De De Pyaar De 2 BO Day 3 ; ಮ್ಯಾಜಿಕ್ ಮಾಡ್ತಾ ಅಜಯ್ ದೇವಗನ್-ಮಾಧವನ್ ಕಾಮಿಡಿ ? 3 ದಿನದಲ್ಲಿ ಗಳಿಸಿದ್ದೆಷ್ಟು ?

ಹಿಂದಿ ಚಿತ್ರರಂಗದಲ್ಲಿ ಈ ವರ್ಷ ಹೇಳಿಕೊಳ್ಳುವಂತಹ ಪವಾಡ ನಡೆದಿಲ್ಲ. ಈ ಕಾರಣಕ್ಕೆ ಅಜಯ್ ದೇವಗನ್, ಆರ್. ಮಾಧವನ್ ಹಾಗೂ ರಕುಲ್ ಪ್ರೀತ್ ಸಿಂಗ್ ಅಭಿನಯದ ''ದೇ ದೇ ಪ್ಯಾರ್ ದೇ''2 ಚಿತ್ರದ ಮೇಲೆ ಎಲ್ಲರ ಕಣ್ಣಿತ್ತು. ಮೊದಲ ದಿನ ಚಿತ್ರ ಉತ್ತಮವಾದ ಮೊತ್ತ ಕಲೆ ಹಾಕುವ ನಿರೀಕ್ಷೆ ಇತ್ತು. ಆದರೆ ಈ ನಿರೀಕ್ಷೆ ಹುಸಿಯಾಯ್ತು.

ಟ್ರೇಲರ್ ಮತ್ತು ಹಾಡುಗಳು ಸದ್ದು ಮಾಡಿದ್ದರೂ ಕೂಡ ಅದ್ಯಾಕೋ ಪ್ರೇಕ್ಷಕರು ಮೊದಲ ದಿನ ಚಿತ್ರಮಂದಿರದತ್ತ ಬರುವ ಆಸಕ್ತಿ ತೋರಿಸಿದ್ದು ಕಡಿಮೆ. ಇದಕ್ಕೆ ಕೈಗನ್ನಡಿ ಎಂಬಂತೆ ಬಾಲಿವುಡ್‌ ಅಂಕಿ ಅಂಶಗಳನ್ನು ಹಂಚಿಕೊಳ್ಳುವ ''ಸ್ಯಾಕ್ನಿಲ್'' ಪ್ರಕಾರ ಮೊದಲ ದಿನ ಈ ಚಿತ್ರ ಗಳಿಸಿದ್ದು ಕೇವಲ ₹ 8.75 ಕೋಟಿ ಮಾತ್ರ.

ಹೀಗಾಗಿ ಅಕ್ಷಯ್ ಕುಮಾರ್ ಅವರಂತೆಯೇ ಅಜಯ್ ದೇವಗನ್‌ಗೆ ಅದೃಷ್ಟ ಕೈ ಕೊಟ್ಟಿದೆ ಎಂದು ಬಾಲಿವುಡ್‌ನಲ್ಲಿ ಹಲವರು ಮಾತನಾಡಿಕೊಂಡರು. ಆದರೆ.. ಎರಡನೇ ದಿನ ಚಿತ್ರದ ಗಳಿಕೆಯಲ್ಲಿ ಚೇತರಿಕೆ ಕಂಡು ಬಂತು. ''ಸ್ಯಾಕ್ನಿಲ್'' ಪ್ರಕಾರ ಚಿತ್ರ ಎರಡನೇ ದಿನ ಅಂದರೆ ಶನಿವಾರ ( ನವೆಂಬರ್ 15 ) ₹ 12.25 ಕೋಟಿ ಗಳಿಸುವಲ್ಲಿ ಯಶಸ್ವಿಯಾಯ್ತು.

