'ತಾಕತ್ತಿದ್ದರೆ ತಡೆಯಿರಿ': ಸಲ್ಮಾನ್ ಖಾನ್ ಮನೆಗೆ ಬಾಂಬ್ ಬ್ಲಾಸ್ಟ್ ಬೆದರಿಕೆ.!

ಏನಿದು ಘಟನೆ.?

''ಬಾಂದ್ರಾದಲ್ಲಿ ಇರುವ ಗ್ಯಾಲಕ್ಸಿ ಅಪಾರ್ಟ್ಮೆಂಟ್ ನಲ್ಲಿ ಸಲ್ಮಾನ್ ಖಾನ್ ಮನೆಯಲ್ಲಿ ಇನ್ನೆರಡು ಗಂಟೆಯೊಳಗೆ ಬಾಂಬ್ ಬ್ಲಾಸ್ಟ್ ಆಗುತ್ತೆ. ತಾಕತ್ತಿದ್ದರೆ ತಡೆಯಿರಿ'' ಎಂದು ಮುಂಬೈ ಪೊಲೀಸರಿಗೆ ಡಿಸೆಂಬರ್ 4 ರಂದು ಇ-ಮೇಲ್ ಬಂದಿತ್ತು. ಕೂಡಲೆ ಹೈ ಅಲರ್ಟ್ ಆದ ಮುಂಬೈ ಪೊಲೀಸರು ಬಾಂಬ್ ನಿಷ್ಕ್ರಿಯ ದಳದೊಂದಿಗೆ ಗ್ಯಾಲಕ್ಸಿ ಅಪಾರ್ಟ್ಮೆಂಟ್ ನಲ್ಲಿ ಶೋಧ ಕಾರ್ಯ ನಡೆಸಿದರು.

ಮನೆಯಲ್ಲಿ ಸಲ್ಮಾನ್ ಖಾನ್ ಇರಲಿಲ್ಲ.!

ಗ್ಯಾಲಕ್ಸಿ ಅಪಾರ್ಟ್ಮೆಂಟ್ ನಲ್ಲಿ ಪೊಲೀಸರು ಶೋಧ ಕಾರ್ಯ ನಡೆಸುವಾಗ ಸಲ್ಮಾನ್ ಖಾನ್ ಮನೆಯಲ್ಲಿ ಇರಲಿಲ್ಲ. 'ದಬಾಂಗ್-3' ಪ್ರಚಾರ ಕಾರ್ಯಕ್ರಮಗಳಲ್ಲಿ ಬಿಜಿಯಾಗಿದ್ದರು. ಮನೆಯಲ್ಲಿದ್ದ ತಂದೆ ಸಲೀಂ ಖಾನ್, ಸಲ್ಮಾ ಖಾನ್, ಸಹೋದರಿ ಅರ್ಪಿತಾ ರನ್ನ ಸುರಕ್ಷಿತ ಜಾಗಕ್ಕೆ ಶಿಫ್ಟ್ ಮಾಡಿ ಪೊಲೀಸರು ಬಾಂಬ್ ಗಾಗಿ ಹುಡುಕಾಟ ನಡೆಸಿದರು.

ಹುಸಿ ಬಾಂಬ್ ಇ-ಮೇಲ್.!

ಗ್ಯಾಲಕ್ಸಿ ಅಪಾರ್ಟ್ಮೆಂಟ್ ನಲ್ಲಿ ಸತತ ನಾಲ್ಕು ತಾಸು ಶೋಧ ನಡೆಸಲಾಯಿತು. ಆದ್ರೆ, ಯಾವುದೇ ಸ್ಫೋಟಕ ವಸ್ತುಗಳು ಪತ್ತೆ ಆಗಲಿಲ್ಲ. ಬಳಿಕ ಹುಸಿ ಬಾಂಬ್ ಇ-ಮೇಲ್ ಕಳುಹಿಸಿದ ವ್ಯಕ್ತಿಯನ್ನ ಪೊಲೀಸರು ಟ್ರ್ಯಾಕ್ ಮಾಡಿದರು.

16 ವರ್ಷದ ಯುವಕ

ಪೊಲೀಸರಿಗೆ ಇ-ಮೇಲ್ ಕಳುಹಿಸಿದ್ದು ಉತ್ತರ ಪ್ರದೇಶದ ಗಾಜಿಯಾಬಾದ್ ನ 16 ವರ್ಷದ ಯುವಕ ಎಂದು ತನಿಖೆಯಲ್ಲಿ ತಿಳಿದು ಬಂತು. ಆತನ ವಿರುದ್ಧ ಚಾರ್ಜ್ ಶೀಟ್ ಫೈಲ್ ಮಾಡಿ, ನ್ಯಾಯಾಲಯದ ಮುಂದೆ ಪೊಲೀಸರು ಹಾಜರು ಪಡಿಸಿದ್ದಾರೆ.