War 2 Box Office Day 2 ; ಕೂಲಿ ಅಬ್ಬರದ ನಡುವೆಯೂ ಹೃತಿಕ್ -ತಾರಕ್ ಭರಾಟೆ, ವಾರ್ 2 ಎರಡನೇ ದಿನ ಗಳಿಸಿದ್ದೆಷ್ಟು ?

ಸಾಮಾನ್ಯವಾಗಿ ಹಬ್ಬ ಹರಿದಿನಗಳಂದು .. ರಜಾದಿನಗಳಂದು .. ಬಿಡುಗಡೆಯಾದ ಚಿತ್ರಕ್ಕೆ ಭಾರೀ ಡಿಮ್ಯಾಂಡ್ ಇರುತ್ತೆ. ಅದರಲ್ಲಿಯೂ ಆ ಚಿತ್ರದಲ್ಲಿ ಸೂಪರ್ ಸ್ಟಾರ್‌ಗಳಿದ್ದರೆ ಮುಗೀತು. ಚಿತ್ರಮಂದಿರದ ಎದುರು ಜನಜಂಗುಳಿ ಕಂಡು ಬರುತ್ತದೆ. ಚಿತ್ರ ಚೆನ್ನಾಗಿದೆಯಾ.. ಚೆನ್ನಾಗಿಲ್ವಾ ? ಯಾವುದನ್ನೂ ಲೆಕ್ಕಿಸದೇ ಮಜಾ ಮಾಡುವ ಉದ್ದೇಶದಿಂದ ರಜಾದಿನದಂದು ಬಂದ ಚಿತ್ರವನ್ನು ಅನೇಕರು ನೋಡುತ್ತಾರೆ. ಈ ಮೂಲಕ ತೀರಾ ಕಳಪೆ ಚಿತ್ರವನ್ನು ಕೂಡ ಗೆಲುವಿನ ದಡದತ್ತ ಕರೆದೊಯ್ಯುತ್ತಾರೆ. ಉದಾಹರಣೆಗೆ ''ವಾರ್ 2''.

ಹೌದು. ''ವಾರ್ 2'' ಈ ಬಾರಿಯ ಸ್ವಾತಂತ್ರೋತ್ಸವದ ಪ್ರಯುಕ್ತ ಬಿಡುಗಡೆಯಾದ ಸಿನಿಮಾ. 2019ರಲ್ಲಿ ಬಂದಿದ್ದ ವಾರ್ ಚಿತ್ರದ ಸಿಕ್ವೆಲ್. ಈ ಹಿನ್ನೆಲೆ ಈ ಚಿತ್ರದ ಮೇಲೆ ಅಪಾರ ನಿರೀಕ್ಷೆಗಳಿದ್ದವು. ಇನ್ನು ಈ ಬಾರಿ ಹೃತಿಕ್ ರೋಷನ್ ಎದುರು ಚಿತ್ರದಲ್ಲಿ ಜ್ಯೂ.ಎನ್.ಟಿ.ಆರ್ ಅಬ್ಬರಿಸಿದ ಹಿನ್ನೆಲೆ ದಕ್ಷಿಣದಲ್ಲಿ ಕೂಡ ಈ ಚಿತ್ರದ ಕುರಿತು ಕುತೂಹಲ ಇತ್ತು. ಆದರೆ ಈ ಚಿತ್ರ ನಿರೀಕ್ಷೆಯನ್ನು ಹುಸಿಯಾಗಿಸಿತು.

ಇದಕ್ಕೆ ಪೂರಕವಾಗಿ ಮೊದಲ ದಿನ [ ಆಗಸ್ಟ್ 14 ] ಚಿತ್ರವನ್ನು ನೋಡಿದ ಬಹುತೇಕರು ಚಿತ್ರದ ಕುರಿತು ನೆಗೆಟಿವ್ ಮಾತುಗಳನ್ನಾಡಿದರು. ಇನ್ನೂ ವಿಮರ್ಷಕರು ನಿರ್ದೇಶಕ ಅಯಾನ್ ಮುಖರ್ಜಿ ವಿರುದ್ಧ ಕೆಂಡ ಕಾರಿದ್ದರು. ಸುವರ್ಣ ಅವಕಾಶ ಕೈ ಚೆಲ್ಲಿದ್ದಾರೆ ಎಂದು ಜರಿದಿದ್ದರು.

