ಇಂದಿನ ಸ್ಟಾರ್ ನಟರು ಅಣ್ಣಾವ್ರ ಜೀವನದಿಂದ ಕಲಿಯಲೇಬೇಕಾದ 5 ಮುಖ್ಯ ಪಾಠಗಳಿವು…

ಕನ್ನಡ ಚಲನಚಿತ್ರ ರಂಗದಲ್ಲಿ ಡಾ. ರಾಜ್ಕುಮಾರ್ ಎಂದರೆ ಕೇವಲ ಒಬ್ಬ ನಟನ ಹೆಸರಲ್ಲ ಅದೊಂದು ಪೀಳಿಗೆಗೆ ಸ್ಫೂರ್ತಿ, ಒಂದು ಶಕ್ತಿ. ಬರೋಬ್ಬರಿ 5 ದಶಕಗಳ ಕಾಲ ಚಿತ್ರರಂಗವನ್ನು ಆಳಿದ 'ಅಣ್ಣಾವ್ರು' ತಮ್ಮ ಅಸಾಧಾರಣ ನಟನೆ, ಕಂಠಸಿರಿ ಮತ್ತು ಬಹುಮುಖ ಪ್ರತಿಭೆಯಿಂದ ಕೋಟ್ಯಂತರ ಕನ್ನಡಿಗರ ಹೃದಯದಲ್ಲಿ ಅಜರಾಮರರಾಗಿದ್ದಾರೆ. ತೆರೆಯ ಮೇಲೆ ಅವರು ರಾಜ, ಯೋಧ, ದೈವದ ಪಾತ್ರ ಮಾಡಿದರೂ ತೆರೆ ಹಿಂದಿನ ಅವರ ವ್ಯಕ್ತಿತ್ವ ಅಚ್ಚರಿ ಮೂಡಿಸುವಷ್ಟು ಸರಳವಾಗಿತ್ತು.

ಯಶಸ್ಸಿನ ಉತ್ತುಂಗದಲ್ಲಿದ್ದಾಗಲೂ ಅವರು ತಮ್ಮ ಮೂಲವನ್ನು ಮರೆಯಲಿಲ್ಲ. ಡಾ. ರಾಜ್‌ಕುಮಾರ್ ಅವರ ಸಿನಿ ಪಯಣದ ಯಶಸ್ಸಿನ ಹಿಂದಿನ ಸೀಕ್ರೆಟ್ ಅವರ ವೃತ್ತಿಪರತೆ ಮತ್ತು ಬದುಕಿನ ಶಿಸ್ತು. ಇಂದಿನ ಗ್ಲಾಮರ್ ಲೋಕದ ಯುವ ನಟ-ನಟಿಯರು, ಸಿನಿಮಾ ತಾರೆಯರು, ಸ್ಯಾಂಡಲ್ವುಡ್ನ ಹೊಸ ಪ್ರತಿಭೆಗಳು ರಾಜ್ಕುಮಾರ್ ಅವರ ಬದುಕಿನಿಂದ ಕಲಿಯಬೇಕಾದ ಅಮೂಲ್ಯವಾದ ಪಾಠಗಳು ಸಾಕಷ್ಟಿವೆ.

ಚಿತ್ರರಂಗ ಇಂದು ಹೊಸ ತಂತ್ರಜ್ಞಾನ, ಹೊಸ ಕಥೆಗಳೊಂದಿಗೆ ಬೆಳೆಯುತ್ತಿದೆ. ಆದರೆ ಒಬ್ಬ ವ್ಯಕ್ತಿ ಹೇಗೆ ಯಶಸ್ಸನ್ನು ನಿರ್ವಹಿಸಬೇಕು, ಸಾರ್ವಜನಿಕ ಜೀವನದಲ್ಲಿ ಹೇಗೆ ನಡೆದುಕೊಳ್ಳಬೇಕು ಎಂಬುದಕ್ಕೆ ರಾಜ್‌ಕುಮಾರ್ ಅವರ ಜೀವನವೇ ಒಂದು ಓಪನ್ ಬುಕ್. ಇಂದಿನ ಪ್ಯಾನ್ ಇಂಡಿಯಾ ಸ್ಟಾರ್‌ಗಳಿಗೆ ಅವರ ಬದುಕಿನ ಈ 5 ಸೂತ್ರಗಳು ಖಂಡಿತಾ ದಿಕ್ಸೂಚಿಯಾಗಬಲ್ಲವು. ಹಾಗಾದರೆ ಈ 5 ಮಹತ್ವದ ಪಾಠಗಳು ಯಾವುವು ಎಂಬುದನ್ನು ನೋಡೋಣ ಬನ್ನಿ.

1. ಸರಳತೆ ಎಂಬ ಮಹಾನ್ ಸಂಪತ್ತು...

