ಪವರ್ ಸ್ಟಾರ್‌ಗೆ ಬಾಲಿವುಡ್ ಶಾಕ್: ತೆಲುಗು ಮಣ್ಣಲ್ಲೇ ಪವನ್ ಸಿನಿಮಾ ಮಣಿಸಿದ 'ಧುರಂಧರ್ 2'

ಪವನ್ ಕಲ್ಯಾಣ್ ನಟನೆಯ 'ಉಸ್ತಾದ್ ಭಗತ್ ಸಿಂಗ್' ಸಿನಿಮಾದ ಕಲೆಕ್ಷನ್‌ನಲ್ಲಿ ಭಾರಿ ಕುಸಿತ ಕಂಡಿದೆ. ಬಾಲಿವುಡ್‌ನ 'ಧುರಂಧರ್ 2' ಅಬ್ಬರದ ಮುಂದೆ ತೆಲುಗು ಮಾರುಕಟ್ಟೆಯಲ್ಲೇ ಪವನ್ ಸಿನಿಮಾ ಮಂಕಾಗಿದೆ. ಐದನೇ ದಿನದ ಅಂತ್ಯಕ್ಕೆ ವಿಶ್ವಾದ್ಯಂತ ಈ ಆಕ್ಷನ್ ಥ್ರಿಲ್ಲರ್ ಎಷ್ಟು ಕೋಟಿ ಗಳಿಸಿದೆ? ಇಲ್ಲಿದೆ ಕಂಪ್ಲೀಟ್ ಡಿಟೇಲ್ಸ್.

ಪವರ್ ಸ್ಟಾರ್ ಪವನ್ ಕಲ್ಯಾಣ್ ಮತ್ತು ಹರೀಶ್ ಶಂಕರ್ ಕಾಂಬಿನೇಶನ್ ಎಂದರೆ ಅಭಿಮಾನಿಗಳಲ್ಲಿ ಬೆಟ್ಟದಷ್ಟು ನಿರೀಕ್ಷೆ ಇತ್ತು. ಕಳೆದ ಗುರುವಾರ (ಮಾರ್ಚ್ 19) ಯುಗಾದಿ ಹಬ್ಬದ ಪ್ರಯುಕ್ತ ಬಿಡುಗಡೆಯಾದ 'ಉಸ್ತಾದ್ ಭಗತ್ ಸಿಂಗ್' ಆರಂಭದಲ್ಲಿ ಭರ್ಜರಿ ಓಪನಿಂಗ್ ಪಡೆದುಕೊಂಡಿತ್ತು. ಆದರೆ, ಈಗ ಮೊದಲ ಸೋಮವಾರದ ಅಗ್ನಿಪರೀಕ್ಷೆಯಲ್ಲಿ ಸಿನಿಮಾ ಎಡವಿದಂತಿದೆ.

ಟ್ರೇಡ್ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿ ಪ್ರಕಾರ, 5ನೇ ದಿನವಾದ ಸೋಮವಾರ ಈ ಚಿತ್ರ ಭಾರತದಾದ್ಯಂತ ಕೇವಲ 1.96 ಕೋಟಿ ರೂ. ಗಳಿಸಿದೆ. ಭಾನುವಾರದ ಗಳಿಕೆಗೆ ಹೋಲಿಸಿದರೆ ಇದು ಬರೋಬ್ಬರಿ 74% ರಷ್ಟು ಇಳಿಕೆಯಾಗಿದೆ. ಭಾನುವಾರ ಈ ಸಿನಿಮಾ 7.50 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ವಾರದ ದಿನಗಳಲ್ಲಿ ಪ್ರೇಕ್ಷಕರು ಚಿತ್ರಮಂದಿರದತ್ತ ಬಾರದಿರುವುದು ಚಿತ್ರತಂಡಕ್ಕೆ ಆತಂಕ ತಂದಿದೆ.