ಆದರೂ ಕೂಡ ಈ ಚಿತ್ರವನ್ನು ನಿನ್ನೆ [ ಆಗಸ್ಟ್ 15 ] ಜನ ಮುಗಿ ಬಿದ್ದು ನೋಡಿದ್ದಾರೆ. ಇದಕ್ಕೆ ಕೈಗನ್ನಡಿ ಎಂಬಂತೆ ಬಾಕ್ಸಾಫೀಸ್‌ನ ಅಂಕಿ ಅಂಶಗಳನ್ನು ಹಂಚಿಕೊಳ್ಳುವ ''ಸ್ಯಾಕ್ನಿಲ್'' ಮೊದಲ ದಿನಕ್ಕಿಂತ ಎರಡನೇ ದಿನ ಪ್ರೇಕ್ಷಕರ ಸಂಖ್ಯೆಯಲ್ಲಿ ಏರಿಕೆ ಕಂಡು ಬಂದಿದೆ ಎಂದು ವರದಿ ಮಾಡಿದ್ದು ಮೊದಲ ದಿನ ₹ 51.5 ಕೋಟಿ ಗಳಿಸಿದ್ದ ''ವಾರ್ 2'' ಸ್ವಾತಂತ್ರೋತ್ಸವದ ದಿನದಂದು ಭಾರತದಲ್ಲಿ ಅಂದಾಜು ₹ 56.50 ಕೋಟಿ ಗಳಿಸಿದೆ ಎಂದು ಹೇಳಿದೆ. ಈ ಮೂಲಕ ಎರಡು ದಿನಗಳಲ್ಲಿ ಚಿತ್ರ ₹ 108 ಕೋಟಿಯನ್ನು ಕೊಳ್ಳೆ ಹೊಡೆದಿದೆ ಎಂದು ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.

ಸ್ಯಾಕ್ನಿಲ್ ಪ್ರಕಾರ ಮೊದಲ ಎರಡು ದಿನದ ಗಳಿಕೆ ಈ ಕೆಳಗಿನಂತೆ ಇದೆ

ಮೊದಲ ದಿನ [ ಗುರುವಾರ ] - ₹ 51.5 ಕೋಟಿ

ಎರಡನೇ ದಿನ [ ಶುಕ್ರವಾರ ] - ₹ 56.50 ಕೋಟಿ * ಅಂದಾಜು

ಒಟ್ಟು ಗಳಿಕೆ - ₹ 108 ಕೋಟಿ

ಇನ್ನು '' ವಾರ್ 2'' ನೋಡುವ ಉತ್ಸಾಹ ಉತ್ತರ ಭಾರತದವರಿಗಿಂತ ದಕ್ಷಿಣ ಭಾರತದಲ್ಲಿಯೇ ಹೆಚ್ಚು ಕಂಡು ಬಂದಿದೆ. ''ಸ್ಯಾಕ್ನಿಲ್'' ಪ್ರಕಾರ ಬೆಂಗಳೂರಿನಲ್ಲಿ ''ವಾರ್ 2'' ಚಿತ್ರದ ಹಿಂದಿ ಅವತರಣಿಕೆಗೆ 70.50% ಆಕ್ಯುಪೆನ್ಸಿ ಕಂಡು ಬಂದಿದ್ದು ಹೈದರಾಬಾದ್‌ನಲ್ಲಿ 80.00% ಚೆನ್ನೈನಲ್ಲಿ 94.75% ಆಕ್ಯುಪೆನ್ಸಿ ಕಂಡು ಬಂದಿದೆ.

ಒಟ್ನಲ್ಲಿ ''ಕೂಲಿ'' ಅಬ್ಬರದ ನಡುವೆಯೂ ಕೂಡ ಸದ್ಯ ''ವಾರ್ 2'' ಚಿತ್ರದ ಗಳಿಕೆಯಲ್ಲಿ ಏರಿಕೆ ಕಂಡು ಬಂದಿದ್ದು ಕೇವಲ ಎರಡೇ ದಿನದಲ್ಲಿ ಚಿತ್ರ ನೂರು ಕೋಟಿಯ ಗಡಿಯನ್ನು ದಾಟಿದೆ. ಇಂದು ಮತ್ತು ನಾಳೆ ಚಿತ್ರಕ್ಕೆ ಮತ್ತು ಚಿತ್ರತಂಡಕ್ಕೆ ಮಹತ್ವವಾಗಿದ್ದು ಈ ಎರಡು ದಿನದಲ್ಲಿ ಚಿತ್ರ ಎಷ್ಟು ಗಳಿಸುತ್ತೆ ಎನ್ನುವುದನ್ನು ಕಾದು ನೋಡಬೇಕಿದೆ.

Disclaimer: ಈ ವರದಿಯಲ್ಲಿ ನೀಡಲಾಗಿರುವ ಸಿನಿಮಾದ ಬಾಕ್ಸ್ ಆಫೀಸ್ ಅಂಕಿ ಅಂಶಗಳ ಮಾಹಿತಿಯನ್ನು https://www.sacnilk.com/, https://x.com/taran_adarsh, https://x.com/rameshlaus?lang=en, ನಿರ್ಮಾಣ ಸಂಸ್ಥೆಗಳು ಹಾಗೂ ಸಾರ್ವಜನಿಕವಾಗಿ ಲಭ್ಯವಿರುವ ಹಲವು ವೇದಿಕೆಗಳಿಂದ ತೆಗೆದುಕೊಳ್ಳಲಾಗಿದೆ. ಸಿನಿಮಾಗೆ ಸಂಬಂಧಿಸಿದ ಬಾಕ್ಸ್ ಆಫೀಸ್ ಕಲೆಕ್ಷನ್‌ಗಳ ಕುರಿತು ಪ್ರಕಟಿಸುವ ವರದಿಗಳಿಗೆ ಫಿಲ್ಮಿಬೀಟ್ ಯಾವುದೇ ಜವಾಬ್ದಾರಿಯನ್ನು ತೆಗೆದುಕೊಳ್ಳುವುದಿಲ್ಲ.