ಇನ್ನು ನಿನ್ನೆ ಭಾನುವಾರ ( ನವೆಂಬರ್ 16 ) ಆದ ಕಾರಣ ಚಿತ್ರದ ಗಳಿಕೆ ಇನ್ನೂ ಹೆಚ್ಚಾಗುತ್ತೆ ಎಂದು ಹಲವರು ಅಂದುಕೊಂಡಿದ್ದರು. ಬಾಲಿವುಡ್‌ ಪಂಡಿತರು ₹15 ಕೋಟಿಗೂ ಅಧಿಕ ಹಣ ಗಳಿಸುತ್ತೆ ಎನ್ನುವ ವಿಶ್ವಾಸ ವ್ಯಕ್ತಪಡಿಸಿದ್ದರು.

ಆದರೆ.. ''ದೇ ದೇ ಪ್ಯಾರ್ ದೇ 2'' ನಿನ್ನೆ ( ಭಾನುವಾರ ) ಗಳಿಸಿದ್ದು ಕೇವಲ ₹13.75 ಕೋಟಿ ಮಾತ್ರ. ಈ ಮೂಲಕ ಮೂರು ದಿನದಲ್ಲಿ ₹ 34.75 ಕೋಟಿಯನ್ನು ಈ ಕಾಮಿಡಿ ಎಂಟ್ರಟೇನರ್ ಚಿತ್ರ ಕೊಳ್ಳೆ ಹೊಡೆದಿದೆ.

''ಸ್ಯಾಕ್ನಿಲ್'' ಪ್ರಕಾರ ಚಿತ್ರದ ಮೊದಲ 3 ದಿನದ ಗಳಿಕೆ ಈ ಕೆಳಗಿನಂತೆ ಇದೆ.

ಮೊದಲ ದಿನ ( ಶುಕ್ರವಾರ ) : ₹8.75 ಕೋಟಿ
ಎರಡನೇ ದಿನ ( ಶನಿವಾರ ) : ₹12.25 ಕೋಟಿ
ಮೂರನೇ ದಿನ ( ಭಾನುವಾರ ) : ₹13.75 ಕೋಟಿ

ಒಟ್ಟು ಗಳಿಕೆ : ₹34.75 ಕೋಟಿ

ನಿಜಾ.. ಅಜಯ್ ದೇವಗನ್ ಹೆಸರಿಗೆ ಈ ಮೂರು ದಿನದ ಗಳಿಕೆ ಕಮ್ಮಿನೇ. ಆದರೆ ಮುಳುಗುವವನಿಗೆ ಹುಲ್ಲು ಕಡ್ಡಿ ಆಸರೆ ಎಂಬಂತೆ ಸದ್ಯ ₹ 34.75 ಕೋಟಿಗೆ ತೃಪ್ತಿಯನ್ನು ಪಟ್ಟಿರುವ ಚಿತ್ರತಂಡಕ್ಕೆ ಮುಂಬರುವ ದಿನಗಳಲ್ಲಿ ಚಿತ್ರದ ಗಳಿಕೆಯಲ್ಲಿ ಇನ್ನೂ ಏರಿಕೆಯಾಗುತ್ತೆ ಎನ್ನುವ ವಿಶ್ವಾಸದಲ್ಲಿ ಇದೆ.

ಇನ್ನೂ ₹ 34.75 ಕೋಟಿ ಗಳಿಸುವ ಮೂಲಕ ''ದೇ ದೇ ಪ್ಯಾರ್ ದೇ 2'' ಬಾಕ್ಸಾಫೀಸ್‌ನಲ್ಲಿ ಈ ವರ್ಷ ಬಂದ ಮೂರು ರೊಮ್ಯಾಂಟಿಕ್ ಚಿತ್ರಗಳನ್ನು ಹಿಂದಿಕ್ಕಿದೆ. ಆ ಪೈಕಿ ಕರಣ್ ಜೋಹರ್ ನಿರ್ಮಾಣದ ಎರಡು ಚಿತ್ರಗಳಿರುವುದು ವಿಶೇಷ.