ಶೋಗಳ ಸಂಖ್ಯೆಯಲ್ಲೂ ದೊಡ್ಡ ವ್ಯತ್ಯಾಸ ಕಂಡುಬಂದಿದೆ. ಭಾನುವಾರ 3,200 ಪ್ರದರ್ಶನ ಕಂಡಿದ್ದ ಸಿನಿಮಾ, ಸೋಮವಾರದ ವೇಳೆಗೆ 2,715 ಶೋಗಳಿಗೆ ಕುಸಿದಿದೆ. ಆರಂಭದ ದಿನಗಳಲ್ಲಿ ಪವನ್ ಕಲ್ಯಾಣ್ ಅವರ ರಾಜಕೀಯ ವರ್ಚಸ್ಸು ಮತ್ತು ಕ್ರೇಜ್ ಕೆಲಸ ಮಾಡಿತ್ತಾದರೂ, ಈಗ ಕಥೆಯ ಬಲ ಕಡಿಮೆಯಾದಂತೆ ಕಾಣುತ್ತಿದೆ.

Also Read

'ಉಸ್ತಾದ್ ಭಗತ್ ಸಿಂಗ್' ಸಿನಿಮಾ ಚೆನ್ನಾಗಿಲ್ಲ ಎಂದವನಿಗೆ ಪವನ್ ಫ್ಯಾನ್ಸ್ ಗೂಸಾ- ವೀಡಿಯೋ

ರಣವೀರ್ ಸಿಂಗ್ 'ಧುರಂಧರ್ 2' ಮುಂದೆ ಮಣಿದ ಪವರ್ ಸ್ಟಾರ್

ಇಲ್ಲಿ ಆಶ್ಚರ್ಯದ ಸಂಗತಿಯೆಂದರೆ, ಪವನ್ ಕಲ್ಯಾಣ್ ಅವರ ಭದ್ರಕೋಟೆಯಾದ ತೆಲುಗು ರಾಜ್ಯಗಳಲ್ಲೇ ಬಾಲಿವುಡ್ ಸಿನಿಮಾ ಅಬ್ಬರಿಸುತ್ತಿದೆ. ಆದಿತ್ಯ ಧರ್ ನಿರ್ದೇಶನದ ಸ್ಪೈ ಥ್ರಿಲ್ಲರ್ 'ಧುರಂಧರ್ 2: ದ ರಿವೇಂಜ್' ಈಗ ತೆಲುಗಿನಲ್ಲೂ ಅಧಿಪತ್ಯ ಸಾಧಿಸಿದೆ. ರಣವೀರ್ ಸಿಂಗ್ ನಟನೆಯ ಈ ಸಿನಿಮಾ ಸೋಮವಾರ ತೆಲುಗು ಆವೃತ್ತಿಯಿಂದಲೇ 3.50 ಕೋಟಿ ರೂ. ಗಳಿಸಿದೆ.

ಪವನ್ ಕಲ್ಯಾಣ್ ಸಿನಿಮಾ 1.96 ಕೋಟಿ ಗಳಿಸಿದರೆ, ರಣವೀರ್ ಸಿನಿಮಾ ಅದಕ್ಕಿಂತ ದುಪ್ಪಟ್ಟು ಗಳಿಸಿರುವುದು ಟ್ರೇಡ್ ಪಂಡಿತರ ಹುಬ್ಬೇರಿಸುವಂತೆ ಮಾಡಿದೆ. 'ಧುರಂಧರ್ 2' ಜಾಗತಿಕವಾಗಿ ಈಗಾಗಲೇ 800 ಕೋಟಿ ರೂ.ಗಳ ಗಡಿ ದಾಟಿ ಬ್ಲಾಕ್‌ಬಸ್ಟರ್ ಆಗಿ ಹೊರಹೊಮ್ಮಿದೆ. ತೆಲುಗು ಪ್ರೇಕ್ಷಕರು ಕೂಡ ಈಗ ಡಬ್ಬಿಂಗ್ ಸಿನಿಮಾಗೆ ಹೆಚ್ಚಿನ ಮನ್ನಣೆ ನೀಡುತ್ತಿದ್ದಾರೆ.

