ಮನೀಶ್ ಮಲ್ಹೋತ್ರಾ ವಿನ್ಯಾಸದ ವಸ್ತ್ರದಲ್ಲಿ ಮಿಂಚಲಿದ್ದಾರೆ ಸಿದ್ಧಾರ್ಥ್, ಕಿಯಾರಾ

ಹೇಗಿರಲಿದೆ ಸಿದ್ಧಾರ್ಥ್-ಕಿಯಾರಾ ವೆಡ್ಡಿಂಗ್ ಡ್ರೆಸ್?

ವಿವಾಹ ಸಮಾರಂಭದಲ್ಲಿ ಸಿದ್ಧಾರ್ಥ್ ಮಲ್ಹೋತ್ರಾ ಬಿಳಿಬಣ್ಣದ ಆಫ್ ಶೇರ್ವಾನಿ ಹಾಗೂ ಕಿಯಾರಾ ಅಡ್ವಾಣಿ ಕೆಂಪು ಬಣ್ಣದ ಲೆಹಂಗಾವನ್ನು ಧರಿಸಲಿದ್ದಾರೆ. ಮನೀಶ್ ಮಲ್ಹೋತ್ರ ವಧು, ವರ ಹಾಗೂ ಅವರ ಕುಟುಂಬದವರಿಗಾಗಿ 150 ವಸ್ತ್ರಗಳನ್ನು ವಿನ್ಯಾಸಗೊಳಿಸಿದ್ದಾರೆ ಎನ್ನಲಾಗಿದೆ. ಮನೀಶ್ ಮಲ್ಹೋತ್ರಾ ತಂಡವು ಮೆಹಂದಿ, ಹಳದಿ ಶಾಸ್ತ್ರದ ಸೇರಿದಂತೆ ವಿವಾಹಪೂರ್ವ ಕಾರ್ಯಕ್ರಮಗಳ ವಸ್ತ್ರಗಳನ್ನು ಸಹ ಸಿದ್ಧಗೊಳಿಸಿದೆ. ಎರಡೂ ಕುಟುಂಬದವರ ವಸ್ತ್ರಗಳನ್ನು ಇವರೇ ವಿನ್ಯಾಸ ಮಾಡಿದ್ದಾರೆ.ಮೂಲಗಳ ಪ್ರಕಾರ, ಮದುವೆ ದಿನದಂದು ಕಿಯಾರಾ ಅವರನ್ನು ಬಾಲಿವುಡ್ ಖ್ಯಾತ ಸ್ಟೈಲಿಸ್ಟ್ ಲಕ್ಷ್ಮಿ ಲೆಹರ್ ರೆಡಿ ಮಾಡಲಿದ್ದಾರೆ. ಮದುವೆ ಬಳಿಕವಷ್ಟೇ ಇವರಿಬ್ಬರ ಫೈನಲ್ ಔಟ್ ಫಿಟ್ ಬಹಿರಂಗವಾಗಲಿದೆ.

ಪ್ಯಾಲೇಸ್‌ನಲ್ಲಿ ಮೊಬೈಲ್ ಬಳಕೆ ನಿಷೇಧ

65 ಎಕರೆ ವಿಸ್ತೀರ್ಣದ ಪ್ಯಾಲೇಸ್‌ನಲ್ಲಿ ಬಹಳ ಆಡಂಬರದಿಂದ ಸಿದ್ಧಾರ್ಥ್-ಕಿಯಾರಾ ಮದುವೆ ಶಾಸ್ತ್ರಗಳು ನಡೆಯುತ್ತಿವೆ. ಬಹಳ ಅದ್ಧೂರಿಯಾಗಿ ಈ ಜೋಡಿ ಡೆಸ್ಟಿನೇಷನ್ ಮ್ಯಾರೇಜ್ ಪ್ಲ್ಯಾನ್ ಮಾಡಿಕೊಂಡಿದೆ. ಈಗಾಗಲೇ ಸಿದ್ಧಾರ್ಥ್ ಹಾಗೂ ಕೈರಾ ಕುಟುಂಬ ಸಮೇತರಾಗಿ ಮದುವೆ ನಡೆಯುವ ಪ್ಯಾಲೇಸ್‌ ತಲುಪಿದ್ದಾರೆ. ಪ್ಯಾಲೇಸ್‌ನಲ್ಲಿ ಮೊಬೈಲ್ ಬಳಕೆ ನಿಷೇಧಿಸಲಾಗಿದೆ. ಮದುವೆಯ ಫೋಟೊಗಳು, ವಿಡಿಯೋಗಳು ಲೀಕ್ ಆಗುವ ಕಾರಣಕ್ಕೆ ಇಂತಹ ನಿರ್ಧಾರ ತೆಗೆದುಕೊಂಡಿದ್ದಾರೆ.

ಆತ್ಮೀಯರಿಗೆ ಮಾತ್ರ ಆಹ್ವಾನ

ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ಮದುವೆಗೆ ಆತ್ಮೀಯರಿಗೆ ಮಾತ್ರ ಆಹ್ವಾನ ನೀಡಲಾಗಿದೆ. ಈ ಜೋಡಿಯ ಸ್ನೇಹಿತರಾದ ಕರಣ್ ಜೋಹರ್, ಶಾಹಿದ್ ಕಪೂರ್, ಮೀರಾ ರಜಪೂತ, ಇಶಾ ಅಂಬಾನಿ ಮತ್ತು ವರುಣ್ ಧವನ್ ಈಗಾಗಲೇ ವಿವಾಹ ಸಮಾರಂಭದಲ್ಲಿ ಭಾಗಿಯಾಗಿದ್ದಾರೆ. ಇನ್ನು, ಅತಿಥಿಗಳಿಗಾಗಿ 80 ಕೊಠಡಿಗಳನ್ನು ಕಾಯ್ದಿರಿಸಲಾಗಿದ್ದು, ಮರ್ಸಿಡಿನ್ ಬೆಂಜ್, ಜಾಗ್ವಾರ್ ಮತ್ತು ಬಿಎಂಡಬ್ಲ್ಯೂ ಸೇರಿದಂತೆ 70 ಕಾರುಗಳನ್ನು ವಿಮಾನ ನಿಲ್ದಾಣಕ್ಕೆ ವ್ಯವಸ್ಥೆ ಮಾಡಲಾಗಿದೆ. ಅರಮನೆಯ ಸುತ್ತಮುತ್ತ ಬಿಗಿಭದ್ರತೆ ಕೈಗೊಳ್ಳಲಾಗಿದೆ.

ಫೆಬ್ರವರಿ 12ರಂದು ಆರತಕ್ಷತೆ

ರಾಜಸ್ತಾನದ ಸೂರ್ಯಗಢ ಅರಮನೆಯಲ್ಲಿ ಅದ್ಧೂರಿ ವಿವಾಹ ಮಾಡಿಕೊಳ್ಳಲಿರುವ ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ಫೆಬ್ರವರಿ 12ರಂದು ಆರತಕ್ಷತೆ ಮಾಡಿಕೊಳ್ಳಲಿದ್ದಾರೆ. ಮುಂಬೈನಲ್ಲಿ ಇಬರಿಬ್ಬರ ರಿಸೆಪ್ಶನ್ ನಡೆಯಲಿದೆ ಎನ್ನಲಾಗಿದೆ.