ಹೌದು, ಈ ವರ್ಷ ತೆರೆಗೆ ಬಂದ ಸಿದ್ದಾರ್ಥ್ ಮಲ್ಹೋತ್ರಾ ಮತ್ತು ಜಾಹ್ನವಿ ಕಪೂರ್ ಅಭಿನಯದ, ಕರಣ್ ಜೋಹರ್ ನಿರ್ಮಾಣದ, ''ಧಡಕ್ 2''ಚಿತ್ರಮಂದಿರಗಳಲ್ಲಿ 17 ದಿನ ಪ್ರದರ್ಶನ ಕಂಡಿತ್ತು. ಈ 17 ದಿನದಲ್ಲಿ ಕೇವಲ ₹22.45 ಕೋಟಿಯನ್ನಷ್ಟೇ ಚಿತ್ರ ಗಳಿಸಿತ್ತು. ಮತ್ತೊಂದು ಕಡೆ ಕರಣ್ ಜೋಹರ್ ನಿರ್ಮಾಣದಲ್ಲಿ ಬಂದ ವರುಣ್ ಧವನ್ ಮತ್ತು ಜಾಹ್ನವಿ ಕಪೂರ್ ಅಭಿನಯದ '' ಸನ್ನಿ ಸಂಸ್ಕಾರಿ ಕಿ ತುಳಸಿ ಕುಮಾರಿ'' ಮೊದಲ ಮೂರು ದಿನ ₹32.12 ಕೋಟಿಯನ್ನು ಗಳಿಸಿತ್ತು. ಈ ಎರಡು ರೊಮ್ಯಾಂಟಿಕ್ ಚಿತ್ರದ ಗಳಿಕೆಯನ್ನು ''ದೇ ದೇ ಪ್ಯಾರ್ ದೇ 2'' ಹಿಂದಿಕ್ಕಿದೆ.

ಒಟ್ನಲ್ಲಿ ಸದ್ಯ ''ದೇ ದೇ ಪ್ಯಾರ್ ದೇ 2'' ಮೊದಲ ಮೂರು ದಿನದಲ್ಲಿ ₹ 34.75 ಕೋಟಿ ಗಳಿಸಿದೆ. ಇಂದಿನಿಂದ ಈ ಚಿತ್ರದ ಅಸಲಿ ಅಗ್ನಿ ಪರೀಕ್ಷೆ ಶುರುವಾಗಲಿದೆ. ಈ ಪರೀಕ್ಷೆಯಲ್ಲಿ ಅಜಯ್ ದೇವಗನ್ ಪಾಸಾಗುತ್ತಾರಾ..? ಎನ್ನುವುದನ್ನು ಕಾದು ನೋಡಬೇಕಿದೆ.

Disclaimer: ಈ ವರದಿಯಲ್ಲಿ ನೀಡಲಾಗಿರುವ ಸಿನಿಮಾದ ಬಾಕ್ಸ್ ಆಫೀಸ್ ಅಂಕಿ ಅಂಶಗಳ ಮಾಹಿತಿಯನ್ನು https://www.sacnilk.com/, https://x.com/taran_adarsh, https://x.com/rameshlaus?lang=en, ನಿರ್ಮಾಣ ಸಂಸ್ಥೆಗಳು ಹಾಗೂ ಸಾರ್ವಜನಿಕವಾಗಿ ಲಭ್ಯವಿರುವ ಹಲವು ವೇದಿಕೆಗಳಿಂದ ತೆಗೆದುಕೊಳ್ಳಲಾಗಿದೆ. ಸಿನಿಮಾಗೆ ಸಂಬಂಧಿಸಿದ ಬಾಕ್ಸ್ ಆಫೀಸ್ ಕಲೆಕ್ಷನ್‌ಗಳ ಕುರಿತು ಪ್ರಕಟಿಸುವ ವರದಿಗಳಿಗೆ ಫಿಲ್ಮಿಬೀಟ್ ಯಾವುದೇ ಜವಾಬ್ದಾರಿಯನ್ನು ತೆಗೆದುಕೊಳ್ಳುವುದಿಲ್ಲ.