ಶುಕ್ರವಾರ ಮತ್ತು ಶನಿವಾರದವರೆಗೆ 'ಉಸ್ತಾದ್ ಭಗತ್ ಸಿಂಗ್' ಮುನ್ನಡೆ ಸಾಧಿಸಿತ್ತು. ಶನಿವಾರ 9.05 ಕೋಟಿ ರೂ. ಗಳಿಸಿದ್ದ ಪವನ್ ಸಿನಿಮಾ, ಧುರಂಧರ್ ಸಿನಿಮಾಗಿಂತ ಮುಂದಿತ್ತು. ಆದರೆ ಸೋಮವಾರದ ಹೊತ್ತಿಗೆ ಚಿತ್ರದ ವೇಗ ಪೂರ್ತಿ ಕಡಿಮೆಯಾಗಿದೆ. ಇದು ತೆಲುಗು ಚಿತ್ರರಂಗದ ಪಾಲಿಗೆ ತುಸು ಕಹಿ ಸುದ್ದಿಯೇ ಸರಿ.

ವಿಶ್ವಾದ್ಯಂತ ಒಟ್ಟು ಕಲೆಕ್ಷನ್ ಎಷ್ಟು?

ಐದು ದಿನಗಳ ಅಂತ್ಯಕ್ಕೆ 'ಉಸ್ತಾದ್ ಭಗತ್ ಸಿಂಗ್' ಒಟ್ಟು ಗಳಿಕೆ ಸಾಧಾರಣವಾಗಿದೆ. ಭಾರತದಲ್ಲಿ ಈವರೆಗೆ ಸಿನಿಮಾ ಒಟ್ಟು 73.35 ಕೋಟಿ ರೂ. ಸಂಗ್ರಹಿಸಿದೆ. ಇದರಲ್ಲಿ ನಿವ್ವಳ ಗಳಿಕೆ 62.26 ಕೋಟಿ ರೂ. ಆಗಿದೆ. ವಿದೇಶಿ ಮಾರುಕಟ್ಟೆಯಲ್ಲಿ ಸಿನಿಮಾ ಸುಮಾರು 10.12 ಕೋಟಿ ರೂ. ಗಳಿಸುವಲ್ಲಿ ಯಶಸ್ವಿಯಾಗಿದೆ.

ಒಟ್ಟಾರೆಯಾಗಿ ಐದು ದಿನಗಳಲ್ಲಿ ಸಿನಿಮಾ ವಿಶ್ವಾದ್ಯಂತ 83.47 ಕೋಟಿ ರೂ.ಗಳನ್ನು ಬಾಚಿಕೊಂಡಿದೆ. 100 ಕೋಟಿ ಕ್ಲಬ್ ಸೇರಲು ಸಿನಿಮಾ ಇನ್ನೂ ಹರಸಾಹಸ ಪಡಬೇಕಿದೆ. ಮೈತ್ರಿ ಮೂವಿ ಮೇಕರ್ಸ್ ಈ ಚಿತ್ರವನ್ನು ಅದ್ಧೂರಿಯಾಗಿ ನಿರ್ಮಿಸಿದ್ದು, ಶ್ರೀಲೀಲಾ ಮತ್ತು ರಾಶಿ ಖನ್ನಾ ನಾಯಕಿಯರಾಗಿ ನಟಿಸಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಸಿನಿಮಾ ಚೇತರಿಸಿಕೊಳ್ಳುತ್ತದೆಯೇ ಅಥವಾ ಧುರಂಧರ್ ಅಬ್ಬರದ ಮುಂದೆ ಸೈಲೆಂಟ್ ಆಗುತ್ತದೆಯೇ ಎಂದು ಕಾದು ನೋಡಬೇಕು. ಪವನ್ ಕಲ್ಯಾಣ್ ಅಭಿಮಾನಿಗಳು ಮಾತ್ರ ತಮ್ಮ ನಾಯಕನ ಸಿನಿಮಾ ಶೀಘ್ರವೇ ಪುಟಿದೇಳಲಿದೆ ಎಂಬ ಆಶಯದಲ್ಲಿದ್ದಾರೆ.