ಯಶಸ್ಸು ಕಂಡ ಮೇಲೆ ಬಹಳಷ್ಟು ಕಲಾವಿದರು ತಮ್ಮ ಜೀವನಶೈಲಿಯನ್ನು ಬದಲಾಯಿಸಿಕೊಳ್ಳುತ್ತಾರೆ. ಆದರೆ ಡಾ. ರಾಜ್‌ಕುಮಾರ್ ಅವರು ತಾರಾ ವರ್ಚಸ್ಸಿನ ಹೊರತಾಗಿಯೂ ಸಾಮಾನ್ಯರಂತೆ ಬದುಕಿದರು. ದುಬಾರಿ ವಸ್ತುಗಳ ವ್ಯಾಮೋಹವಿಲ್ಲದೆ ಅತ್ಯಂತ ಸರಳ ಉಡುಪು ಧರಿಸಿ ಸಾಮಾನ್ಯ ಜೀವನ ನಡೆಸಿದರು. ಈ ಸರಳತೆಯೇ ಅವರನ್ನು ಜನಸಾಮಾನ್ಯರಿಗೆ ಮತ್ತಷ್ಟು ಹತ್ತಿರ ಮಾಡಿತು. ಗಾಂಧೀಜಿ ತತ್ವಗಳನ್ನು ಪಾಲಿಸಿದ ಅವರು ಹಣಕ್ಕಿಂತ ಮನುಷ್ಯ ಸಂಬಂಧಗಳಿಗೆ ಬೆಲೆ ಕೊಟ್ಟರು. ಇಂದಿನ ಯುವ ಕಲಾವಿದರು ಈ ಸರಳತೆಯನ್ನು ಅಳವಡಿಸಿಕೊಂಡರೆ ಜನಪ್ರಿಯತೆಯ ಭಾರವನ್ನು ಸುಲಭವಾಗಿ ನಿರ್ವಹಿಸಬಹುದು.

2. ಕೆಲಸದ ಶಿಸ್ತು ಮತ್ತು ಬದ್ಧತೆ...

ಡಾ. ರಾಜ್‌ಕುಮಾರ್ ಅವರ ಸಿನಿ ಜೀವನದ ಯಶಸ್ಸಿಗೆ ಮುಖ್ಯ ಕಾರಣ ಅವರ ಶಿಸ್ತು. ಅವರು ಎಂದಿಗೂ ಶೂಟಿಂಗ್‌ಗೆ ತಡವಾಗಿ ಹೋಗುತ್ತಿರಲಿಲ್ಲ. ಸಮಯ ಪಾಲನೆ, ಚಿತ್ರಕಥೆಗೆ ಸಂಪೂರ್ಣ ತಯಾರಿ ಮತ್ತು ತಮ್ಮ ಪಾತ್ರದ ಕುರಿತು ಅವರಿಗಿದ್ದ ಬದ್ಧತೆ ಅದ್ಭುತವಾಗಿತ್ತು. ಯಾವುದೇ ಪಾತ್ರ ಕೊಟ್ಟರೂ ಅದನ್ನು ಆತ್ಮವಿಶ್ವಾಸದಿಂದ ನಿರ್ವಹಿಸುತ್ತಿದ್ದರು. ವೃತ್ತಿ ಬದುಕಿನಲ್ಲಿ ಶಿಸ್ತು ಮತ್ತು ಸಮಯಕ್ಕೆ ಗೌರವ ಕೊಡುವುದು ಎಷ್ಟೊಂದು ಮುಖ್ಯ ಎಂಬುದನ್ನು ಅವರು ತಮ್ಮ ಜೀವನದಿಂದ ತೋರಿಸಿಕೊಟ್ಟರು.

3. ಭಾಷೆ ಮತ್ತು ಸಂಸ್ಕೃತಿಗೆ ಗೌರವ...

ಕನ್ನಡ ಚಿತ್ರರಂಗವನ್ನು ದಶಕಗಳ ಕಾಲ ಆಳಿದ ರಾಜ್‌ಕುಮಾರ್ ಅವರು ಕನ್ನಡ ಭಾಷೆ ಮತ್ತು ಸಂಸ್ಕೃತಿಯ ಕುರಿತು ಅಪಾರ ಅಭಿಮಾನ ಹೊಂದಿದ್ದರು. ಪರಭಾಷೆಯ ಚಿತ್ರಗಳಲ್ಲಿ ನಟಿಸಲು ಅವಕಾಶಗಳು ಬಂದರೂ ಅವರು ಕೇವಲ ಕನ್ನಡ ಚಿತ್ರಗಳಲ್ಲಿಯೇ ನಟಿಸಿ, ಕನ್ನಡಕ್ಕೆ ತಮ್ಮ ಸಂಪೂರ್ಣ ಸೇವೆಯನ್ನು ಮುಡಿಪಾಗಿಟ್ಟರು. ತಮ್ಮ ಹಾಡು, ಮಾತು ಮತ್ತು ಚಿತ್ರಗಳ ಮೂಲಕ ಕನ್ನಡತನವನ್ನು ಪ್ರತಿಬಿಂಬಿಸಿದರು. ಇದು ತಮ್ಮ ನೆಲ, ಭಾಷೆ ಮತ್ತು ಸಂಸ್ಕೃತಿಯ ಬಗ್ಗೆ ಕಲಾವಿದರು ಯಾವ ರೀತಿಯ ಬದ್ಧತೆ ಹೊಂದಿರಬೇಕು ಎಂಬುದಕ್ಕೆ ಒಂದು ದೊಡ್ಡ ಉದಾಹರಣೆ.

