ಶಾರುಖ್ ಖಾನ್ ಸಿನಿಮಾ ಸೆಟ್‌ನಲ್ಲಿ ವಿಜಯ್! ಚಿತ್ರ ವೈರಲ್

ಶಾರುಖ್ ಖಾನ್ ಹೊಸ ಸಿನಿಮಾ 'ಜವಾನ್'

ಶಾರುಖ್ ಖಾನ್ 'ಜವಾನ್' ಹೆಸರಿನ ಸಿನಿಮಾದಲ್ಲಿ ನಟಿಸುತ್ತಿದ್ದು, ಸಿನಿಮಾವನ್ನು ತಮಿಳಿನ ಸ್ಟಾರ್ ನಿರ್ದೇಶಕ ಅಟ್ಲಿ ನಿರ್ದೇಶಿಸುತ್ತಿದ್ದಾರೆ. ಆಕ್ಷನ್ ಭರಿತ ಈ ಸಿನಿಮಾದಲ್ಲಿ ನಯನತಾರಾ ನಾಯಕಿಯಾಗಿದ್ದಾರೆ. ತಮಿಳಿನ ಯೋಗಿಬಾಬು ಸೇರಿದಂತೆ ಇತರ ಕೆಲವು ನಟರು ಸಹ ಇದ್ದಾರೆ. ಆದರೆ ಇದೀಗ ಅಟ್ಲಿ ತಮ್ಮ ಜವಾನ್ ಸಿನಿಮಾಕ್ಕೆ ತಮಿಳಿನ ಮಾತ್ರವೇ ಅಲ್ಲದೆ ಭಾರತದ ಅತ್ಯಂತ ಜನಪ್ರಿಯ ನಟನನ್ನು ಕರೆತಂದಿದ್ದಾರೆ.

'ಜವಾನ್' ಸಿನಿಮಾದಲ್ಲಿ ಅತಿಥಿ ಪಾತ್ರ

ನಟ ವಿಜಯ್ ಅವರು ಶಾರುಖ್ ಖಾನ್‌ರ 'ಜವಾನ್' ಸಿನಿಮಾದಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದ್ದು. ಇದಕ್ಕೆ ಸಾಕ್ಷಿಯಾಗಿ ಸಾಮಾಜಿಕ ಜಾಲತಾಣದಲ್ಲಿ ಚಿತ್ರವೊಂದು ಹರಿದಾಡುತ್ತಿದ್ದು, ಶಾರುಖ್ ಖಾನ್ ಜೊತೆ ವಿಜಯ್ ಸಿನಿಮಾ ಚಿತ್ರೀಕರಣದಲ್ಲಿ ಕುಳಿತಿರುವ ಚಿತ್ರ ವೈರಲ್ ಆಗಿದೆ. ಆ ಮೂಲಕ ವಿಜಯ್, ಶಾರುಖ್ ಖಾನ್‌ರ ಸಿನಿಮಾದಲ್ಲಿ ನಟಿಸುತ್ತಿರುವುದು ಖಾತ್ರಿಯಾಗಿದೆ.

ಅಕ್ಷಯ್ ಸಿನಿಮಾದಲ್ಲಿ ಸ್ಟೆಪ್ ಹಾಕಿರುವ ವಿಜಯ್

ವಿಜಯ್‌ ಈ ಹಿಂದೆಯೂ ಬಾಲಿವುಡ್ ಸಿನಿಮಾದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ ಆದರೆ ಅದು ಬಹಳ ಕಡಿಮೆ ಅವಧಿಗೆ. ಅಕ್ಷಯ್ ಕುಮಾರ್ ನಟನೆಯ 'ರೌಡಿ ರಾಥೋಡ್' ಸಿನಿಮಾದ ಹಾಡೊಂದರಲ್ಲಿ ಮಧ್ಯದಲ್ಲಿ ಬಂದು ಒಂದೆರಡು ಸ್ಟೆಪ್ ಹಾಕಿ ಹೋಗುತ್ತಾರೆ ಅಷ್ಟೆ. ಅದಾದ ಬಳಿಕ ಇದು ಎರಡನೇ ಬಾರಿ ವಿಜಯ್ ಅವರು ಹಿಂದಿ ಸಿನಿಮಾ ಒಂದರಲ್ಲಿ ಕಾಣಿಸಿಕೊಂಡಿದ್ದಾರೆ.

ಶಾರುಖ್ ಸಿನಿಮಾದಲ್ಲಿ ನಟಿಸಿದ್ದ ರಜನೀಕಾಂತ್

ಇನ್ನು ನಟ ಶಾರುಖ್ ಖಾನ್ ತಮ್ಮ ಸಿನಿಮಾಗಳಲ್ಲಿ ದಕ್ಷಿಣದ ಸ್ಟಾರ್ ನಟರನ್ನು ಅತಿಥಿ ಪಾತ್ರಕ್ಕೆ ಕರೆತರುತ್ತಿರುವುದು ಸಹ ಇದು ಮೊದಲೇನೂ ಅಲ್ಲ. ಈ ಹಿಂದೆ ಶಾರುಖ್ ಅವರೇ ನಿರ್ಮಾಣ ಮಾಡಿದ್ದ ಭಾರಿ ಬಜೆಟ್‌ನ ಸಿನಿಮಾ 'ರಾ ಒನ್' ಸಿನಿಮಾದಲ್ಲಿ ರಜನೀಕಾಂತ್ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆದರೆ ಆ ಸಿನಿಮಾ ನಿರೀಕ್ಷಿತ ಮಟ್ಟದಲ್ಲಿ ಹಿಟ್ ಆಗಲಿಲ್ಲ. ಆ ಸಿನಿಮಾದಲ್ಲಿ ಹಾಲಿವುಡ್‌ನ ಎಕೋನ್ ಅವರನ್ನು ಕರೆತಂಡು ಹಾಡು ಹಾಡಿಸಿದ್ದರು ಶಾರುಖ್ ಖಾನ್. ಇದು ಮಾತ್ರವೇ ಅಲ್ಲದೆ, ಶಾರುಖ್ ಖಾನ್ ಅವರು ಕಮಲ್ ಹಾಸನ್‌ರ 'ಹೇ ರಾಮ್' ಸಿನಿಮಾದಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸಿದ್ದರು.