ಬಾಲಿವುಡ್-ಟಾಲಿವುಡ್: ಜೊತೆಯಾಗುತ್ತಿದ್ದಾರೆ ಇಬ್ಬರು ಗಟ್ಟಿಗಿತ್ತಿಯರು

ಸಮಂತಾ ನಟಿಸಲಿರುವ ಸಿನಿಮಾಕ್ಕೆ ತಾಪ್ಸಿ ಬಂಡವಾಳ

ವಿಶೇಷವೆಂದರೆ ಇಬ್ಬರೂ ಒಂದೇ ಸಿನಿಮಾದಲ್ಲಿ ನಟಿಸುತ್ತಿಲ್ಲ ಬದಲಿಗೆ ಸಮಂತಾ ನಟಿಸಲಿರುವ ಸಿನಿಮಾಕ್ಕೆ ತಾಪ್ಸಿ ಪನ್ನು ಬಂಡವಾಳ ಹೂಡುತ್ತಿದ್ದಾರೆ. ತಾಪ್ಸಿ ಪನ್ನು ಇತ್ತೀಚೆಗಷ್ಟೆ ತಮ್ಮದೇ ಆದ ಪ್ರೊಡಕ್ಷನ್ ಹೌಸ್ 'ದಿ ಔಟ್‌ಸೈಡರ್ಸ್ ಫಿಲಮ್ಸ್' ಸ್ಥಾಪಿಸಿದ್ದಾರೆ. ತಮ್ಮ ನಿರ್ಮಾಣದ ಸಿನಿಮಾದಲ್ಲಿ ನಟಿಸುವಂತೆ ಸಮಂತಾರನ್ನು ಕೇಳಿಕೊಂಡಿದ್ದಾರೆ ತಾಪ್ಸಿ.

ಸಂದರ್ಶನದಲ್ಲಿ ಹೇಳಿರುವ ತಾಪ್ಸಿ

ಸಮಂತಾರಿಗೆ ಸಿನಿಮಾ ಆಫರ್ ಕೊಟ್ಟಿರುವ ಬಗ್ಗೆ ತಾಪ್ಸಿ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು. ಸಮಂತಾ ಸಹ ತಾಪ್ಸಿಯ ಸಿನಿಮಾದಲ್ಲಿ ನಟಿಸಲು ಉತ್ಸುಕರಾಗಿದ್ದಾರಂತೆ. ಮೂಲಗಳ ಪ್ರಕಾರ ತಾಪ್ಸಿ ಪ್ಯಾನ್ ಇಂಡಿಯಾ ಸಿನಿಮಾ ಮಾಡುತ್ತಿದ್ದು, ದಕ್ಷಿಣ ಭಾರತ ಭಾಷೆಗಳಲ್ಲಿ ಸಮಂತಾ ನಟಿಸಿದರೆ ತಾಪ್ಸಿ ಹಿಂದಿ ಭಾಷೆಯಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ.

ಮಹಿಳಾ ಪ್ರಧಾನ ಸಿನಿಮಾಗಳಲ್ಲಿ ಮಿಂಚುತ್ತಿರುವ ತಾಪ್ಸಿ

'ಫೆಮಿನಿಸ್ಟ್' ಮಾದರಿ ಸಿನಿಮಾಗಳ ಮೂಲಕ ತಾಪ್ಸಿ ಪನ್ನು ಬಾಲಿವುಡ್‌ನಲ್ಲಿ ಮನೆ ಮಾತು. 'ಪಿಂಕ್', 'ತಪ್ಪಡ್', 'ರಶ್ಮಿ ರಾಕೆಟ್', 'ಮುಲ್ಕ್', 'ಬದ್ಲಾ' ಇತರೆ ಮಹಿಳಾ ಪ್ರಧಾನ ಸಿನಿಮಾಗಳನ್ನು ನೀಡಿದ್ದಾರೆ. ಇತ್ತ ಸಮಂತಾ ಸಹ ಮಹಿಳಾ ಪ್ರಧಾನ ಸಿನಿಮಾಗಳತ್ತ ವಾಲಿ ಕೆಲ ವರ್ಷಗಳೇ ಆಗಿದ್ದು ಯಶಸ್ಸನ್ನೂ ಕಂಡುಕೊಂಡಿದ್ದಾರೆ. 'ಫ್ಯಾಮಿಲಿ ಮ್ಯಾನ್ 2' ವೆಬ್ ಸರಣಿಯ ಮೂಲಕ ತಾವು ಎಂಥಹಾ ನಟಿ ಎಂಬುದನ್ನು ಸಾಬೀತು ಮಾಡಿದ್ದಾರೆ. ಈ ಇಬ್ಬರು ಒಂದಾದರೆ ಒಂದೊಳ್ಳೆ ಮಹಿಳಾ ಪ್ರಧಾನ ಸಿನಿಮಾ ಬರುವುದಂತೂ ಖಂಡಿತ ಎನ್ನಲಾಗುತ್ತಿದೆ.

ಇಬ್ಬರು ನಟಿಯರ ಕೈಲಿ ಹಲವು ಸಿನಿಮಾಗಳು

ಇನ್ನು ನಟಿ ಸಮಂತಾ ವಿಚ್ಛೇಧನದ ಬಳಿಕ ಸಿನಿಮಾಗಳಲ್ಲಿ ತಮ್ಮನ್ನು ಹೆಚ್ಚು ತೊಡಗಿಸಿಕೊಂಡಿದ್ದಾರೆ. ಗುಣಶೇಖರ್ ನಿರ್ದೇಶನದ 'ಶಕುಂತಲಮ್', ಹರಿ ಶಂಕರ್ ನಿರ್ದೇಶನದ 'ಯಶೋಧಾ' ಜೊತೆಗೆ ತಮ್ಮ ಮೊದಲ ಹಾಲಿವುಡ್ ಸಿನಿಮಾ 'ಅರೇಂಜ್‌ಮೆಂಟ್ಸ್ ಆಫ್ ಲವ್' ಸಿನಿಮಾದಲ್ಲಿ ನಟಿಸಲಿದ್ದಾರೆ. ಇವುಗಳ ಜೊತೆಗೆ ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ ನಟಿಸಿರುವ 'ಪುಷ್ಪ' ಸಿನಿಮಾದಲ್ಲಿ ಮೊದಲ ಬಾರಿಗೆ ಐಟಂ ಹಾಡಿಗೆ ಕುಣಿದಿದ್ದಾರೆ. ಇನ್ನು ತಾಪ್ಸಿ ಪನ್ನು ನಟನೆಯ 'ಶಬಾಶ್ ಮಿತು' ಸಿನಿಮಾ ಬಿಡುಗಡೆ ಆಗಲಿದೆ. ಇದರ ಜೊತೆಗೆ 'ದೊ ಬಾರ', 'ಬ್ಲರ್', 'ಮಿಷನ್ ಇಂಪಾಸಿಬಲ್', 'ತಡ್ಕಾ', 'ಲೂಪ್ ಲಪೇಟಾ', 'ವೋಹ್ ಲಡ್ಕಿ ಹೇ ಕಹಾ' ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.