4. ಫಿಟ್‌ನೆಸ್ ಬಗ್ಗೆ ಕಾಳಜಿ...

ವೃತ್ತಿಪರ ಜೀವನದಲ್ಲಿ ಎಷ್ಟು ಬ್ಯುಸಿ ಇದ್ದರೂ ಡಾ. ರಾಜ್‌ಕುಮಾರ್ ತಮ್ಮ ಆರೋಗ್ಯವನ್ನು ಎಂದಿಗೂ ನಿರ್ಲಕ್ಷಿಸಲಿಲ್ಲ. ನಿಯಮಿತವಾದ ಯೋಗ, ವ್ಯಾಯಾಮ ಮತ್ತು ಸಮತೋಲಿತ ಆಹಾರವನ್ನು ರೂಢಿಸಿಕೊಂಡಿದ್ದರು. ಸಿನಿಮಾದಲ್ಲಿ ಅವರ ಫಿಟ್ನೆಸ್ ಎಷ್ಟಿತ್ತು ಎಂಬುದು ಅವರ ಆಕ್ಷನ್ ಚಿತ್ರಗಳಲ್ಲೇ ಸಾಬೀತಾಗುತ್ತದೆ. ಚಿತ್ರರಂಗದ ಒತ್ತಡದಲ್ಲಿರುವ ಇಂದಿನ ಕಲಾವಿದರು ದೀರ್ಘಕಾಲಿಕ ಯಶಸ್ಸು ಸಾಧಿಸಲು ದೈಹಿಕ ಮತ್ತು ಮಾನಸಿಕ ಆರೋಗ್ಯ ಕಾಳಜಿ ಎಷ್ಟು ಮುಖ್ಯ ಎಂಬುದನ್ನು ಅಣ್ಣಾವ್ರು ತೋರಿಸಿದ್ದಾರೆ.

5. ಸಹೋದ್ಯೋಗಿಗಳೊಂದಿಗೆ ಆತ್ಮೀಯತೆ...

ಡಾ. ರಾಜ್‌ಕುಮಾರ್ ಅವರು ತಮ್ಮ ಸಹನಟರು, ತಂತ್ರಜ್ಞರು ಮತ್ತು ಇಡೀ ಚಿತ್ರತಂಡವನ್ನು ಗೌರವದಿಂದ ಕಾಣುತ್ತಿದ್ದರು. ತಮ್ಮೊಂದಿಗೆ ಕೆಲಸ ಮಾಡುವವರನ್ನು ಕೇವಲ ಸಹೋದ್ಯೋಗಿಗಳೆಂದು ಪರಿಗಣಿಸದೆ ಅವರನ್ನು ಕುಟುಂಬದ ಸದಸ್ಯರಂತೆ ಕಾಣುತ್ತಿದ್ದರು. ಹಿರಿಯರು-ಕಿರಿಯರು ಎಂಬ ಭೇದವಿಲ್ಲದೆ ಎಲ್ಲರೊಂದಿಗೆ ಪ್ರೀತಿ ಮತ್ತು ಆತ್ಮೀಯತೆಯಿಂದ ನಡೆದುಕೊಳ್ಳುತ್ತಿದ್ದರು. ಸಂಭಾವನೆ ಪ್ರತಿಷ್ಠೆಗಿಂತ ಮಾನವೀಯ ಮೌಲ್ಯಗಳಿಗೆ ಬೆಲೆ ಕೊಟ್ಟರು. ಚಿತ್ರರಂಗದಲ್ಲಿ ಉತ್ತಮ ಬಾಂಧವ್ಯಕ್ಕೆ ಇದು ಅತ್ಯುತ್ತಮ ಮಾದರಿ.

ಒಟ್ಟಿನಲ್ಲಿ ಡಾ. ರಾಜ್‌ಕುಮಾರ್ ಅವರ ಬದುಕು ಕೇವಲ ಸಿನಿಮಾಗಳ ಸರಣಿಯಲ್ಲ. ಅದು ಮೌಲ್ಯಗಳ ಕಣಜ. ಇಂದು ಸಿನಿಮಾ ಕ್ಷೇತ್ರದಲ್ಲಿ ಹೆಸರು ಮಾಡಲು ಹೊರಟಿರುವ ಪ್ರತಿಯೊಬ್ಬರಿಗೂ ಅವರ ಈ ಸರಳ ಸೂತ್ರಗಳು ಯಶಸ್ಸಿನ ಗುಟ್ಟನ್ನು ಹೇಳುತ್ತವೆ.