ಈ ವರ್ಷ ಡಬ್ ಆಗಿ ಕನ್ನಡಕ್ಕೆ ಬಂದ ಪರಭಾಷೆ ಹಿಟ್ ಚಿತ್ರಗಳು

ಅಲ್ಲಿ ವಿಶ್ವಾಸಂ, ಇಲ್ಲಿ ಜಗಮಲ್ಲ

ತಮಿಳು ನಟ ಅಜಿತ್ ಕುಮಾರ್ ನಟಿಸಿದ್ದ ವಿಶ್ವಾಸಂ ಸಿನಿಮಾ ಈ ವರ್ಷದ ಹಿಟ್ ಚಿತ್ರಗಳಲ್ಲಿ ಒಂದು. ಕಾಲಿವುಡ್ ಬಾಕ್ಸ್ ಆಫೀಸ್ ಧೂಳೆಬ್ಬಿಸಿದ್ದ ಈ ಚಿತ್ರ ಕನ್ನಡದಲ್ಲಿ 'ಜಗಮಲ್ಲ'ನಾಗಿ ತೆರೆಕಂಡಿತ್ತು. ಚಿತ್ರಮಂದಿರಕ್ಕೆ ಆಡಿಯೆನ್ಸ್ ಹೋದರು, ಹೆಚ್ಚು ಸಕ್ಸಸ್ ಕಾಣುವಲ್ಲಿ ಸಿನಿಮಾಗೆ ಹಿನ್ನಡೆ ಆಯಿತು.

ಕಿರಿಕ್ ಲವ್ ಸ್ಟೋರಿ

ಕಣ್ಸನ್ನೆ ಮೂಲಕ ಭಾರತೀಯ ಚಿತ್ರರಂಗದಲ್ಲಿ ಸಂಚಲನ ಸೃಷ್ಟಿಸಿದ್ದ ನಟಿ ಪ್ರಿಯಾ ಪ್ರಕಾಶ್ ವಾರಿಯರ್. ಪ್ರಿಯಾ ನಟನೆಯ ಮೊದಲ ಸಿನಿಮಾ ಒರು ಅದಾರ್ ಲವ್. ಈ ಚಿತ್ರ ಕನ್ನಡದಲ್ಲಿ 'ಕಿರಿಕ್ ಲವ್ ಸ್ಟೋರಿ' ಹೆಸರಿನಲ್ಲಿ ತೆರೆಕಂಡಿತ್ತು. ಪರಿಣಾಮಕಾರಿಯಾಗಿ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಈ ಸಿನಿಮಾ ಸೋಲು ಕಂಡಿತು.

ಕಾಂಚನಾ 3

ರಾಘವ ಲಾರೆನ್ಸ್ ನಟನೆಯ ಕಾಂಚನಾ-3 ಸಿನಿಮಾ ತಮಿಳಿನಲ್ಲಿ ದೊಡ್ಡ ಹಿಟ್ ಆಯ್ತು. ಬಾಕ್ಸ್ ಆಫೀಸ್ ನಲ್ಲಿ 100 ಕೋಟಿ ಕಬಳಿಸಿದ್ದ ಈ ಚಿತ್ರ ಕನ್ನಡದಲ್ಲಿ ಅದೇ ಹೆಸರಿನಲ್ಲಿ ರಿಲೀಸ್ ಆಯ್ತು. ಕನ್ನಡದಲ್ಲಿ ಮೋಡಿ ಮಾಡಲಿಲ್ಲ.

ರಂಗಸ್ಥಳಂ ಸಿನಿಮಾ

ತೆಲುಗಿನ ಸೂಪರ್ ಹಿಟ್ ಸಿನಿಮಾ ರಂಗಸ್ಥಳಂ ಕನ್ನಡದಲ್ಲಿ ಡಬ್ ಆಗಿ ರಿಲೀಸ್ ಆಗಿತ್ತು. ತೆಲುಗಿನಲ್ಲಿ ಈ ಚಿತ್ರದ ಹಾಡುಗಳು ಬಹುದೊಡ್ಡ ಹಿಟ್ ಆಗಿತ್ತು. ಹಾಗೆ ಕನ್ನಡದ ಹಾಡುಗಳಿಗೆ ಅತ್ಯುತ್ತಮ ಪ್ರತಿಕ್ರಿಯೆ ಸಿಕ್ಕಿತ್ತು.

