾಹುಲ್ ಬೋಸ್ ಗೂ ನೆಟ್ಟಿಗರು ಕಾಲೆಳೆದಿದ್ದರು. ಆದ್ರೆ, ಎರಡು ಬಾಳೆಹಣ್ಣಿಗೆ ಅಷ್ಟೊಂದು ಬಿಲ್ ಮಾಡಿದ್ದ ಆ ಹೋಟೆಲ್ ಮೇಲೆ ಅಬಕಾರಿ ಮತ್ತು ತೆರಿಗೆ ಇಲಾಖೆ ದಾಳಿ ಮಾಡಿ ತನಿಖೆ ನಡೆಸಿತ್ತು.