ಸುದೀಪ್ ಇಲ್ಲದ 'ಟೈಗರ್ ಜಿಂದಾ ಹೈ' ಟ್ರೈಲರ್ ರಿಲೀಸ್.!

ಎಲ್ಲ ಅಂದುಕೊಂಡಂತೆ ಆಗಿದ್ದರೇ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್, ಸಲ್ಮಾನ್ ಖಾನ್ ಜೊತೆ ಅಭಿನಯಿಸಬೇಕಿತ್ತು. ಆದ್ರೆ, ಸುದೀಪ್ ಅವರ ಬಿಜಿ ಶೆಡ್ಯೂಲ್ ನಿಂದ ಈ ಸಿನಿಮಾದಿಂದ ಕಿಚ್ಚ ಹಿಂದೆ ಸರಿಯಬೇಕಾಯಿತು. ಇದೀಗ ಸುದೀಪ್ ಇಲ್ಲದೇ ಸಲ್ಮಾನ್ ಖಾನ್ ಅಭಿನಯಿಸಿರುವ 'ಟೈಗರ್ ಜಿಂದಾ ಹೈ' ಚಿತ್ರದ ಟ್ರೈಲರ್ ರಿಲೀಸ್ ಆಗಿದೆ.

ಇಂಡಿಯನ್ ಸೀಕ್ರೆಟ್ ಏಜೆಂಟ್ ಪಾತ್ರದಲ್ಲಿ ಸಲ್ಲು ಮತ್ತೆ ಕಮ್ ಬ್ಯಾಕ್ ಮಾಡಿದ್ದಾರೆ. ಈ ಹಿಂದೆ 'ಏಕ್ತಾ ಟೈಗರ್' ಚಿತ್ರದಲ್ಲಿ ಸಲ್ಲು ಅಬ್ಬರಿಸಿದ್ದರು. ಈ ಚಿತ್ರದ ಮುಂದುವರೆದ ಭಾಗ 'ಟೈಗರ್ ಜಿಂದಾ ಹೈ' ಚಿತ್ರವಾಗಿದ್ದು, ಈ ಸಲವೂ ತಮ್ಮ ಅಭಿಮಾನಿಗಳಿಗೆ ಫುಲ್ ಎಂಟರ್ ಟೈನ್ ನೀಡಲಿದ್ದಾರೆ.

ಇನ್ನು ಸಲ್ಮಾನ್ ಗೆ ಕತ್ರಿನಾ ಕೈಫ್ ಸಾಥ್ ಕೊಟ್ಟಿದ್ದು, ಪಾಕಿಸ್ತಾನದ ಸ್ಪೈ (ಪತ್ತೆದಾರಿ) ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಮೂಲಕ 'ಏಕ್ತಾ ಟೈಗರ್' ನಲ್ಲಿದ್ದ ಅದ್ಭುತ ಸಾಹಸ ಮತ್ತೆ ಈ ಚಿತ್ರದಲ್ಲೂ ಮುಂದುವರೆಯಲಿದೆ.

ಅಂದ್ಹಾಗೆ, ಇದೊಂದು ಟೆರರಿಸಂ ಕುರಿತಾದ ಕಥೆಯಾಗಿದ್ದು, ಭಾರತದ 25 ನರ್ಸ್ ಗಳನ್ನ ಐ.ಎಸ್.ಐ ಟೆರರಿಸ್ಟ್ ಕಿಡ್ನಾಪ್ ಮಾಡ್ತಾರೆ. ಅವರನ್ನ ರಕ್ಷಿಸಿ ಭಾರತಕ್ಕೆ ಕರೆತರುವುದು 'ಟೈಗರ್ ಜಿಂದಾ ಹೈ' ಆಪರೇಷನ್.

ಅಲಿ ಅಬ್ಬಾಸ್ ಜಾಫರ್ ಈ ಚಿತ್ರವನ್ನ ನಿರ್ದೇಶನ ಮಾಡಿದ್ದು, ಆದಿತ್ಯ ಚೋಪ್ರಾ ನಿರ್ಮಾಣ ಮಾಡಿದ್ದಾರೆ. ಖಳನಾಯಕನಾಗಿ ಅಂಗದ್ ಬೇಡಿ ಬಣ್ಣ ಹಚ್ಚಿದ್ದಾರೆ. ಸದ್ಯ, ಪೋಸ್ಟರ್ ಮತ್ತು ಟ್ರೈಲರ್ ಮೂಲಕ ನಿರೀಕ್ಷೆ ಡಬಲ್ ಮಾಡಿರುವ 'ಟೈಗರ್ ಜಿಂದಾ ಹೈ' ಇದೇ ಕ್ರಿಸ್ ಮಸ್ ಪ್ರಯುಕ್ತ ಬಿಡುಗಡೆಯಾಗುತ್ತಿದೆ.