ಸುಶಾಂತ್ ಸಿಂಗ್ ಆತ್ಮಹತ್ಯೆ ಪೂರ್ವನಿರ್ಧಾರಿತವೇ? ಅನುಮಾನಕ್ಕೆ ಕಾರಣವಾದ ಸಿಬ್ಬಂದಿ ಹೇಳಿಕೆ

ಆತ್ಮಹತ್ಯೆಯ ಸುಳಿವು ನೀಡಿದ್ದರು ಸುಶಾಂತ್

ಸುಶಾಂತ್‌ ಸಿಂಗ್ ನೇಣಿಗೆ ಕೊರಳೊಡ್ಡುವ ಮೂರು ದಿನ ಮುನ್ನಾ ಎಲ್ಲರಿಗೂ ಸಂಬಳ ನೀಡಿದ್ದರಂತೆ. ಅದೇ ದಿನ ಸಿಬ್ಬಂದಿಯೊಂದಿಗೆ ಮಾತನಾಡುತ್ತಾ ಆತ್ಮಹತ್ಯೆಯ ಸಣ್ಣ ಸುಳಿವನ್ನೂ ನೀಡಿದ್ದಾರೆ.

'ಇದೇ ಕೊನೆಯ ಸಂಬಳ ಆಗಬಹುದು ಎಂದಿದ್ದರು'

ಸಿಬ್ಬಂದಿಗೆ ಸಂಬಳ ಬಟವಾಡೆ ಮಾಡಿ, 'ಮುಂದೆ ನನ್ನಿಂದ ನಿಮಗೆ ಸಂಬಳ ನೀಡಲು ಸಾಧ್ಯವಾಗದೇ ಇರಬಹುದು. ಬಹುಷಃ ಇದು ನಾನು ನೀಡುತ್ತಿರುವ ಕೊನೆಯ ಸಂಬಳ' ಎಂದಿದ್ದರಂತೆ ಸುಶಾಂತ್ ಸಿಂಗ್ ರಜಪೂತ್. ಕೊರೊನಾ ತಂದ ಸಂಕಷ್ಟದಿಂದ ಅವರು ಹೀಗೆ ಹೇಳಿರಬಹುದು ಎಂದುಕೊಂಡರಂತೆ ಸಿಬ್ಬಂದಿ.

'ಕೊರೊನಾ ಸಮಯದಲ್ಲೂ ಪೂರ್ಣ ಸಂಬಳ ಕೊಟ್ಟಿದ್ದರು'

'ಕೊರೊನಾ ಸಂಕಷ್ಟದ ಸಮಯದಲ್ಲೂ ಸಹ ಪೂರ್ಣ ಸಂಬಳವನ್ನೇ ಸುಶಾಂತ್ ನಮಗೆ ನೀಡಿದರು. ಯಾರನ್ನೂ ಕೆಲಸದಿಂದಲೂ ತೆಗೆಯಲಿಲ್ಲ, ನಮಗೆ ಯಾವುದೇ ಸಮಸ್ಯೆ ಆಗದಂತೆ ನೋಡಿಕೊಂಡರು' ಎಂದು ಸಿಬ್ಬಂದಿ ಪೊಲೀಸರ ಬಳಿ ಹೇಳಿದ್ದಾರೆ.

ಕಣ್ಣೀರಿಟ್ಟ ಮನೆಗೆಲಸದ ಸಿಬ್ಬಂದಿ

'ಸುಶಾಂತ್ ಆತ್ಮಹತ್ಯೆ ಮಾಡಿಕೊಳ್ಳುತ್ತಾರೆಂದು ನಾವು ಎಣಿಸಿರಲೇ ಇಲ್ಲ. ಅವರು ಬಹಳ ಒಳ್ಳೆಯವರಾಗಿದ್ದರು, ನಮಗೆ ಕಷ್ಟದ ಸಮಯದಲ್ಲಿ ಹಣಕಾಸಿನ ನೆರವನ್ನೂ ನೀಡಿದ್ದರು. ನೀವು ಸಂಬಳ ಕೊಡದೇ ಇದ್ದರು ನಾವು ಬಂದು ಕೆಲಸ ಮಾಡಿಕೊಡುವುದಾಗಿ ನಾವು ಹೇಳಿದ್ದೆವು' ಎಂದು ಸಿಬ್ಬಂದಿ ಕಣ್ಣೀರಿಡುತ್ತಾ ಪೊಲೀಸರ ಬಳಿ ಹೇಳಿದ್ದಾರೆ.