ಡಿಯರ್ ಕಾಮ್ರೇಡ್

ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ನಟಿಸಿದ್ದ ಡಿಯರ್ ಕಾಮ್ರೇಡ್ ಸಿನಿಮಾ, ಕನ್ನಡದಲ್ಲೂ ತೆರೆಕಂಡಿತ್ತು. ಏಕಕಾಲದಲ್ಲಿ ಈ ಚಿತ್ರ ಎಲ್ಲಾ ಭಾಷೆಗಳಲ್ಲೂ ಬಿಡುಗಡೆಯಾಗಿತ್ತು. ಮೂಲ ಭಾಷೆಯಲ್ಲಿ ಈ ಚಿತ್ರಕ್ಕೆ ಮಿಶ್ರಪ್ರತಿಕ್ರಿಯ ವ್ಯಕ್ತವಾಗಿತ್ತು. ಅದೇ ರೀತಿ ಕನ್ನಡದಲ್ಲೂ ಹಿನ್ನಡೆ ಅನುಭವಿಸಿತು.

ಸೈರಾ ನರಸಿಂಹ ರೆಡ್ಡಿ

ಮೆಗಾಸ್ಟಾರ್ ಚಿರಂಜೀವಿ, ಕಿಚ್ಚ ಸುದೀಪ್, ವಿಜಯ್ ಸೇತುಪತಿ, ನಯನತಾರ, ತಮನ್ನಾ ಅಂತಹ ಸ್ಟಾರ್ ಕಲಾವಿದರು ನಟಿಸಿದ್ದ ಸೈರಾ ನರಸಿಂಹ ರೆಡ್ಡಿ ಸಿನಿಮಾ ಏಕಕಾಲದಲ್ಲಿ ತೆಲುಗು ಸೇರಿದಂತೆ ಐದು ಭಾಷೆಯಗಳಲ್ಲಿ ಬಂದಿತ್ತು. ಕನ್ನಡದಲ್ಲೂ ಈ ಸಿನಿಮಾ ಡಬ್ ಆಗಿ ರಿಲೀಸ್ ಆಗಿತ್ತು. ತೆಲುಗಿನಲ್ಲಿ ಸಕ್ಸಸ್ ಆದ ಈ ಚಿತ್ರಕ್ಕೆ ಕನ್ನಡದಲ್ಲೂ ಸ್ವಲ್ಪ ಮಟ್ಟಿಗೆ ಸದ್ದು ಮಾಡಿತ್ತು.

ಟರ್ಮಿನೇಟರ್ ಡಾರ್ಕ್ ಫೇಟ್

ಹಾಲಿವುಡ್ ಚಿತ್ರ 'ಟರ್ಮಿನೇಟರ್ ಡಾರ್ಕ್ ಫೇಟ್' ಪೂರ್ಣ ಪ್ರಮಾಣದಲ್ಲಿ ಕನ್ನಡಕ್ಕೆ ಡಬ್ ಆಗಿ ಬಂತು. ಅರ್ನಾಲ್ಡ್ ಶ್ವಾರ್ಜಿನೆಗ್ಗರ್ ಮತ್ತು ಲಿಂಡಾ ಹ್ಯಾಮಿಲ್ಟನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ ಈ ಚಿತ್ರ ಟರ್ಮಿನೇಟರ್ ಸೀರಿಸ್ ಗಳಲ್ಲಿ ಆರನೇ ಚಿತ್ರ. ಟಿಮ್ ಮಿಲ್ಲರ್ ನಿರ್ದೇಶನದ ಈ ಚಿತ್ರಕ್ಕೆ ಟೈಟಾನಿಕ್ ಮತ್ತು ಅವತಾರ್ ಖ್ಯಾತಿಯ ನಿರ್ದೇಶಕ ಜೇಮ್ಸ್ ಕ್ಯಾಮರೂನ್ ಬಂಡವಾಳ ಹೂಡಿದ್ದಾರೆ.

ಕನ್ನಡದಲ್ಲೂ ದಬಾಂಗ್ 3

ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಮತ್ತು ಕಿಚ್ಚ ಸುದೀಪ್ ನಟನೆಯ ದಬಾಂಗ್ 3 ಸಿನಿಮಾ ಡಿಸೆಂಬರ್ 20ಕ್ಕೆ ಬಿಡುಗಡೆಯಾಗುತ್ತಿದೆ. ಹಿಂದಿಯ ಜೊತೆ, ಕನ್ನಡ, ತೆಲುಗು, ತಮಿಳು ಭಾಷೆಗಳಲ್ಲೂ ದಬಾಂಗ್ ತೆರೆಕಾಣುತ್ತಿದೆ.