'ತಲೆಯಲ್ಲಿ ಅರ್ಧ ಕೂದಲಿರಲಿಲ್ಲ, ನಟನಾಗಬೇಕೆಂಬ ಆಸೆ ನನ್ನನ್ನು ಬಿಡಲಿಲ್ಲ'

ಹೊಸಬರಲ್ಲಿ ನನ್ನನ್ನು ನೋಡುತ್ತೇನೆ

ನಟ ಅನುಪಮ್ ಖೇರ್ ಕಳೆದ ಮೂರು ದಶಕಗಳಿಂದ ಚಿತ್ರೋದ್ಯಮದಲ್ಲಿ ಸಕ್ರಿಯರಾಗಿದ್ದಾರೆ. ಇಂದಿಗೂ ಅನೇಕ ಯುವಕರು ಅವರ ಕೆಲಸಕ್ಕೆ ಅಭಿಮಾನಿಗಳು. ಹೊಸಬರ ಜೊತೆ ಕೆಲಸ ಮಾಡುವ ಕುರಿತು ಮಾತನಾಡಿದ ಅನುಪಮ್ ಖೇರ್ ''ಹೊಸಬರಲ್ಲಿ ನಾನು ಯಾವಾಗಲೂ ನನ್ನನ್ನು ನೋಡುತ್ತೇನೆ. ಹಾಗಾಗಿ, ಅವರನ್ನು ನಾನು ಅರ್ಥ ಮಾಡಿಕೊಳ್ಳಲು ಸಾಧ್ಯ. ನಾನು ಸದಾ ಅವರಿಗೆ ಸಹಾನುಭೂತಿಯಿಂದಿರಲು ಪ್ರಯತ್ನಿಸುತ್ತೇನೆ'' ಎಂದಿದ್ದಾರೆ.

ನಾನು ಎದುರಿಸಿದ ಕಷ್ಟ ಅವರಿಗೆ ಬೇಡ

1981ರ ಸಮಯದಲ್ಲಿ ನಟನಾಗಬೇಕೆಂಬ ಕನಸಿನಿಂದ ಮುಂಬೈಗೆ ಬಂದಿದ್ದ ನಟ ಅನುಪಮ್ ಖೇರ್ ಎಲ್ಲಾ ರೀತಿಯ ಕಷ್ಟ ಎದುರಿಸಿದ್ದಾರೆ. ಏಕಾಂಗಿಯಾಗಿ ನಡೆದು ಬಂದಿದ್ದಾರೆ. ನಟನೆಯಲ್ಲಿ ಚಿನ್ನದ ಪದಕ ಪಡೆದಿದ್ದರು ನಟನೆಗೆ ಅವಕಾಶ ಕೇಳಲು ಮುಜುಗರ ಪಡುತ್ತಿದ್ದರು ಎಂದು ಹೇಳಿಕೊಂಡಿದ್ದಾರೆ.. ಎಷ್ಟೋ ಸಲ ರೈಲ್ವೆ ಫ್ಲಾಟ್‌ಫಾರ್ಮ್‌ನಲ್ಲಿ ಮಲಗಿದ್ದರು. ಊಟನೂ ಸಿಗದೇ ಹಸಿವಿನಿಂದ ಇದ್ದರು. ಅಂತಹ ದಿನಗಳು ಬೇರೆಯವರಿಗೆ ಬರುವುದು ಬೇಡ ಎಂದು ಎಂದು ಕೇಳಿಕೊಂಡಿದ್ದಾರೆ.

ನೀನು ನಟನಾಗುವುದು ಬೇಡ

''ನನ್ನನ್ನು ನೋಡಿ ಬಹಳಷ್ಟು ಮಂದಿ ನೀನು ನಟನಾಗುವುದು ಬೇಡ, ಅದರ ಬದಲು ನಿರ್ದೇಶಕ, ಸಹಾಯಕ ನಿರ್ದೇಶಕ ಅಥವಾ ಬರಹಗಾರನೂ ಆಗಬಹುದು'' ಎಂದು ಹೇಳಿದ್ದಾರೆ ಎಂದು ಬಹಿರಂಗಪಡಿಸಿದ್ದಾರೆ. ಅದರಲ್ಲಿಯೇ ಸಾಧಿಸಿ ತೋರಿಸಿದ್ದಾರೆ. 'ಈಗ ಯುವ ಪ್ರತಿಭೆಗಳಿಗೆ ಹಲವು ಮಾರ್ಗಗಳಿವೆ. ಟಿವಿ ಕಾರ್ಯಕ್ರಮಗಳಿವೆ, ಕಾಸ್ಟಿಂಗ್ ಕಚೇರಿಗಳಿವೆ, ಕಾಸ್ಟಿಂಗ್ ನಿರ್ದೇಶಕರಿದ್ದಾರೆ. ನಮಗೆ ಯಾವ ಆಯ್ಕೆಗಳು ಇರಲಿಲ್ಲ' ಎಂದು ಹಳೆಯದನ್ನು ನೆನಪಿಸಿದ್ದಾರೆ ಖೇರ್.

ಕೇಂದ್ರದಿಂದ ಅತ್ಯುನ್ನತ ಸ್ಥಾನಮಾನ

ಮೂರು ದಶಕಗಳಿಂದ ಚಿತ್ರರಂಗದಲ್ಲಿ ತೊಡಗಿಕೊಂಡಿರುವ ಅನುಪಮ್ ಖೇರ್ 500ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಇದುವರೆಗೂ ಎರಡು ಬಾರಿ ರಾಷ್ಟ್ರ ಪ್ರಶಸ್ತಿ ಪಡೆದಿದ್ದಾರೆ. ಏಂಟು ಸಲ ಫಿಲಂ ಫೇರ್ ಪ್ರಶಸ್ತಿ ಪಡೆದಿದ್ದಾರೆ. ಕೇಂದ್ರ ಸೆನ್ಸಾರ್ ಮಂಡಳಿ ಹಾಗೂ ರಾಷ್ಟ್ರೀಯ ನಾಟಕ ಶಾಲೆ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಿದ್ದಾರೆ. ಪ್ರಸ್ತುತ, ಭಾರತೀಯ ಟಿವಿ ಮತ್ತು ಚಲನಚಿತ್ರ ಸಂಸ್ಥೆಯ ಅಧ್ಯಕ್ಷರಾಗಿದ್ದಾರೆ. ಅನುಪಮ್ ಖೇರ್ ಸಾಧನೆಗೆ ಪದ್ಮಶ್ರೀ ಮತ್ತು ಪದ್ಮ ಭೂಷಣ್ ಪ್ರಶಸ್ತಿ ಲಭಿಸಿದೆ.